اتالعان اۋىلدارعا سۋ قۇبىرىن تارتۋ جۇمىسى 2020 جىلى باستالعان. ۇزىندىعى 41 شاقىرىمنان اساتىن سۋ قۇبىرلارىنىڭ قۇرىلىسىنا 700 ملن. تەڭگەنىڭ ۇستىندە قارجى ءبولىندى. تاپسىرىس بەرۋشى – ەكولوگيا مينيسترلىگى سۋ رەسۋرستارى كوميتەتىنىڭ «قازسۋشار» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى سۋ شارۋاشىلىعى كوميتەتى. «كولساي ستروي» ج ش س مەردىگەر رەتىندە قۇرىلىس جۇمىسىن ءوز موينىنا العان. ءبىر جىلدان كەيىن سۋ بەرىلە باستادى. الايدا كوپتىڭ قۋانىشى ۇزاققا سوزىلمادى. سۋدان تاپشىلىق كورىپ، ابىگەرگە تۇسكەن اۋىل تۇرعىندارىنىڭ جانايقايىن جولان ابەنوۆ جەتكىزدى.
«سۋ 2021 جىلى بەرىلىپ ەدى. قىستا بىرتىندەپ قاتىپ قالدى. كۇن جىلىعان سوڭ توڭ ەرىپ، سۋ قايتا اعاتىن بولار دەپ ۇمىتتەندىك. الايدا ءساۋىر ايىنان بەرى سۋ ساپ تىيىلدى. اقشاسى تولەنبەگەندىكتەن قيىپ تاستاعان دەپ ەستىدىك. جاعدايىمىز قيىن. ءقازىر ءبىر-بىر قۇدىق قازىپ الىپ، سۋىن ءسۇزىپ ءىشىپ وتىرمىز. سۋدىڭ قورى ازايىپ كەلە مە، قازعان جەردەن سۋ دا شىقپايدى»، - دەدى ول.
اقساقالدىڭ ءسوزىن اۋدان اكىمى نۇرلان قىزبەرگەنوۆ راستاپ وتىر. ونىڭ ايتۋىنشا، ءساۋىر ايىنان باستاپ حالىققا سۋ بەرىلمەي جاتىر. ونىڭ ءبىرىنشى سەبەبى 600 مىڭ تەڭگە بەرەشەك تولەنبەي، ەلەكتر ەنەرگياسى قيىلعان. ال تاپسىرىس بەرۋشى قۇرىلىستى ءالى قابىلداماعان بولىپ شىقتى.
«بۇعان دەيىن دە مۇنداي ماسەلەلەر كەزىكتى. ءبىراق ءبىز مۇنى 1-3 كۇننىڭ كولەمىندە شەشىپ، بەرەشەك قارجىنى مەردىگەرگە تولەتتىردىك. سۋ قۇبىرى جارىلىپ، 4-5 كۇن سۋ بەرىلمەي قالعان كەزدەر دە بولدى. ءبىراق اۋىلدىڭ حالقى سۋسىز وتىرماسىن دەپ «سۋ شارۋاشىلىعى» كمك ماماندارىن جىبەرىپ، جارىلعان جەرلەردى ءوز كۇشىمىزبەن جامادىق. بۇل جەردە تاپسىرىس بەرۋشى مەن مەردىگەر بىرىگىپ جۇمىس ىستەۋى كەرەك»، - دەدى اۋدان اكىمى.
نۇرلان قىزبەرگەنوۆ سۋ قۇبىرلارىن سالۋ قۇرىلىس نورمالارىنا سايكەس جۇرگىزىلمەگەنىن اتاپ ءوتتى. قۇرىلىس جۇمىسىن تولىق اياقتاۋ، كەمشىلىكتەردى قالىپقا كەلتىرۋ تۋرالى مەردىگەرگە ۇسىنىس حاتتار دا جازىلعان. الايدا كوپشىلىكتىڭ ءۇنى جاۋاپسىز قالىپ وتىر.
شەڭبەرتال اۋىلىنىڭ تۇرعىندارى بولسا، قۇرىلىستىڭ ساپاسىز جۇرگىزىلگەنىنە نارازى. اۋىل تۇرعىنى امانبەك ىسقاقوۆ قۇرىلىس جۇمىسىنىڭ اۋەل باستان-اق دۇرىس جۇرگىزىلمەگەنىن العا تارتتى.
«كولساي ستروي» جشس-نەن جاستار كەلىپ، جۇمىستى سالعىرت جاساپ كەتتى. ەندى ەلەكتر جەلىسى دە قيىلدى. حالىق قينالىپ وتىر. سۋ بار بولعانى ءۇش اي عانا اقتى. تالابىمىز – سۋ قوسىلسىن»، - دەدى ول.
وسى اۋىلدىڭ تاعى ءبىر تۇرعىنى سىدىق مولدابەكوۆ جالعىز قۇدىقتان سۋ ىشكەن حالىقتىڭ دەنساۋلىعىنا، تازالىق جاعدايىنا الاڭداۋلى.
«تۇرعىنداردىڭ ءارقايسىسى ۇيىنەن ءبىر-بىر شەلەك الىپ بارادى. ءبىر قۇدىققا ءجۇز شەلەك تۇسكەندە قانداي تازالىق بولادى؟ سول سۋدى ءبىز ءىشىپ وتىرمىز. قۇبىرمەن كەلگەن سۋ قىستا قاتىپ قالدى، ارتىنان موتورى ىستەن شىقتى قۇرىلىس جۇمىستارى دۇرىس جۇرگىزىلسە بۇلاي بولماس ەدى. وسى ماسەلەنى شەشىپ بەرۋلەرىڭىزدى سۇرايمىز. ءبىزدىڭ جاعدايىمىزعا بەيجاي قاراماي، «AMANAT» پارتياسىنان ارنايى كەلگەندەرىڭىزگە ريزاشىلىعىمىزدى بىلدىرەمىز»، - دەدى ول.
پارتيالىق باقىلاۋ دەپارتامەنتىنىڭ ينسپەكتورى ايجان يسكاكوۆا ءاربىر تۇرعىننىڭ پىكىرىن، وتىنىش-تىلەگىن مۇقيات تىڭدادى. بۇل ماسەلە پارتيالىق باقىلاۋعا الىناتىنىن ايتتى.
«جينالعان اكت، بىزگە بەرىلگەن قۇجاتتىڭ بارلىعىن قارادىق. الداعى ۋاقىتتا كوميتەتتىڭ وتىرىسىنا جاۋاپتى ۆەدومستۆو وكىلدەرى، كوميتەت ءتوراعالارى شاقىرىلادى. پارتيا بۇل ماسەلەنى سوڭىنا دەيىن باقىلاۋعا الادى. ويتكەنى وڭىرلەردى دامىتۋدىڭ ۇلتتىق جوباسى اياسىندا حالىقتى 100 پايىز تازا اۋىز سۋمەن قامتاماسىز ەتۋ – پرەزيدەنتتىڭ بەرگەن تاپسىرماسى. سونداي-اق بۇل ماسەلەنى شەشۋ پارتيامىزدىڭ باعدارلاماسىندا دا كوزدەلگەن. ونى ورىنداۋ، قاداعالاۋ – مىندەتىمىز»، - دەدى ايجان ىسقاقوۆا.
https://dalanews.kz/news/89252-uzdik-pikirsayysshylar-atagy-ushin-60-kom
https://dalanews.kz/aimak/89211-deputattar-turkistan-oblysynyng-auyl
