13 جىل بۇرىن اعاسى جۇبايىن ولتىرگەنى ءۇشىن سوتتالىپ، قارىنداسى ولاردىڭ قىزى – وكسانانى ءوز قامقورلىعىنا العان. ەكى جىل بۇرىن وكسانانىڭ اكەسى بوستاندىققا شىققان.
– وتباسى بۇرىنعىداي دەنيسوۆكادا تۇردى. وكسانا 1 جاس 8 ايلىق بولعان كەزىندە اكەسىنىڭ قارىنداسى قامقورلىققا العان. ودان كەيىن ولار قوستانايعا كوشىپ، جاقسى ۇيدە تۇردى. وقۋشى قىز سۇيكىمدى، اقجارقىن مىنەزدى ەدى. ول رەگبي سپورتىمەن شۇعىلداندى. بولعان جايدى ەستىگەن مەكتەپتەگىلەر ەسەڭگىرەپ قالدى، – دەيدى №11 ورتا مەكتەبىنىڭ ديرەكتورى گۇلميرا ءىلياسوۆا.
وكسانانىڭ تانىستارى مەن دوستارى ونىڭ 17 ناۋرىزدا جاتتىعۋدا بولىپ، كەشكە ۇيگە كەلگەنىن ايتادى.
«ول ساعات تۇنگى وننان كەتە ۆكونتاكتە الەۋمەتتىك جەلىسىندەگى توپقا ۇيدە الدەبىر جانجال، ايقاي-شۋ شىققانىن جازدى. بولعان جايدى كەيىن ايتاتىن شىعار دەپ ويلادىق. ودان كەيىن ول ءىز-تۇسسىز كەتىپ، كەيىنىرەك ءولى كۇيىندە تابىلدى»، – دەيدى ونىڭ سىنىپتاستارى.
تاعى ءبىر نۇسقا بويىنشا، وكسانانىڭ اپكەسى ۇيدەن شىعىپ كەتكەن. ۇيگە قايتىپ كەلگەندە وكسانانىڭ دەنەسى كوپتەگەن جەردەن جاراقاتتانىپ، باقيلىق بولىپ كەتكەنىن كورگەن. دوستارىنىڭ ايتۋىنشا، پوليسيا قىزمەتكەرلەرى ءقازىر ەكى ادامنان كۇدىكتەنۋدە: ونىڭ ءبىرى – امنيستيا بويىنشا ۋاقىتىنان بۇرىن بوستاندىققا شىققان وكسانانىڭ اكەسى، ەكىنشىسى – قامقورلىققا العان اپكەسىنىڭ جولداسى، ياعني وكسانانىڭ وگەي اكەسى.
قوستاناي وبلىستىق ءىىد ادام ءولىمى بولعانىن راستايدى، ءبىراق انىق-قانىعىن ازىرگە جاريالاعان جوق.
