جاقىندا بەرىلەدى مۇنداي مالىمەت. قوردايدا جاپپاي تەرگەۋ ءجۇرىپ جاتىر، ونى پروكۋرورلار باسقارعان ۆەدومستۆوارالىق جەدەل توپ قولعا العان. اۋقىمدى جۇمىس اتقارىلۋدا، ويتكەنى وقيعا كولەمدى (...). كەم دەگەندە، پوليسيا قىزمەتكەرلەرىنە باعىنباي جانجال تۋدىرعان ءۇش ادام ۇستالدى، ءىس سوتقا جىبەرىلدى.
وسى وقيعاعا تاعى ءبىر سەبەپ - قارت ادامدى ۇرىپ-سوعۋ جايى، وعان قاتىستىلار دا انىقتالىپ، ۇستالىپ، قاماۋعا الىندى.
ال باسقا ارانداتۋشىلار، اراعا ىرىتكى سالۋشىلار تۋرالى ءسال كەيىنىرەك اقپارات الاسىزدار، ويتكەنى ءقازىر تەرگەۋ ءجۇرىپ جاتىر. ءىس جۇرگىزۋدە دالەلدەمەلەردى شوعىرلاندىرۋ دەگەن بار. تاياۋ ۋاقىتتا كىم جانە قانداي قۇقىق بۇزۋشىلىققا جول بەردى، ودان حاباردار ەتەتىن بولامىز، - دەپ سەندىردى قوجايەۆ.
ءمينيستردىڭ ورىنباسارى قۇقىق قورعاۋ ورگاندارى تۇتقىندالعاندار تۋرالى اقپاراتتى جاسىرمايدى، ءبىراق سوتتىڭ قانشا ادامدى قاماۋعا بۇيىرعانى تۋرالى اقپارات بەرە المايتىندىعىن ايتتى.
"مەن بۇل اقپاراتتى ءدال ءقازىر بەرە المايمىن. ءبىز ونى جاسىرىپ وتىرعان جوقپىز، قاجەت ءارى دايىن بولعان كەزدە بارلىق اقپارات بەرىلەدى. قىلمىستىق ىستەر كوپ، كۇن سايىن ۇستى-ۇستىنە قوسىلىپ جاتىر. 11 كىسى ءولتىرۋ فاكتىسى بويىنشا قىلمىستىق ءىس قوزعالعانىن جاقسى بىلەسىزدەر، جاپپاي تارتىپسىزدىكتەرگە قاتىستى، ۇرلىق، توناۋ، قاراقشىلىق تۋرالى قىلمىستىق ىستەر بار، بۇل - ءارتۇرلى ەپيزودتار بويىنشا 90-عا جۋىق قىلمىستىق ءىس"، - دەدى ول.
ونىڭ ايتۋىنشا، قاماۋعا الىنعانداردىڭ اراسىندا قۇقىق قورعاۋ ورگاندارىنىڭ قىزمەتكەرلەرى جوق.
قورداي وقيعالارىنا قاتىستى تەرگەۋدىڭ قاشان اياقتالۋىنا قاتىستى قوجايەۆ جاۋاپ بەرە المايتىنىن ايتتى.
ونى ۋاقىت كورسەتەدى. تەرگەۋدىڭ جالپى مەرزىمىن، بىلەسىزدەر. قىلمىستىق ءىس جۇرگىزۋ زاڭى بويىنشا - 2 اي. ەگەر قوسىمشا زەرتتەۋلەر، قاجەتتى سىنامالار تاعايىنداۋ قاجەت بولسا، زاڭعا سايكەس بۇل مەرزىمدى ۇزارتۋعا بولادى، - دەپ ءسوزىن تۇيىندەدى قوجايەۆ.
