استانادا ۇلىنىڭ ەمىنە قاراجات جيناۋ ءۇشىن كەڭ كولەمدى جارناما ناۋقانىن ۇيىمداستىرعان ەرلى-زايىپتىعا قاتىستى الاياقتىق دەرەگى بويىنشا تەرگەپ-تەكسەرۋ اياقتالدى،- دەپ حابارلايدى Dalanews.kz.
بالانىڭ بەينەروليكتەرى، اسەرلى جازبالار Instagram جانە Facebook جەلىلەرى ارقىلى مىڭداعان قازاقستاندىقتىڭ جۇرەگىنە اسەر ەتكەن.
"ازاماتتاردىڭ سەنىمى مەن جاناشىرلىعىن پايدالانا وتىرىپ، كۇدىكتىلەر 1،3 ملرد تەڭگەدەن اسا قاراجات جيناعان. الايدا بالانىڭ ەمىنە تەك 6،4 ميلليون تەڭگە جۇمسالعان. قالعان قاراجاتتى ەرلى-زايىپتى جەكە قاجەتتىلىكتەرىنە پايدالانعان. ەلوردادان 3 پاتەر، جەر تەلىمى، 5 كولىك ساتىپ العان. سونىمەن قاتار، قاراجاتتىڭ ءبىر بولىگى قۇمار ويىندارىنا جۇمسالعان. قايىرىمدىلىق قارجىسىن تۇراقتى تۇردە الىپ وتىرۋ ءۇشىن ولار كەلىپ تۇسكەن قاراجاتتىڭ ۇشتەن ءبىر بولىگىن (481 ميلليون تەڭگەدەن اسا) الەۋمەتتىك جەلىدەگى پاراقشالارىن جارنامالاۋعا باعىتتاعان. Meta Ads ارقىلى جۇرگىزىلگەن جارناما اۋديتوريانى ەداۋىر كەڭەيتىپ، قايىرىمدىلىق كولەمىن ارتتىرۋعا مۇمكىندىك بەرگەن"، - دەپ جازىلعان حابارلامادا.
كۇدىكتىلەر تۇركياداعى LIV Hospital كلينيكاسىندا 84 ميلليون تەڭگە تۇراتىن وتا جاساتامىز دەگەن جەلەۋدى دە پايدالانعان.
"قاجەت سوما جينالعانىمەن، شەتەلدە وتا جاسالماعان. كەرىسىنشە ولار Instagram پاراقشاسىندا اۋەجايدان "ۇشىپ بارا جاتقان" كورىنىستى بەينەلەيتىن روليك جاريالاپ، "وتا ءساتتى ءوتتى" دەگەن جالعان اقپاراتپەن جازبا سالعان"، - دەپ جازىلعان حابارلامادا.
مالىمەتكە سۇيەنسەك، سوتالدى تەرگەپ-تەكسەرۋ باستالعانىن بىلگەن ولار مۇلكىن جاسىرۋ ماقساتىندا جەر تەلىمىن ءۇشىنشى تۇلعانىڭ اتىنا راسىمدەگەن.
"الايدا تەرگەۋ بۇل مامىلە جالعان ەكەنىن دالەلدەدى. سوت سانكسياسىمەن قىلمىستىق جولمەن الىنعان مۇلىكتىڭ بارلىعىنا تىيىم سالىندى. كۇدىكتىلەرگە بۇلتارتپاۋ شاراسى رەتىندە ءۇيقاماق ءتۇرى تاڭدالدى"، - دەپ جازىلعان حابارلامادا.
ءقازىر قىلمىستىق ءىس سوتتا قارالىپ جاتىر.
