قورعانىس مينيسترلىگى جاساندى ينتەللەكتتى ەنگىزۋ جونىندەگى مامانداندىرىلعان بولىمشە قۇردى، دەپ حابارلايدى Dalanews.kz.
قازاقستان رەسپۋبليكاسى قارۋلى كۇشتەرى جوعارعى باس قولباسشىسىنىڭ تاپسىرمالارىن ورىنداۋ شەڭبەرىندە جانە باسقارۋ تيىمدىلىگىن ارتتىرۋ، پروسەستەردى وڭتايلاندىرۋ، سونداي-اق قورعانىس الەۋەتىن كۇشەيتۋ ماقساتىندا قورعانىس مينيسترلىگىندە جاساندى ينتەللەكت تەحنولوگيالارىن ەنگىزۋ مەن دامىتۋعا جاۋاپتى مامانداندىرىلعان بولىمشە قۇرىلدى.
مينيسترلىك مالىمەتىنە سۇيەنسەك، جاڭا قۇرىلىم قارۋلى كۇشتەردىڭ سيفرلىق ترانسفورماسياسىنىڭ نەگىزگى ەلەمەنتى بولماق.
"بولىمشەنىڭ نەگىزگى مىندەتى - دەرەكتەردى تالداۋ، باسقارۋدى اۆتوماتتاندىرۋ، جەدەل سەنارييلەردى مودەلدەۋ، قازىرگى اسكەري جاعدايدا باسقارۋ شەشىمدەرىن قابىلداۋ جىلدامدىعىن ارتتىرۋ ءۇشىن جاساندى ينتەلەكت شەشىمدەرىن ازىرلەۋ جانە ەنگىزۋ"، - دەپ جازىلعان حابارلامادا.
