بالكىم قاۋەسەت، بالكىم شىندىق. كىم بىلگەن...ءبىز دە بىلمەيمىز. ءبىراق سوڭعى كەزدەرى جوعارى جاقتا «راحات الييەۆ ولگەن جوق. ول – ءتىرى» دەگەن اڭگىمەلەر ايتىلىپ ءجۇر دەيدى جانە كۇن وتكەن سايىن كۇش الىپ بارا جاتقانعا ۇقسايدى-مىس. ءبىراق، بۇعان قانداي نەگىز بار؟
ونىڭ ولىمىنە قاتىستى شەتەلدىك بەلدى باسىلىمنىڭ ءبىرى بۇدان بۇرىن: «ەگەردە بۇل شىن بولسا، راحات الييەۆتى تۋعان جەرى – قازاقستاندا جەرلەيدى، ال وتىرىك بولسا، ونىڭ دەنەسى اۆستريادا قالادى» دەپ جازعان ەدى.
بىلەتىن بولساڭىزدار الييەۆ ۆەناداعى قۇرمەتتى ازاماتتارعا ارنالعان ەسكى حريستيان زيراتىندا جەر قوينىنا تاپسىرىلعان-تۇعىن...
قايتالاپ ايتايىق، ءبىز ونىڭ ءولى-تىرىسىن بىلمەيمىز. ونى «ءتىرى»دەپ تۇجىرىمداپ وتىرعانىمىز جوق. بىلەرىمىز «بيلىكتە، جوعارى جاقتا ءدال وسىنداي اڭگىمەلەر ايتىلۋدا» دەيدى گازەتىمىزگە ءاتى-جونىن ايتپاۋدى وتىنگەن انونيم.
بۇدان بۇرىن عالامتوردا (ونىڭ ىشىندە Yوutube ۆيدەوحوستينگىندە. – اۆت.) «راحات الييەۆ ءتىرى مە؟» دەگەن ۆيدەو جاريالانعان بولاتىن. ونى كىمنىڭ جانە قانداي ماقساتپەن دايىنداعانى بەلگىسىز. ايتەۋىر استارى بەلگىلى. الييەۆ ءتىرى دەگەندى ايتقىسى كەلگەندەي. وسى ۆيدەودا راحاتقا قاتىستى پىكىر بىلدىرگەن اۆستريالىق ساياساتتانۋشى ميكاەل لاۋبشتىڭ ايتۋىنشا، الييەۆ اتالعان جەردەگى ءقابىردى كوزى تىرىسىندە ساتىپ الىپ قويعان.
باتىستاعى اقپارات قۇرالدارى مۇنىڭ بارىنە سەنبەستىكپەن قارايدى.
«الييەۆ كوزى تىرىسىندە بۇل ورىندى شىنىمەن دە ساتىپ العان شىعار، ءبىراق قابىردەگى بەلگىتاسقا قۇران ەمەس، لاتىن تىلىندەگى سوزدەردىڭ جازىلۋى قىزىق...كۇماندى. جالپى ونىڭ ولىمىنە قاتىستى باسى اشىلماعان تۇماندى دۇنيەلەر جەتىپ ارتىلادى» دەيدى باتىس باسىلىمدارى.
– بۇل اراعا كەلەتىندەر جانە راحات الييەۆتىڭ باستان كەشكەنىن شەت جاعالاي بولسا دا بىلەتىندەر ونىڭ جاتقان جەرىن كورگەندە مىرس ەتىپ كۇلۋى مۇمكىن. ولار ءۇشىن مۇنىڭ ءبارى انشەيىن كيچ (حالتۋرا). مەنىڭشە، مۇنىڭ ءبارىن ەۋروپاعا كورسەتۋ ءۇشىن ەمەس، ەڭ الدىمەن قازاقستان ءۇشىن جاساعان سياقتى، ياعني، قازاقستان تۇرعىندارىنىڭ كوزىن جەتكىزۋ، سەندىرۋ ءۇشىن، – دەپتى لاۋبشتىڭ ءوزى.
