بۇل جايىندا ىشكى ىستەر ءمينيسترىنىڭ ورىنباسارى الەكسەي كالايچيدي ايتتى دەپ حابارلايدى Dalanews.kz.
"ارانداتپا اقپارات تاراتقان ادامدى تاپتىق. ەڭ سوراقىسى الگى ادام كونتەنتتى ءتۇرلى الەۋمەتتىك جەلىلەرگە جۇكتەي وتىرا، ونىڭ استىنا ۇلتارازدىقتى قوزدىراتىن پىكىردى قوسا جازعان. جاستاردىڭ كوشەگە شىعۋىنا وسى سەبەپ بولعان، – دەيدى كالايچيدي.
مينيسترلىك ەلدىڭ وزگە دە وڭىرلەرىنەن پروۆوكاتورلاردى ىزدەپ تاۋىپتى.
"ولاردىڭ اراسىندا مىنا مەنىمەن جاستى (57 جاسار) ازاماتتار دا بار. ولار وقيعا ورىن جەرگە ات ءىزىن سالماعان، الايدا الەۋمەتتىك جەلىگە جىنىگىپ، ءجوندى-جونسىز ۆيدەولاردى جۇكتەي جونەلگەن. سونىڭ سالدارىنان قوردايداعى احۋال اسقىنىپ كەتتى"، – دەيدى ول.
ارانداتۋشىلاردى ارتى-ارتىنان انىقتاپ جاتقان ىشكى ىستەر مينيسترلىگى الگىلەردى اباقتىعا قاماي ما؟
كالاچيدىڭ ايتۋىنشا ازىرگە ۇلتارالىق جانجال تۋعىزعان كونتەنتتى الەۋمەتتىك جەلىگە جاريالاپ جىبەرگەندەر انىقتالۋ ۇستىندە.
"جەلىگە جۇكتەمەس بۇرىن اقپاراتتى انىقتاپ الىڭىزدار. مۇندايعا مۇقيات بولعان ءجون. وقيعا ورتاسىندا ءجۇرىپ ءتۇرلى قاۋەسەت تاراتقاندار دا جەتىپ ارتىلادى. كەيبىرەۋلەر كيكىلجىڭدى ۆيدەوعا ءتۇسىرۋ ءۇشىن كەلگەن. ەندى بىرەۋلەر وقيعانىڭ بەل ورتاسىندا جۇرگەن. وسى جانجالعا قاتىسى بار كۋاگەرلەردىڭ بارىمەن تىلدەسەمىز. دەرەك جيناۋىمىز كەرەك، سودان كەيىن بارىپ شەشىم شىعارامىز"، – دەيدى كالايچيدي.
سوزىنە قاراعاندا پوليسەيلەر ەلدى ۇردا-جىققا ۇرىندىرعاندىڭ ءبىرازىن ەركىنە جىبەرگەن.
"بىزگە انىق-قانىق مالىمەت بەرگەن جانە تەرگەۋگە كەدەرگى كەلتىرمەيدى-اۋ دەگەندەردى بوساتتىق. ولاردى اباقتىدا ۇستاعاننان نە ۇتامىز؟ بۇدان بولەك ىشكى ىستەر مينيسترلىگى ۇقك-مەن بىرلەسىپ قىرعىزستان شەكاراسىن كەسىپ وتكەن ازاماتتارعا قاتىستى تەرگەۋ امالىن جۇرگىزۋدە"، – دەدى ول.
