قازاقستاندىق سوت-مەديسينالىق ساراپتاما قىزمەتكەرى تاحير حاليمنازاروۆ رەسەيلىك ارىپتەستەرىنىڭ سالتانات نۇكەنوۆانىڭ ولىمىنە بايلانىستى شىعارعان شەشىمىنە قاتىستى پىكىر ءبىلدىردى، دەپ حابارلايدى Dalanews.kz.
بىرنەشە كۇن بۇرىن رەسەيلىك ساراپشىلار قازاقستاندىق ماماننىڭ تۇجىرىمداماسىن جوققا شىعارعان بولاتىن. بيشىمبايەۆتىڭ ادۆوكاتتارى سوتتا ماسكەۋ قالاسىنداعى "ن.ي. پيروگوۆ اتىنداعى رەسەي ۇلتتىق زەرتتەۋ مەديسينالىق ۋنيۆەرسيتەتىنىڭ" رەسەيلىك سوت-مەديسينالىق ساراپشىلارىنىڭ قورىتىندىسىن بايانداپ، نۇكەنوۆا باس ميىنىڭ اۋىر جاراقاتى سالدارىنان قايتىس بولماعانىن جەتكىزدى. ولار سالتاناتتىڭ ولىمىنە دەيىن 3-4 اپتا بۇرىن العان ەسكى گەماتومادان باستا قان كەتۋى سەبەپ بولعانىن حابارلاعان ەدى.
ال تاحير حاليمنازاروۆ شەتەلدىك ارىپتەستەرىنىڭ مۇنداي شەشىمىنە دايىن بولعانىن ايتادى.
"بۇل جاعدايدى كۇتكەنبىز. سەبەبى بۇل ءبىزدىڭ پراكتيكادا بار. ولاردىڭ جازعانىنا سۇيەنسەك، مۇندا قىلمىس بولماعان بولىپ تۇر. ياعني، باستا قان كەتىپ، سونىڭ اسەرىنەن قايتىس بولدى دەگەن قورىتىندىعا كەلدى"، - دەيدى ساراپشى دينا تولەپبەرگەنگە بەرگەن سۇقباتىندا.
ايتۋىنشا، بۇل ساراپتاما ەمەس، تەك ەكى ماماننىڭ – قورىتىندىسى.
"مەن ايتىپ كەتتىم عوي. بۇل – ساراپتاما ەمەس. بۇل تەك ەكى ماماننىڭ – كوزقاراسى. بىرىنشىدەن، بۇل كىسىلەر رەسەيلىك ءبىر مەملەكەتتىك مەكەمەنىڭ اتىنان شىعىپ تۇرعان جوق. بۇل ەكى تۇلعانىڭ جاساعان قورىتىندىسى. ول تۋرالى رەسەيلىك مەديسينالىق ۋنيۆەرسيتەت دەپ جازىپ جاتىر. ءبىراق ول ۋنيۆەرسيتەتتىڭ اتىنان بەرگەن جوق. تەك وزدەرىنىڭ اتىنان بەرىپ تۇر. ونىڭ ءبارىن ولار تەگىن جاسامايدى. ەڭ باستى نارسە سول بولىپ تۇر"، - دەيدى حاليمنازاروۆ.
الايدا ول رەسەيلىك ارىپتەستەرىنىڭ بۇل جۇمىسى ءۇشىن قانشا قاراجات العانىن اشىپ ايتا المادى.
"مەن ونى ايتا المايمىن. ويتكەنى بۇل جەردە ءبىزدىڭ ساراپشىلارعا، ءبىزدىڭ ماماندارعا تولەگەن اقشا ەمەس. مۇندا ەندى كوپ شىعار دەپ ويلايمىن"، - دەدى ول.
ونىڭ سوزىنشە، وزگە ەلدىڭ ساراپشىلارى جاساعان قورىتىندىنىڭ باسقا مەملەكەتتە كوپ جاعدايدا سالماعى بولمايدى.
"قازاقستان ماماندارىنىڭ قورتىندىسى ماسكەۋدەگى سوتتا نەمەسە رەسەيدىڭ باسقا قالالارىندا قارالعانىن كوردىڭىز بە؟ ونى ەشكىم قارامايدى. ويتكەنى ولار بىلەدى. بۇل – باسقا مەملەكەت. مۇنداي قورىتىندىنى بەرگەن مامانداردىڭ جاۋاپكەرشىلىگى ۇلكەن بولۋى كەرەك. ال بۇل جەردە ول كىسىلەردە جاۋاپكەرشىلىك بار دەپ ايتا المايمىن. تانىستىم دەپ جازعانىمەن، سول جاۋاپكەرشىلىكتى ولاردان ەشكىم سۇرامايدى.
مەن ەكىنشى تۋمانوۆ دەگەندى كورگەنمىن. اباي وبلىسىنداعى ءبىر جاعدايلارعا بايلانىستى قازاقساتانعا كەلگەن ەدى. ءبىراق سول كەزدە ول كىسىنىڭ جازعانىن ەشكىم قابىلدامادى، ءمان بەرمەدى. ويتكەنى زاڭسىزدىق دەپ تانىلدى"، - دەدى ساراپشى.
