"پۋتين ۋكراينانى جويۋ جولىنا ءتۇستى. ءبىراق ول ءوز ەلىنىڭ بولاشاعىن جوياتىن بولادى"، – ەۋروكوميسسيا ءتوراعاسى.
شەكتەلگەن بانكتەردىڭ ناقتى ءتىزىمى كەلتىرىلگەن جوق. الايدا سانكسيا ءقازىر الفا-بانك، ۆەب، ۆتب، "پرومسۆيازبانك، "وتكرىتيا"، "روسسيا"، "روسسەلحوزبانك"، مكب، "سوۆكومبانككە" جانە اننەكسيالانعان قىرىمدا جۇمىس ىستەيتىن بىرنەشە كرەديت ۇيىمدارىنا سالىنعانى بەلگىلى بولىپ وتىر.
"قاجەت بولسا رەسەيدىڭ وزگە بانكتەرى دە SWIFT جۇيەسىنەن اجىراتىلادى" دەدى گەرمانيا ۇكىمەتىنىڭ رەسمي وكىلى شتەففەن حەبەشترايت.
"وسىلايشا بۇل ينستيتۋتتار حالىقارالىق قارجى اعىنىنان وقشاۋلانىپ، اۋقىمدى ارەكەت جاساۋ مۇمكىندىكتەرى شەكتەلەدى"،- دەدى حەبەشترايت.
اق ءۇي سايتىنداعى مالىمدەمە "رەسەيدىڭ بىرنەشە بانكىنىڭ SWIFT جۇيەسىنەن اجىراتىلۋى سانكسيانى قاتايتۋدىڭ جالعىز جولى ەمەس" دەيدى. رەسەي ۇكىمەتىمەن قاتىسى بار بيزنەسمەندەردىڭ ينۆەستيسيا سالعانىنا ايىرباس رەتىندە باتىس ەلدەرىنەن ازاماتتىق الۋىن دا قيىنداتۋعا كەلىسكەن. بارلىق تاراپ رەسەيدىڭ ورتالىق بانكىنە قارسى سانكسيانى كۇشەيتە تۇسۋگە ۋاعدالاسقان.
رەسەيدىڭ ورتالىق بانكىنىڭ 640 ميلليارد دوللار رەزەرۆىنىڭ باسىم بولىگى نيۋ-يورك، لوندون جانە فرانكفۋرت قالالارىندا ساقتاۋلى تۇر.
رەسەي ورتالىق بانكىنىڭ رەزەرۆتەگى اقشاسىنا قولى جەتپەۋى ورتالىق بانكتى رۋبل باعامىن ۇستاپ تۇرۋ مۇمكىندىگىنەن ايىرادى.
مۇنان وزگە باتىس مەملەكەتتەرى ءوز ەلدەرىندەگى رەسەيلىكتەردىڭ اكتيۆتەرىن ىزدەستىرىپ، انىقتاۋمەن شۇعىلداناتىن جەدەل توپ قۇردى. كەلىسىم جاساسقان ەلدەر رەسەي بيلىگىنىڭ ماڭىندا جۇرگەن، سانكسيا سالىنۋعا ءتيىس لاۋازىمدى ادامدار مەن ولاردىڭ وتباسىلارىنىڭ ءتىزىمىن مەيلىنشە كوبەيتە ءتۇسۋدى جوسپارلاپ وتىر.
SWIFT – تولەم جۇيەسى ەمەس. ونى بۇكىل الەمنىڭ بانكتەرى اقشا اۋدارىمى تۋرالى شەشىم الماساتان، كەلىسىمدەردى راستايتىن، قارجى قۇجاتتتارىن جىبەرىپ، قابىلدايتىن ارناۋلى مەسسەندجەر دەۋگە بولادى.
SWIFT جۇيەسىن الەمنىڭ 11 مىڭنان استام قارجى ۇيىمى پايدالانادى.
