اقتاۋ اۋەجايىندا ۇشاقتارعا تەحنيكالىق قىزمەت كورسەتۋ جانە جوندەۋ ورتالىعى اشىلادى. ول، نەگىزىنەن، قازاقستاننىڭ، رەسەيدىڭ جانە ورتالىق ازيا ەلدەرىنىڭ ازاماتتىق جانە اسكەري ۇشاقتارىنا قىزمەت كورسەتەتىن بولادى، دەپ جازادى Dalanews.kz.

بۇل تۋرالى 23 جەلتوقساندا ءماجىلىس وتىرىسىندا كولىك ءمينيسترى مارات قارابايەۆ ايتتى. ءمينيستردىڭ ايتۋىنشا، ۇشاقتاردى جوندەۋ-وقۋ بازاسىن YDA، Turkish Technic جانە ASFAT تۇرىك كومپانيالارى سالۋدى جوسپارلاپ وتىر.

"تەحنيكالىق قىزمەت كورسەتۋ ورتالىعى قازاقستاننىڭ، رەسەيدىڭ جانە ورتالىق ازيا ەلدەرىنىڭ ازاماتتىق جانە اسكەري ۇشاقتارىنا قىزمەت كورسەتەتىن بولادى. ءبىزدىڭ مەملەكەتىمىزدىڭ، رف، وزبەكستان، تۇرىكمەنستان، قىرعىزستان جانە تاجىكستاننىڭ ازاماتتىق اۆياسيا سالاسىنداعى 411  ۇشاعىن قوسا العاندا"، — دەپ اتاپ ءوتتى مينيستر.

قارابايەۆتىڭ پىكىرىنشە، اقتاۋ اۋەجايى - پەرسپەكتيۆالى مۋلتيمودالدى اۆياسيالىق حاب.

"ونىڭ باستى ارتىقشىلىعى - كولىكتىڭ بارلىق تۇرلەرىنە قولجەتىمدىلىگى جانە ەۋروپاعا جاقىن بولۋى، ياعني نەبارى 3 ساعاتتىق ۇشۋ"، — دەپ ەسكە سالدى مينيستر.

جاڭعىرتۋ ناتيجەسىندە اۋەجايدىڭ جۇك تاسىمالداۋ قۋاتى جىلىنا 200 مىڭ تونناعا دەيىن ۇلعايادى، ال جىلدىق اينالىمى 520 ميلليارد تەڭگەنى قۇرايدى، دەپ سەندىرەدى قارابايەۆ.

ايتا كەتسەك، 2024 جىلدىڭ ءساۋىر ايىندا ۇكىمەت باسشىسى ولجاس بەكتەنوۆ تۇركيا پرەزيدەنتى رەجەپ ەردوعانمەن كەزدەستى. كەزدەسۋگە YDA Holding قۇرىلىس كومپانيالارى توبىنىڭ باسقارما ءتوراعاسى حۋسەين ارسلانم دا قاتىسقان بولاتىن. كەزدەسۋدە قازاق-تۇرىك بىرلەسكەن جوبالارى تالقىلاندى. بۇعان دەيىن YDA كومپانياسى تۇركىستانداعى حالىقارالىق اۋەجايدى سالعان بولاتىن.