ۆلاديمير زەلەنسكيي ۋكراينا حالقىنا ارنالعان 10 مينۋتتىق ۇندەۋ جازىپ، اقش ۇسىنعان سوعىستى اياقتاۋ جونىندەگى بەيبىت جوسپارى جونىندە پىكىر ءبىلدىردى. ول ەلدىڭ اۋىر كەزەڭدى باستان وتكەرىپ جاتقانىن اتاپ ءوتتى دەپ حابارلايدى Dalanews.kz.
ۆلاديمير زەلەنسكييدىڭ ۋكراينا حالقىنا ارنالعان 10 مينۋتتىق ۇندەۋى ەل پرەزيدەنتىنىڭ بارلىق الەۋمەتتىك جەلىلەرىندە جاريالاندى. زەلەنسكيي ۋكراين تىلىندە سويلەگەن. باق-تا زەلەنسكيي ايتقان سوزدەرىنىڭ ورىسشا اۋدارماسى پايدا بولدى. زەلەنسكيي ۋكراينا ءۇشىن كەلەسى اپتانىڭ «قيىن بولاتىنىن» ايتتى.
«ءقازىر ۋكراينا وتە قيىن تاڭداۋ الدىندا بولۋى مۇمكىن: نەمەسە ابىرويدان ايىرىلۋ، نەمەسە نەگىزگى سەرىكتەسىنەن ايىرىلۋ ءقاۋپى، نەمەسە 28 كۇردەلى تارماق، نەمەسە اسا اۋىر قىس، ەڭ قيىن قىس جانە ودان كەيىنگى تاۋەكەلدەر»، – دەپ اتاپ ءوتتى زەلەنسكيي.
ول سونداي-اق ۋكراينا داۋىستاپ مالىمدەمەلەر جاسامايتىنىن، كەرىسىنشە «اقش پەن بارلىق سەرىكتەستەرمەن تىنىش جۇمىسىن جالعاستىرا بەرەتىنىن» حابارلادى.
«مەن جوسپارداعى بارلىق تارماقتاردىڭ ىشىندە ەڭ بولماعاندا ەكى تارماقتىڭ وتكىزىپ جىبەرىلمەۋى ءۇشىن كۇرەسەمىن. بۇل – ۋكراينداردىڭ ابىرويى مەن بوستاندىعى، ويتكەنى بارلىعى وسىعان نەگىزدەلەدى. ءبىزدىڭ تاۋەلسىزدىگىمىز، ەگەمەندىگىمىز، جەرىمىز، حالقىمىز جانە ۋكراين بولاشاعى»، – دەدى ول.
