4 ساۋىردە "ەكاتەرينبۋرگ-ەكسپو" حالىقارالىق كورمە ورتالىعىندا AtomSkills-2025 كاسىبي شەبەرلىك چەمپيوناتىنىڭ جابىلۋ سالتاناتى ءوتتى، دەپ حابارلايدى Dalanews.kz.
جارىسقا رەسەي، جۇڭگو، تۇركيا، ەگيپەت، بانگلادەش، وڭتۇستىك افريكا، وزبەكستان، بەلارۋس، يندونەزيا، ءۇندىستان مەن قازاقستاننان بارعان 2000-نان استام قاتىسۋشىلار مەن ساراپشىلاردىڭ باسىن بىرىكتىردى. حالىقارالىق فورماتتاعى ءداستۇرلى دودادا قازاقستاندىق قاتىسۋشىلار 9 جۇلدەلى ورىنعا يە بولدى. AtomSkills-2025 باسەكەسىنە قاتىسقان نەگىزگى جانە ستۋدەنتتىك ليگالارى بەس كۇن بويى سىنعا ءتۇستى.
جارىستى ۇيىمداستىرعان «روساتوم» مەملەكەتتىك كورپوراسياسىنىڭ قۇرامىنداعى كاسىپورىندار مەن كوماندالىق ديۆيزيوندار، سونداي-اق ءىرى كومپانيالار مەن وقۋ ورىندارىنىڭ وكىلدەرى ءوز ماماندىعى بويىنشا ۇزدىك اتانۋعا كۇرەستى. چەمپيوناتقا قاتىسۋشى جوعارى وقۋ ورىندارى مەن كوللەدجدەردىڭ سانى – 70-كە دەيىن جەتتى. بۇل دەگەنىڭىز تەحنيكالىق جانە ينجەنەرلىك سالادا كاسىبي دامۋعا دەگەن قىزىعۋشىلىقتىڭ ارتىپ كەلە جاتقاندىعىن كورسەتەدى.
ايتا كەتۋ كەرەك، وتكەن جىلدارمەن سالىستىرعاندا قازاقستاننان جارىسقا قاتىسۋشىلار سانى ەداۋىر ارتقان. 2024 جىلى ەكى قاتىسۋشى بولسا، 2023 جىلى 3 مامان ب ا ق سىناعان. ال بيىل ولاردىڭ سانى 19 ادامعا جەتىپ وتىر. AtomSkills ساراپشىسى رەتىندە تەحنيكالىق ماماندانۋدان باستاپ، قورشاعان ورتانى قورعاۋ مەن حيميالىق تالداۋعا دەيىنگى ءتۇرلى سالالار بويىنشا قازاقستاننان 6 كاسىبي مامان قاتىستى.
چەمپيوناتتىڭ ماماندىق ۇلەسى 44-كە دەيىن ءوستى. ولاردىڭ ىشىندە «دانەكەرلەۋ تەحنولوگيالارى»، «ينجەنەرلىك جوبالاۋ»، «كومپوزيتتەر تەحنولوگياسى»، «ونەركاسىپتىك اۆتوماتيكا»، «باعدارلامالىق روبوتتاندىرۋ»، «CNC ستانوكتارىنداعى فرەزەرلىك جۇمىستار» جانە باسقادا ماماندىقتار ەنگەن. سونىمەن قوسا دەمونستراسيالىق فورماتتا جاڭا باعىتتار ۇسىنىلدى: «1س: كاسىپورىن پلاتفورماسىندا بيزنەس-قوسىمشالاردى ازىرلەۋ" جانە "گرافيكالىق ديزاين». بارلىق كونكۋرستىق تاپسىرمالار وزەكتى سالالىق جانە حالىقارالىق ستاندارتتارعا سايكەس كەلدى.
بيىل AtomSkills ءتورت بىردەي اۋقىمدى كولەمدەگى ىسكەرلىك باعدارلاماداعى تاقىرىپتى قامتىپ وتىر: «كاسىپتىك باعدار»، «پەداگوگيكالىق»، «كادرلىق» جانە «اتا-انا». وسى تاقىرىپتار اياسىندا كونفەرەنسيالار، فورۋمدار، شەبەرلىك ساباقتار، جوبالىق جانە تالدامالىق سەسسيالار ءوتتى. اتالعان سالادا تەحنولوگيالىق كوشباسشىعا اينالىپ، تۇراقتى دامۋدى قامتاماسىز ەتۋدە كاسىپتىك ءبىلىم بەرۋ جۇيەسىنىڭ ءرولى نەگىزگى تاقىرىپ بولدى.
ايتا كەتەيىك، AtomSkills ‒ «روساتوم» مەملەكەتتىك كورپوراسياسى 2016 جىلدان بەرى ۇيىمداستىرىپ كەلە جاتقان جىل سايىنعى جۇمىسشى جانە ينجەنەرلىك كاسىپتەر چەمپيوناتى. چەمپيونات ‒ بۇل جاڭا بۋىن اراسىندا ءوزارا ءبىلىم مەن تاجىريبە الماسۋعا ىقپال ەتەتىن، سونداي-اق مامانداردى، ستۋدەنتتەر مەن وقۋشىلاردى رەسەيدەگى جۇمىسشىلار مەن ينجەنەرلىك كادرلاردى دايارلاۋ مەن دامىتۋدىڭ ءبىرىڭعاي ەكوجۇيەسىنە بىرىكتىرەتىن كاسىبي ورتانى دامىتۋدىڭ قۇرالى. العاش رەت چەمپيوناتقا 450-گە جۋىق سالا ماماندارى مەن ساراپشىلارى قاتىسىپ 10 قۇزىرەت بويىنشا سىنعا تۇسكەن. بۇگىنگى تاڭدا بۇل 44 قۇزىرەت، ەكى ليگا (كاسىپقويلار ليگاسى، ستۋدەنتتەر ليگاسى) بويىنشا وتكىزىلەدى جانە 2000-نان استام كاسىپقويلاردى بىرىكتىرەتىن الەمدەگى ەڭ ءىرى چەمپيوناتتاردىڭ ءبىرى. ولار ‒ اتوم سالاسىنىڭ قىزمەتكەرلەرى، وقۋ ورىندارىنىڭ ستۋدەنتتەرى، سونداي-اق رەسەيدىڭ ءىرى ونەركاسىپتىك كومپانيالارىنىڭ كوماندالارى. 2023 جىلدان باستاپ چەمپيونات حالىقارالىق فورماتتا وتكىزىلىپ كەلەدى.
رەسەيدىڭ ءىرى كومپانيالارى قىزمەتكەرلەردىڭ الەۋەتىن اشۋ بويىنشا مۇمكىندىكتەردى كەڭەيتۋدى جالعاستىرۋدا. «روساتوم» جانە ونىڭ كاسىپورىندارى عىلىمي-اعارتۋشىلىق باستامالاردى قولدايدى. سونىڭ نەگىزىندە رەسەيلىك جوعارى وقۋ ورىندارىندا بازالىق كافەدرالاردى قۇرۋعا، ستيپەنديالىق قولداۋ باعدارلامالارىن ىسكە اسىرۋعا، ستۋدەنتتەردى جۇمىسقا ورنالاستىرا وتىرىپ، تاجىريبە مەن تاعىلىمدامادان ءوتۋدى ۇيىمداستىرۋعا قاتىسادى.
