قازاقستان مۇسىلماندارى ءدىني باسقارماسى قوستاناي وبلىسىنىڭ يمامى باحىتبەك تاجىمبەتتىڭ ماس كۇيدە ۇستالىپ، قامالۋىنا بايلانىستى مالىمدەمە جاسادى، - دەپ حابارلايدى Dalanews.kz.
"ءدىني باسقارمانىڭ قىزمەت جۇيەسىندە زاڭ نورمالارىن جانە ءدىن قىزمەتكەرى ەتيكاسىن ورەسكەل بۇزاتىن جەكە تۇلعالاردىڭ ءدىني سالادا جۇمىس ىستەۋىنە مورالدىق تۇرعىدان قۇقىعى جوق. قمدب ءدىن قىزمەتكەرىنە لايىقسىز ارەكەت جاساعان باحىتبەك تاجىمبەتتى قوستاناي وبلىسىنىڭ باس يمامى قىزمەتىنەن بوساتتى. قازاقستان مۇسىلماندارى ءدىني باسقارماسى بولعان وقيعانى ۇلكەن وكىنىشپەن قابىلداپ، ەلىمىزدەگى مۇسىلمان جاماعاتىنان كەشىرىم سۇرايدى. اللا تاعالا بارشامىزدى جاماندىق پەن وكىنىشتى ىستەرگە جەتەلەيتىن ءناپسى قالاۋىنىڭ كەسىرىنەن ساقتاعاي"، – دەيدى قمدب وكىلدەرى.
ەسكە سالايىق، بۇعان دەيىن قوستانايداعى يمام الكوگول ءىشىپ، تۇنگى كلۋب جانىندا ۇستالعانى بەلگىلى بولدى.
DALA INSIDE مالىمەتىنشە،الكوگول ءىشىپ، تۇنگى كلۋب جانىندا ۇستالعان قوستانايداعى يمام باس ءمۇفتيدىڭ اۋىسۋىنا ىقپال ەتپەك.
كەلەسى اپتادا قازاقستان مۇسىلماندارىنىڭ مەرەيتويلى، ح قۇرىلتايىن تەزىرەك ۇيىمداستىرىپ، باس ءمۇفتي ناۋرىزباي وتپەنوۆتى اۋىستىرۋ بويىنشا جابىق كونسۋلتاسيالار باستالماق. بۇل تۋرالى DALA INSIDE دەرەككوزى حابارلادى.
ءداستۇرلى يسلامنىڭ پوزيسياسى تومەندەپ، ينتەرنەت، الەۋمەتتىك جەلىدەگى راديكالداردىڭ قازاقتىڭ داستۇرىنە، ۇلتتىق اسپاپتارىنا شابۋىلى كۇشەيگەندە سەنات پەن "سول جاعالاۋ" تاراپىنان قازاقستان مۇسىلماندارى ءدىني باسقارماسىنا "جۇمىستى كۇشەيتۋ، بەلسەندىرەك بولۋ" تۋرالى وتىنىشتەر بىرنەشە رەت ايتىلعان بولاتىن.
"قمدب ينەرتتى، سىلبىر، ءوز ۇستانىمىن باتىل جەتكىزە المايتىن ۇيىمعا اينالدى. ءقازىر ولار قازاقستانداعى يسلام ماسەلەسىن باقىلاۋدان شىعارىپ العانى بايقالادى. راديكالداردىڭ يسلامدى قازاقتىڭ ۇلتتىق قۇندىلىقتارىنا قارسى قويۋى ءدىننىڭ پوزيسياسىن السىرەتىپ، تاڭىريزمگە نەگىزدەلگەن جاڭا اعىمداردىڭ پايدا بولۋىنا الىپ كەلدى"، - دەيدى، دەرەككوز.
قوستانايداعى باس يمام تاجىمبەت باحىتبەكتىڭ الكوگول ۇرتتاپ، تۇنگى كلۋبتىڭ جانىندا كولىك رولىندە ۇستالعانى يسلامنىڭ بەدەلىنە اۋىر سوققى بولۋى مۇمكىن. ءقازىر سوت ۇكىمى شىعىپ، يمام 15 تاۋلىككە قامالدى جانە 7 جىلعا كولىك قۇرالىن باسقارۋ قۇقىعىنان ايىرىلدى.
سوڭعى 10 جىلدا قازاقستاندا ءۇش باس ءمۇفتي اۋىستى. قمدب تىزگىنىن 2013-2017 جىلدارى ەرجان مايامەروۆ، 2017-2020 جىلدارى وراز سەرىكباي ۇستاسا، 2020 جىلدان بەرى ناۋرىزباي وتپەنوۆ باس ءمۇفتي قىزمەتىن اتقارىپ كەلەدى. كەلەسى قۇرىلتاي 2025 جىلدىڭ باسىندا وتەدى دەگەن جوسپار بولعان. ءبىراق جابىق كونسۋلتاسيالار ناتيجەسىندە مۇسىلمانداردىڭ كەزەكتەن تىس قۇرىلتايى ودان ەرتە شاقىرىلۋى دا عاجاپ ەمەس.
