الماتى وبلىسى اكىمدىگى مەن ءماسليحاتىنىڭ "الاتاۋ قالاسىنىڭ شەكاراسىن بەلگىلەۋ تۋرالى" بىرلەسكەن شەشىمى ازىرلەندى، دەپ حابارلايدى Dalanews.kz.
شەشىمگە سايكەس، قونايەۆ قالاسىنىڭ، ىلە، تالعار اۋداندارىنىڭ جەرلەرى جاڭا قالانىڭ اۋماعىنا بەرىلەدى.
"الاتاۋ قالاسىنىڭ شەكاراسى، ونىڭ شەكاراسىنا قونايەۆ قالاسى، ىلە جانە تالعار اۋداندارى جەرلەرىنىڭ جالپى كولەمى 88267،0086 گەكتار بولىكتەرىن قوسۋ ارقىلى بەلگىلەنسىن"، – دەلىنگەن قۇجاتتا.
اتاپ ايتقاندا، الاتاۋ قالاسىنىڭ شەكاراسىنا قونايەۆ قالاسىنىڭ 10937،0052 گەكتار جەرى، ىلە اۋدانىنىڭ 65213،0004 گەكتار، تالعار اۋدانىنىڭ 12117،003 گەكتار جەرى كىرمەك.
قۇجات "اشىق نقا" سايتىندا جاريالاندى جانە 23 شىلدەگە دەيىن قوعامدىق تالقىلاۋدا بولادى.
