اقمولا وبلىسىندا كاداسترلىق قۇنى 53،4 ملن تەڭگە بولاتىن جەر ۋچاسكەسى مەملەكەت مەنشىگىنە قايتارىلدى، – دەپ حابارلايدى Dalanews.kz.
بۋراباي اۋدانى پروكۋراتۋراسىنىڭ باستاماسىمەن جەر رەسۋرستارىن باسقارۋ دەپارتامەنتى "كيپروس" ءجشس-نىڭ پايدالانۋىنداعى جەر ۋچاسكەسىنە يەلىك ەتۋ زاڭدىلىعىنا تەكسەرىس جۇرگىزدى. تەكسەرىس بارىسىندا سەرىكتەستىك 2012 جىلدان بەرى ششۋچە كولى جاعالاۋىندا ورنالاسقان 3 گەكتار جەر ۋچاسكەسىن يەلەنىپ كەلگەنى انىقتالدى.
"جەر زاڭناماسىنىڭ تالاپتارىن بۇزا وتىرىپ، 10 جىلدان اسا ۋاقىت بويى جەر ۋچاسكەسى يگەرىلمەگەن، قۇرىلىس جۇمىستارى باستالماعان. 2023 جىلى جەر پايدالانۋشىعا ۋچاسكەنى يگەرۋ تۋرالى مىندەتتى نۇسقاما بەرىلگەن، الايدا 2024 جىلى ەشقانداي شارالار قابىلدانباعان. تەكسەرۋ ناتيجەلەرى بويىنشا دەپارتامەنت سوتقا جۇگىندى"، - دەپ جازىلعان حابارلامادا.
مامانداندىرىلعان اۋدانارالىق ەكونوميكالىق سوتتىڭ شەشىمىمەن كاداسترلىق قۇنى 53،4 ملن تەڭگە بولاتىن جەر ۋچاسكەسى مەملەكەت مەنشىگىنە ءوتتى.