رەسمي تۇردە ول – ولگەن، ونىڭ نەدەن ولگەنى، قالاي ولگەنى بايان ەتىلگەن جانە ءبىزدىڭ بۇعان باسقا الىپ قوسارىمىز جوق.
بىزگە قىزىقتىسى: «بيلىكتىڭ ءوز ىشىندە وسىنداي اڭگىمەلەردىڭ ايتىلىپ جۇرگەنى شىنىمەن دە راس بولسا، مۇنىڭ ءبارىن ەلگە تاراتۋ كىمگە ءتيىمدى جانە بۇعان كىم مۇددەلى؟».
راحات الييەۆتىڭ اكەسىنە جازعان حاتىندا قانداي سىر بار؟
راحاتتىڭ اكەسى مۇحتار الييەۆكە جازعان حاتىنا اركىم ءارتۇرلى باعا بەرەدى. بۇل حاتتى راحات ولەرىنەن ءبىر كۇن بۇرىن جازعان. بىرەۋلەر «حاتقا قاراساق، ونىڭ وز-وزىنە قول جۇمساعانى كۇماندى. بۇل حات الدىنا ماقسات قويعان ادامنىڭ حاتىنا كوبىرەك ۇقسايدى» دەگەن بولاتىن.
بۇعان دا بارا بەرە المايمىز. ءبىراق، بالاسىنىڭ اكەسىنە جازعان حاتىن تاعى دا ءبىر قايتالاپ بەرگەندى ءجون كوردىك.
راحات الييەۆتىڭ ولەرىنەن ءبىر كۇن بۇرىن اكەسىنە جازعان حاتى
– اكە، سەن قايتتى دەگەن حابار مەنىڭ قابىرعامدى قايىستىردى. مۇندا، ۆەنانىڭ تەرگەۋ يزولياتورىنا حابار كەش جەتەدى. ءازىر سىزگە ارناپ ءبىر اۋىز ءسوز ايتۋ ماعان اۋىر. سەبەبى، ەكەۋمىزدىڭ ارامىزدا كوپ نارسە ايتىلماي، جاسىرىن قالدى.
سەن ماعان ءارقاشان ۇلگى بولاتىن ەدىڭ. سەنىڭ ءىزىڭدى قۋىپ، مەن دە سەن سەكىلدى مەديسينا سالاسىندا ءبىلىم الدىم. دارىگەر-حيرۋرگ بولدىم. اكە، سەن قىزىلوردانىڭ قۇمدى بورانىندا، جوقشىلىقتا، ءومىردىڭ تاۋقىمەتىن تارتىپ ءوستىڭ. ءبىراق، سوعان قاراماي، مەديسينانىڭ ۇلكەن شىڭىنا جەتتىڭ. بۇل، بىرىنشىدەن، سەنىڭ قايتپاس قاجىرلىعىڭنىڭ ارقاسى ەدى. سونان سوڭ، ق ر مەديسيناسىن ءوز قولىڭا الدىڭ، باسقاردىڭ. ماعان ءبىر جاعىنان قيىن، ەكىنشى جاعىنان وڭاي بولدى. سەنىڭ تانىمالدىلىعىڭنىڭ ارقاسىندا مەن دە بيلىككە كەلدىم.
[caption id="attachment_12433" align="alignright" width="385"]
ۆەناداعى تەرگەۋ يزولياتورى[/caption]
سەن «كومەككە مۇقتاج پاسيەنتكە قولىڭنان كەلگەنشە كومەك بەرۋ – مەنىڭ پارىزىم» دەۋشى ەدىڭ. مۇقتاجدارعا بولىسۋ، كومەك بەرۋ – سەنىڭ ەل سۇيگەن قاسيەتتەرىڭنىڭ ءبىرى ەدى. ءبىز وتباسىمىزدا، وسى سەنىڭ كەڭ جۇرەگىڭ قانشاعا جەتەر ەكەن دەپ الاڭداۋشى ەدىك. ءبىراق، بۇل سەنىڭ تاڭداۋىڭ ەكەنىن مەن جاقسى ءتۇسىندىم. سەن مەديسيناداعى الييەۆتەردىڭ ديناستياسىن قۇردىڭ. سەنىڭ شاكىرتتەرىڭ قازاقستاننىڭ شارتارابىندا، ولار ەندى وزدەرى دوكتور، كانديدات جانە مىقتى حيرۋرگتەر تاربيەلەۋدە.
