قونايەۆ قالاسىنىڭ تۇرعىندارى اباي كوشەسىنىڭ بويىندا ساۋدامەن اينالىساتىندارعا ءجيى شاعىمدانۋدا. ولاردىڭ ايتۋىنشا، ساۋداگەرلەردىڭ تىعىز ورنالاسۋىنان اياق الىپ جۇرۋگە مۇمكىن ەمەس ءارى جاشىكتەر مەن ارنايى كونتەينەرلەر ۇنەمى قوقىسقا تولىپ، شىرىگەن جەمىس-جيدەكتىڭ ساسىق ءيىسى مۇڭكىپ تۇرادى.
تۇرعىنداردىڭ بۇل سوزىمەن كوممۋنالدىق قىزمەت كورسەتۋشى كومپانيا وكىلدەرى دە كەلىسىپ وتىر. سوزدەرىنشە، كوشە سىپىرۋشىلار ساۋداگەرلەردەن كەيىن ءتۇننىڭ ورتاسىنا دەيىن جۇمىس جاساۋعا ءماجبۇر.
سوندىقتان قالالىق كاسىپكەرلىك ءبولىمى مەن جەرگىلىكتى پوليسيا قىزمەتكەرلەرى ماسەلەنى شەشۋ ماقساتىندا رەيدتىك جۇمىستاردى كۇشەيتتى.
وتكەن اپتانىڭ وزىندە ق ر اقبتك-نىڭ 204-بابىنا (بەلگiلەنبەگەن ورىنداردا ساۋدا جاساۋ) سايكەس، 12 ادامعا ايىپپۇل سالىنىپ، 3 تۇلعاعا ەسكەرتۋ بەرىلدى. ال كاسىپكەرلىك ءبولىمىنىڭ ۇسىنعان شارتىنا ساۋداگەرلەر ءالى دە كەلىسپەي وتىر. بۇل تۋرالى وسى ۋاقىتقا دەيىن اقپارات تاراتىلعان بولاتىن.
سونداي-اق، ماماندار تۋريستەر اعىنىنىڭ كوبەيۋىنە بايلانىستى بيزنەس ورىندارىنىڭ يەلەرىمەن تۇسىندىرمە جۇمىستارىن جۇرگىزۋدە.
كاسىپكەرلىك ءبولىمىنىڭ قىزمەتكەرلەرى سانيتارلىق-ەپيدەميولوگيالىق باقىلاۋ باسقارماسىنىڭ ماماندارىمەن بىرلەسىپ، تازالىق ەرەجەلەرىن ساقتاماعان جاعدايدا اكىمشىلىك جازا قاراستىرىلعانىن ەسكەرتۋدە.
