اقتوبە وبلىسىنىڭ جارلى اۋىلىندا قۇدىقتا 9 جاستاعى قىز مەن 38 جاستاعى ەر ادام قازا تاپتى،- دەپ حابارلايدى Dalanews.kz
9 جاستاعى قىز جەكە ءۇيدىڭ اۋلاسىنداعى تەرەڭدىگى 10 مەتر قۇدىققا قۇلاپ كەتكەن. قۇدىق قاراۋسىز قالعان، ىشىنە قوقىس تولىپ قالعان.
ەر ادام بالانى قۇتقارۋعا تىرىسىپ، ارتىنان تۇسكەن. الايدا ول سىرتقا شىعا الماعان.
"قۇتقارۋشىلاردىڭ كومەگىمەن بالا مەن ەرەسەك ادام قۇدىقتان ەس-تۇسسىز كۇيدە شىعارىلدى. اۋداندىق توتەنشە جاعدايلار قىزمەتىنىڭ قىزمەتكەرلەرى شۇعىل تۇردە العاشقى مەديسينالىق كومەك كورسەتتى. وكىنىشكە قاراي، ەكەۋى دە قايتىس بولدى"، – دەدى اقتوبە وبلىسىنىڭ توتەنشە جاعدايلار دەپارتامەنتىنىڭ وكىلى.
مارقۇم ەر ادامنىڭ بايعانين بالالار-جاسوسپىرىمدەر سپورت مەكتەبىنىڭ ەركىن كۇرەس جاتتىقتىرۋشىسى، التى بالانىڭ اكەسى نۇربول بەردىعالييەۆ ەكەنى بەلگىلى بولدى.
"نۇربول بەردىعالييەۆ 2017 جىلدان بەرى جارلى اۋىلىندا تۇرىپ، جۇمىس ىستەپ كەلدى. ول رەسپۋبليكالىق جانە وبلىستىق تۋرنيرلەردىڭ 40-قا جۋىق جەڭىمپازى مەن جۇلدەگەرىن دايىندادى. 20 شاكىرتى سپورت شەبەرلىگىنە ۇمىتكەر اتاعىن الدى. ارتىندا التى بالاسى قالدى"، – دەدى اقتوبە وبلىسى اكىمدىگىنىڭ باسپا ءسوز حاتشىسى گۇلباعدا كوبەيەۆا.
الدىن الا بولجام بويىنشا، ەر ادامنىڭ ولىمىنە ۋلى گازدان ۋلانۋ سەبەپ بولعان.
