ۇلەسكەرلەر داۋىنا نۇكتە قوياتىن كەز كەلدى. ونەركاسىپ جانە قۇرىلىس ءمينيسترى قانات شارلاپايەۆ ەش قۇجاتسىز قۇرىلىس باسىندا وڭدى-سولدى جۇرگەن كومپانيالارمەن كۇرەس باستالعانىن مالىمدەدى، - دەپ حابارلايدى Dalanews.kz "كتك" ارناسىنا سىلتەپ.
"نارىقتا الاياق وتە كوپ. بۇنى ءبارىمىز مويىنداۋىمىز كەرەك. ءقازىر ءتيىستى زاڭ جوباسىنا تۇزەتۋلەر ەنگىزدىك. قاراپايىم حالىققا ايتارىم: قازاقستان ءتۇرعىن-ۇي كومپانياسى كەپىلدىك بەرگەن قۇرىلىس كومپانيالارىنىڭ كومەگىنە جۇگىنگەن ءجون. تەك سول تىزىمدە بار كومپانيادان ءۇي الۋ كەرەك"، - دەدى ول.
جاۋاپتى سالا باسشىسى اقىسىن تولەگەن باسپاناسىنا اي ەمەس، جىلداپ جەتە الماي جۇرگەن قازاقستاندىقتارعا قۇزىرلى ورگانعا بىردەن شاعىمدانۋعا كەڭەس بەردى. سەبەبى زاڭ قاراپايىم ازاماتتار جاعىندا.
ال سوت پەن پروكۋراتۋرا سەلقوس بولسا، مينيستر «جەكە قابىلداۋىما جازىلىپ، بازىناڭىزدى وزىمە ايتىڭىز» دەدى. دەگەنمەن ساقتىقتا قورلىق جوق. سوندىقتان ۆەدومستۆو باسشىسىنىڭ ايتۋىنشا، قانداي دا ءبىر قۇرىلىسقا قاراجات قۇيماستان بۇرىن كومپانيانىڭ تاريحىنا ءۇڭىلىپ، ءبىر ءسات بۇعان دەيىنگى ءۇي ساپاسىن زەرتتەگەنى ءجون.
ايتا كەتەيىك، ۇلەسكەرلەر ماسەلەسى استانا مەن الماتىدا بەس جىلدان بەرى ءورشىپ تۇر.