ەسكە سالايىق، بۇعان دەيىن ەكس-مينيستر قۋاندىق بيشىمبايەۆقا قاتىستى كەزەكتى سوت وتىرىسىندا سوت-مەديسينا ەكسپەرتى تاحير حاليمنازاروۆ نۇكەنوۆانىڭ ولىمىنە سەبەپ بولعان جاراقاتتاردى مانەكەندە كورسەتكەن بولاتىن.
تاحير حاليمنازاروۆتىڭ سوزىنشە، بۇل جاراقاتتار نۇكەنوۆانىڭ ءمايىتىن ساراپتاۋ ناتيجەسىندە انىقتالدى.
ياعني، العاشقى ساراپتامانى جۇرگىزگەن ساراپشىلار انىقتاعان. بۇل جاراقاتتار ساراپشىنىڭ قورىتىندىسىندا سيپاتتالعان.
ساراپشىنىڭ ايتۋىنشا، مۇنىڭ ءبارى جالپىلاما باس جاراقاتى بولىپ سانالادى. وعان بەتىندەگى جاراقاتتار دا، باس سۇيەگىندەگى جاراقاتتار دا جاتادى.
سوت مەديسيناسىندا بۇل جاراقاتتاردىڭ ءبارى سىرتقى اسەردىڭ كەسىرىنەن بولعان زاقىمدانۋ رەتىندە قاراستىرىلادى.
تاحير حاليمنازاروۆتىڭ سوزىنشە، ءولىمنىڭ سەبەبىن ايتقان كەزدە وسى جاراقاتتاردىڭ ءبارىن قاراستىرۋ كەرەك. ولاردىڭ ءارقايسىن بولەك قاراستىرۋعا بولمايدى.
ساراپشى قۇلاۋدان العان جاراقاتتار بولماعانىن ايتادى. ال بيشىمبايەۆ نۇكەنوۆا قابىرعاعا سوعىلىپ، ارتىنشا ۋنيتازعا قۇلاپ تۇسكەنىن ايتقان بولاتىن.
سونىمەن قاتار، سوت-مەديسينالىق ساراپشى سالتانات نۇكەنوۆانىڭ باسىنداعى سۋبدۋرالدى گەماتومانىڭ مولشەرى 230 گرامم بولعان. بۇل ولىمگە اكەلەدى.
تاحير حاليمنازاروۆتىڭ ايتۋىنشا، بيشىمبايەۆ ونى قولمەن ۇردى ما، الاقانمەن ۇردى ما - ماڭىزدى ەمەس. سەبەبى بۇل جاعدايدا ۇرعان ادامنىڭ سالماعى ايتارلىقتاي اسەر ەتەتىن كورىنەدى. سالماعى ءىرى ادام الاقانىمەن بولسا دا اۋىر جاراقاتتاۋى مۇمكىن.
بۇل جاعدايدان كەيىن بيشىمبايەۆقا قاتىستى كەزەكتى سوت وتىرىسىندا ايىپتالۋشىنىڭ ادۆوكاتتارى رەسەيلىك سوت-مەديسينالىق ساراپشىلارىنىڭ سالتاناتتىڭ ولىمىنە بايلانىستى شىعارعان شەشىمىن وقىعان بولاتىن.
الايدا سۋديا ايجان كۇلبايەۆا سالتانات نۇكەنوۆانىڭ ولىمىنە قاتىستى ماسكەۋلىك ماماندار جۇرگىزگەن ساراپتاما ناتيجەسىن ءىس ماتەريالدارىنا قوسۋ تۋرالى ءوتىنىشتى قاناعاتتاندىرمادى.
سۋديا قوسىمشا ساراپتاما جاسالاتىنى تۋرالى سوتقا، پروكۋرورلارعا ۋاقتىلى حابار بەرىلمەگەنىن جانە ساراپتاما زاڭدى بۇزا وتىرىپ جاسالعانىن ايتتى.
16 ساۋىردە وتكەن سوت وتىرىسىندا قۋاندىق بيشىمبايەۆتىڭ ادۆوكاتتارى رەسەيلىك مامانداردىڭ ساراپتاما ناتيجەسىن بىرنەشە ساعات بويى وقىپ شىققان بولاتىن. ساراپتامادا سالتانات نۇكەنوۆانىڭ ولىمىنە ول قايعىلى وقيعا بولاردان 3-4 اپتا بۇرىن العان جاراقاتى سەبەپ بولعانىن ايتىلعان ەدى. الايدا بۇل ساراپتاما قورىتىندىسى الماتىلىق ماماندار جاساعان ساراپتاما ناتيجەسىنە قايشى بولعان.
بيشىمبايەۆتىڭ قورعاۋشىلارى ماسكەۋلىك ماماندارمەن جەكە سوت مەديسينالىق ساراپتاما جاساتقان بولاتىن. الايدا ولاردىڭ بۇل باستاماسى تۋرالى قۇزىرلى ورگاندار بەيحابار بولعان. ساراپتاما قورىتىندىسى جالعان بولىپ شىققان جاعدايدا ساراپتاما جاساعان ماسكەۋلىك مامانداردى جاۋاپقا تارتۋ مۇمكىن ەمەس. بۇل تۋرالى پروكۋرور ايتقان بولاتىن. ونىڭ بۇل پىكىرىن جابىرلەنۋشى تاراپ تا قولداعان ەدى.
