مەملەكەت باسشىسى قاسىم-جومارت توقايەۆ كوكشەتاۋ، سەمەي جانە وسكەمەن قالالارىندا جوسپارلانعان ءۇش جىلۋ ەلەكتر ورتالىعىنىڭ قۇرىلىسى ۋاقىتىنان كەشىگىپ جاتقانىن مالىمدەدى، دەپ حابارلايدى Dalanews.kz.
اتالعان نىساندار باستاپقىدا رەسەيدىڭ قاتىسۋىمەن جۇزەگە اسىرىلۋى ءتيىس بولعان. الايدا كەيىن رەسەيلىك تاراپتا قارجىلاندىرۋ ماسەلەلەرى تۋىنداپ، سونىڭ سالدارىنان كوكشەتاۋداعى جەو قۇرىلىسى ۇلتتىق "سامۇرىق-ەنەرگو" كومپانياسىنىڭ قاراماعىنا بەرىلدى.
مەملەكەت باسشىسى بارلىق جوبالار ەكولوگيالىق تالاپتارعا ساي، "تازا كومىر" تەحنولوگيالارىن قولدانۋ ارقىلى جۇزەگە اسۋى قاجەت ەكەنىن اتاپ ءوتتى. پرەزيدەنتتىڭ ايتۋىنشا، كومىر قورى جەتكىلىكتى ءارى وندىرىستىك الەۋەتى جوعارى بولا تۇرا، قازاقستان ەلەكتر ەنەرگياسى بويىنشا سىرتقى يمپورتقا تاۋەلدى بولماۋى ءتيىس.
سونىمەن قاتار قاسىم-جومارت توقايەۆ ەلدە ەلەكتر ەنەرگياسىن ءوز كۇشىمەن ءوندىرۋدى دامىتۋ ۇلتتىق قاۋىپسىزدىكتى قامتاماسىز ەتۋدىڭ ماڭىزدى بولىگى ەكەنىن جەتكىزدى. ول قازاقستاننىڭ كومىر قورى مول ەكەنىن، جىل سايىنعى كومىر ءوندىرۋ كولەمى 110 ملن توننادان اساتىنىن ايتىپ، بۇل ستراتەگيالىق مۇمكىندىكتى ءتيىمدى پايدالانۋ قاجەت ەكەنىن اتاپ ءوتتى.
