اتىراۋ وبلىسى قۇلسارى قالاسىندا جوعالعان اكەسى مەن بالاسى ءولى تابىلدى، - دەپ حابارلايدى Dalanews.kz.

14 ساۋىردە تاڭعى ساعات 9 شاماسىندا تجد كۇشتەرىمەن جانە تۇرعىنداردىڭ كومەگىمەن ەر ادامنىڭ دەنەسى تابىلدى. ارتىنشا ساعات 13:40-تا تجد كۇشتەرىمەن 2000 جىلى تۋعان جىگىتتىڭ دەنەسى ءوز تۇرعىن ۇيىنەن 1 شاقىرىم قاشىقتا 1.5 مەتر تەرەڭدىكتە سۋ استىنان تابىلدى.

اتىراۋ وبلىستىق تجد مالىمەتىنشە، 6 ساۋىردە ساعات 17:52-دە قۇلسارى قالاسى 4-شاعىناۋدان اۆتودوروجنيك كوشەسى Grand Hall مەيرامحاناسىنىڭ قاسىندا ورنالاسقان سۋ باسقان ءۇيىن قاراۋعا 1976 جىلى تۋعان ازامات پەن ونىڭ 2000 جىلى تۋعان ۇلى بارعانى، الايدا ولاردىڭ سول ۋاقىتتان بەرى حابارسىز كەتكەنى جونىندە حابارلاما تۇسكەن.

حابارلاما تۇسكەن بويدا قۇتشارۋشىلار مەكەن-جايعا بارعان. ءۇيدىڭ ەسىگى پەنامەن بەكىتىلگەنى انىقتالعان.

"بۇل شاقىرتۋ بويىنشا 6 ساۋىردە ساعات 20:57-دە قۇتقارۋشىلار، 5 قايىق، 1 تەحنيكا (ترەكول) جۇمىلدىرىلىپ، تاۋلىك بويى ىزدەدى"، - دەپ جازىلعان ۆەدومستۆو حابارلاماسىندا.

ۆەدومستۆو مالىمەتىنشە، قۇلسارى قالاسىندا 6 ساۋىردە سۋ باسۋ سالدارىنان شاقىرتۋلار كوپ تۇسكەن.

جىلىوي اۋدانىندا توتەنشە جاعداي جاريالانعان ۋاقىتتان 7 ساۋىرگە دەيىن 26 467 تۇرعىن، ونىڭ ىشىندە 5976 بالا ەۆاكۋاسيالانعان.