"قازمۇنايگاز" ۇك اق باسقارما ءتوراعاسى ا.حاسەنوۆ جانە قازاقستان رەسپۋبليكاسى پارلامەنتى ءماجىلىسىنىڭ ەكولوگيا جانە تابيعاتتى پايدالانۋ ماسەلەلەرى جونىندەگى كوميتەتىنىڭ ءتوراعاسى ە.جاڭبىرشين "قازگوز" ج ش س جانە جاڭاوزەن قالاسىنداعى جاڭا گاز وڭدەۋ زاۋىتىنىڭ قۇرىلىس الاڭىنا باردى، دەپ حابارلايدى Dalanews.kz. 

ساپار بارىسىندا ا. حاسەنوۆ قازگوز باسشىلىعىمەن جانە سالىنىپ جاتقان زاۋىت ديرەكسياسىمەن جينالىس وتكىزدى. كەڭەستە قازگوز-دىڭ وندىرىستىك-شارۋاشىلىق قىزمەتىنە قاتىستى ماسەلەلەر جانە جاڭاوزەندەگى جاڭا گوز سالۋ جوباسىنىڭ ورىندالۋ ستاتۋسى تالقىلاندى.

2024 جىلدىڭ 6 ايىندا قازگوز شامامەن 407،8 ملن م3 شيكى گاز وڭدەپ، 339،1 ملن م3 تاۋارلىق گاز، 97،6 مىڭ توننا سۇيىتىلعان مۇناي گازىن، 26،5 مىڭ توننا پەنتان-گەكسان فراكسياسىن، 0،8 مىڭ توننا پەش وتىنىن ءوندىرىپ شىعاردى. زاۋىت كوپتەگەن كورسەتكىشتەر بويىنشا ءوندىرىس كولەمىن اسىرا ورىندادى.

قمگ باسشىسى بەكىتىلگەن وندىرىستىك جوسپاردى ورىنداۋ، ونەركاسىپتىك قاۋىپسىزدىكتى جانە ەڭبەكتى قورعاۋدى قامتاماسىز ەتۋ قاجەتتىلىگىنە نازار اۋداردى. سونىمەن بىرگە ءوڭىردى وتىنمەن جانە سۇيىتىلعان مۇناي گازىمەن ۇزدىكسىز قامتۋ ماقساتىندا قولدانىستاعى جانە جاڭا گوز-دىڭ ۇيلەسىمدى جۇمىسىن ۇيىمداستىرۋدىڭ ماڭىزدىلىعىن اتاپ ءوتتى.

ءوز كەزەگىندە ە. جاڭبىرشين ەكولوگيالىق ستاندارتتار مەن ەڭبەكتى قورعاۋ تالاپتارىن قاتاڭ ساقتاۋ قاجەتتىلىگىنە، سونداي-اق ءوڭىردىڭ تۇراقتى دامۋى مەن حالىقتىڭ مۇددەسىن قورعاۋ ءۇشىن دەپۋتاتتىق باقىلاۋ مەن اتالمىش جوبالاردى قولداۋدىڭ ماڭىزدىلىعىن اتاپ ءوتتى.

2024 جىلدىڭ سوڭىنا دەيىن شامامەن 838 ملن م3 شيكى گاز وڭدەۋ، 698 ملن م3 تاۋارلىق گاز، 192 مىڭ توننا سۇيىتىلعان مۇناي گازىن، 56 مىڭ توننا پەنتان-گەكسان فراكسياسىن، 1،3 مىڭ توننا پەش وتىنىن شىعارۋ جوسپاردا.

جيىن قورىتىندىسى بويىنشا ءوڭىردى ەنەرگيامەن ۇزدىكسىز قامتاماسىز ەتۋ ماقساتىندا جاڭا زاۋىتتى جوسپار بويىنشا مەرزىمىندە پايدالانۋعا بەرۋدىڭ ماڭىزدىلىعىنا باسا نازار اۋدارىلدى.