قۇرىلىسشىلار كۇنى مەرەكەسىنە وراي جەتىساي اۋدانىنىڭ اكىمى جامانتاي بەيسەنبايەۆ وسى سالادا ەڭبەك ەتىپ جۇرگەن ءبىر توپ ازاماتقا  العىس حات تابىس ەتىپ، سىي-سياپات جاسادى. سالتاناتتى جيىنعا اۋدانىمىزدىڭ ارداگەر قۇرلىسشىلارى مەن ساۋلەت جانە قالا قۇرىلىسى سالاسىندا ايانباي ەڭبەك ەتىپ جۇرگەن سالا قىزمەتكەرلەرى قاتىستى.

جيىندا ءسوز العان ءوڭىر باسشىسى اۋدانىمىزدىڭ ەكونوميكاسى مەن الەۋمەتتىك دەڭگەيىنىڭ كوتەرىلۋىن قۇرىلىستىڭ قارقىن العانىنان بايقاۋعا بولاتىندىعىنا توقتالدى.

– قۇرىلىستىڭ قارقىندى ءجۇرۋى مەملەكەتتىڭ ەكونوميكاسىن، الەۋمەتتىك دەڭگەيىن كورسەتەدى. بۇل سالانىڭ ماماندارى قاشاندا ىزدەنىستە جۇرەدى. سىزدەر  سالعان عيمارات، نىسانداردىڭ يگىلىگىن جۇرت كورۋدە.  ءبىزدىڭ اۋدانىمىزدا دا ءبىلىم، مادەنيەت، دەنساۋلىق ساقتاۋ، تۇرعىن ءۇي، جول جانە كوممۋنالدىق سالالاردا اعىمداعى جانە كۇردەلى قۇرىلىس جۇمىستارى ءجۇرىپ جاتىر. بۇلاردىڭ بارلىعى – اۋدانداعى قۇرىش قولدى قۇرىلىسشىلاردىڭ ەرەن ەڭبەكتەرىنىڭ ارقاسى، – دەدى جامانتاي قاناي ۇلى.

سوڭعى جىلدارى اۋدانىمىزدا كوپتەگەن نىساندار بوي كوتەرۋدە. سونىڭ ارقاسىندا جىل سايىن ەل يگiلiگiنە پايدالانۋعا بەرiلگەن جاڭا عيماراتتار سانى دا ارتىپ كەلەدi. وسى جۇمىستاردىڭ جۇزەگە اسىرىلۋىندا قۇرىلىسشىلاردىڭ ورنى مەن ماڭىزى ەرەكشە ەكەنى ءسوزسىز.

جيىن بارىسىندا  ءبىرقاتار ازامات اۋدان اكىمىنىڭ العىس حاتىمەن ماراپاتتالدى. سونداي-اق، شارا بارىسىندا  جەتىسايلىق قۇرىلىس كومپانياسى «نۇرلى-ل-جەتىساي» جشس-نە  ۇلتتىق بيزنەس رەيتينگى جونىندەگى رەسپۋبليكالىق بايقاۋدىڭ قورتىندىسىمەن «جىل كوشباسشىسى» نوميناسياسى تابىس ەتىلدى. اتالعان مەكەمە باسشىسى مۇرات امىربەكۇلىنا ۇزدىك سالا باسشىسى رەتىندە «جىلدىڭ ۇزدىك كوشباسشىسى» سەرتيفيكاتى قوسا بەرىلدى.

بۇدان بولەك، اتالعان مەكەمەنىڭ باس ەسەپشىسى كيم انيتاعا  قارجى جانە اۋديت سالاسى بويىنشا «جىل كوشباسشىسى»، مەكەمە باسشىسى مۇرات امىربەكۇلىنا «جىل كاسىپقويى»، باس ينجەنەر نۇرماحان تۇرعىنوۆقا، وندىرىستىك- تەحنيكالىق ءبولىم باستىعى مۇحتار احمەتوۆكە  «ەڭبەك سىڭىرگەن قۇرىلىسشى» توسبەلگىلەرى تاعىلدى. مەرەكەلىك شارا سوڭى كونسەرتتىك باعدارلاماعا ۇلاستى.

جەتىساي اۋدانى اكىمىنىڭ باسپا ءسوز قىزمەتى