مەن ۇقق باسقارۋعا تاعايىنداعان كەزدە سەنىڭ رەاكسياڭدى ءالى ۇمىتقان جوقپىن.
سەن: «قولىڭدى بىلعاما!» دەپ ەدىڭ. سونداي-اق، «ۇقق، ۇقق – بۇل وتە لاس ساياسات»دەۋشى ەدىڭ. سوندا سەن: «سەن ەش نارسەنى وزگەرتە المايسىڭ. ۇقق – بۇل مەملەكەتتىك بيلىككە پاراللەلدى-بيلىك جانە ول ءارقاشان لاس نارسەلەرمەن اينالىسادى» دەپ ەدىڭ.
مەن ۇقق-دا ىستەگەنىمنىڭ ءبىر عانا قايىرى بولسا، ول ۇقق ارحيۆىنەن اتام تۋرالى دەرەكتەردى تاپقانىم بولدى. ءتىپتى، ارحيۆتەردىڭ اراسىندا اتامنىڭ سۋرەتى دە بولعان ەدى.
1985-1987 جج. ونىڭ باسىنا كۇن تۋعان كەزدە ونىڭ جانىندا ەشكىم قالماعان ەدى. سوندا، سەن، ۆلاديمەر ني جانە سىزدىق ابىشيەۆ قانا بولعان ەدىڭدەر. سوندا سەن ءوز ەركىڭمەن مينيسترلىك ورىندى بوساتىپ، وتستاۆكاعا كەتتىڭ. سەنىڭ بۇل ورىندى بوساتۋىڭنىڭ باستى سەبەبى، ونى تىعىرىقتان شىعارۋ ەدى. ساعان بيلىك، مانساپ ەشقاشان قىزىق ەمەس ەدى. سەن «دارىگەر رەتىندە مەن حالىققا كەرەكپىن» دەدىڭ.
ءبىزدىڭ وتباسىمىزعا كوڭىل ايتقان حاتىندا ەكى ءتۇرلى وي بىلدىرگەن. وعان راحمەت. ەڭ قۇرىعاندا مەنىڭ بالالارىم، سەنىڭ نەمەرەلەرىڭە سەنىڭ جەرلەۋ راسىمىڭە قاتىسۋعا رۇقسات بەردى.
ول بۇل دۇنيەدە ەشكىمنىڭ ماڭگى ەمەس ەكەنىن تۇسىنسە كەرەك.
ماعان (سەنىڭ جالعىز ۇلىڭا) ءقازىر وتە قيىن. سەنىڭ الدىڭداعى پەرزەنتتىك پارىزىمدى وتەي الماعانىما قينالام. ءبىراق، بۇل ۋاقىت كەلەتىنىنە مەن سەنەم.
راحات مۇحتار ۇلى الييەۆ
P.S. مەن بارلىق تۋعان-تۋىس، دوس، باۋىرلار مەن جاقىندارىما راحمەت ايتام. سونىمەن قاتار، اكەمنىڭ جەرلەۋ راسىمىنە قاتىسقان بارلىق تانىستارى مەن شاكىرتتەرىنە ريزاشىلىعىمدى بىلدىرگىم كەلەدى. اكەم تۋرالى ەستەلىكتەر سىزدەردىڭ كوڭىلدەرىڭىزدەن سۋىمايىنشا، اكەم ماڭگى جاسايتىن بولادى.
دايىنداعان، دۋمان بىقاي
