شارا بارىسىندا قوناعىمىزعا ءتۇرلى سۇراقتار قويىلىپ، سىرلى اڭگىمە ءوربىپ، اۋەزدى ءان دە شىرقالدى. سونىمەن قاتار گاۋحار حانىم وزىمەن بىرگە بىرنەشە قۋىرشاقتاردى دا الا كەلگەن ەكەن، سول قۋىرشاقتاردىڭ ءبيىن تاماشالادىق، شارا ينستاگرام جەلىسىندە تىكەلەي ەفيردە وتكەندىكتەن ينستا وقىرماندارىمىزدان كوپتەگەن سۇراقتار قويىلىپ جاۋاپ بەرىلدى.
«الاقاي» قۋىرشاق تەاترىنىڭ قىزمەتكەرلەرى قالا مادەنيەتىنىڭ اقساماۋىنا، ەل مادەنيەتىءنىڭ وركەندەۋىنە وزىندىك ۇلەس قوسىپ ءجۇرگەنىنە كۋا جەڭىستى كۇندەر كۇنتىزبەسى بار. ۇجىم مۇشەلەرىنىڭ جىل ون ەكى اي اتقارعان تىنىمسىز ەڭبەكتەرى باعالانىپ تا ءجۇر. وسىنداي ۇجىمنىڭ ىشىندە كۇلىم كوزدى، قوڭىر ءۇندى، جىلى ءجۇزدى گاۋحار ورالباي قىزى ەڭبەك ەتۋدە. ونەرىمەن، ەرەكشە ءسوز مانەرىمەن، مادەنيەتىمەن وزگەدەن وق بويى وزىق تۇرعان ونەر جانە مادەنيەت قىزمەتكەرلەرى كۇنى قارساڭىندا گاۋحار ورالباي قىزىنىڭ ونەرىمەن وقىرماندى تانىستىرۋدى ءجون كوردىك.
«الاقاي» قۋىرشاق تەاترىنىڭ رەپەرتۋارىندا قازاق حالقىنىڭ "ۇر، توقپاق!" ەرتەگىسى، "دالا اڭىزى، ۋا، الدار!"، "قوياننىڭ قۋلىعى" الەمگە ايگىلى دات ەرتەگىشىسى حريستيان گانس اندەرسەننىڭ "ۇسقىنسىز ۇيرەك"، "سۋ پەريزاتى" سياقتى ت.ب. قويىلىمدارى ەكى تىلدە تۇراقتى تۇردە ساحنالانىپ ءجۇر. وسىنداي قويىلىمداردىڭ ىشىندە گاۋحار ورالباي قىزى سومداعان رولدەرگە توقتالسام «اسپانداپ ۇشقان اق تىرنا» سپەكتاكلىندە گاۋحار ورالباي قىزى تىم نازىك، سەزىمتال ارۋ بەينەسىنە ەنۋ ارقىلى كورەرمەنىن ءبىر ادەمى اسەرگە بولەيدى، «تىزگىنىن بوسات تا، قۇستاي سامعا!» سپەكتاكلىندە انا رولىندە «ءاي-اي بوپەم» ءانىن جۇرەككە جەتكىزە ايتقاندا جاعىمدى قوڭىر داۋسىمەن جاندى باۋراپ الادى، ال «جارقىن قالا» سپەكتاكلىندە باستى ءرول تەڭىز راۋشانىن سومداپ ادەمى داۋىسىمەن، اسەم كەلبەتىمەن قويىلىمنىڭ ءمانىن ارتتىرا ءتۇستى. سونىمەن قاتار گاۋحار ورالباي قىزىنىڭ سومداعان ءتۇرلى حايۋاناتتار سپەكتاكلىندەگى قويان، جەزتىرناق، ەشكى ت.ب. وبرازدارى كوپشىلىك كورەرمەننىڭ ىقىلاسىنا بولەنىپ ءجۇر.
جالپى مادەنيەت دەسە بىردەن كونسەرت وتەتىن ورتالىق ەسكە تۇسەدى. ال بۇل سالاعا بىرنەشە مادەني ورىندار كىرەتىنىن قاراپايىم حالىق بىلە بەرمەيدى. وسى سەبەپتەن ءسوز ورايى كەلگەندە مادەنيەت سالاسىن تانىستىرىپ وتەيىن. مادەنيەت سالاسىنا ءبىزدىڭ اقتوبە قالاسىنان ت.احتانوۆ تەاترى، «الاقاي» قۋىرشاق تەاترى، ونەر ورتالىعى، فيلارمونيا، مۋزەي، كىتاپحانا، ارحيۆ جاتادى. وسى سالا ماماندارى ءتۇرلى مادەني شارالار وتكىزىپ قالانىڭ مادەنيەتىنىڭ دامۋىنا ۇلەس قوسۋدا. تەاترلار قويىلىمدارىمەن، فيلارمونيالار كونسەرتەرىمەن، كىتاپحانا كىتاپتارىمەن، مۋزەي قۇندى جادىگەرلەرىمەن ەرەكشە.
اتالعان مادەني ورتالىقتاردا قويىلىپ جۇرگەن ءتۇرلى سپەكتاكلدەردىڭ ارتىندا قانشاما ادامنىڭ ەڭبەگى جاتاتىنى بەلگىلى. اسەم بەزەندىرىلگەن ساحنادا، جارقىراعان شامداردىڭ استىندا ساحنالىق قويىلىمدار قويۋ ءبىر قاراعاندا وڭاي جۇمىس بولىپ كورىنگەنىمەن، وندا قانشاما ادامنىڭ قاجىر قايراتى، ماڭداي تەرى، ىنتا جىگەرى، قولتاڭباسى بار دەسەڭىزشى! ونەرپازداردىڭ ساحنالىق كوستيۋمدەرى مەن ونەرى ۇيلەسىم تاۋىپ، حالىقتىڭ كوڭىلىنەن شىعۋدا، ەتكەن ەڭبەك اقتالىپ، ابىرويلارى ارتپاسا، ازايعان ەمەس. كوپشىلىكتىڭ ىقىلاسىنا بولەنىپ، قوشەمەتكە يە بولعاننان ارتىق باقىت بار ما؟!
«سالەم،سالەم ۇل-قىزدار! ءبىر-بىر جانعان جۇلدىزدار» دەگەن ۇرانمەن جۇمىسىنا كەلىپ كىشكەنە بالادان ۇلكەن كىسىگە دەيىن كوڭىلدەرىن كوتەرىپ جۇرەتىن گاۋحار ورالبايقىزىنا جانە تەاتر ۇجىمىنا تولاعاي تابىس پەن تاۋسىلماس شابىت جانە الار اسۋلارىڭىز كوپ بولسىن دەپ تىلەك ايتامىز.
گۇلنۇر يحسانگالييەۆا، ساعي جيەنبايەۆ اتىنداعى وبلىستىق جاسوسپىرىمدەر كىتاپحاناسىنىڭ كىتاپحاناشىسى.
اقتوبە قالاسى.
