Qazaqstan musylmandary dinı basqarmasy Qostanaı oblysynyń ımamy Bahytbek Tájimbettiń mas kúıde ustalyp, qamalýyna baılanysty málimdeme jasady, - dep habarlaıdy Dalanews.kz.
"Dinı basqarmanyń qyzmet júıesinde zań normalaryn jáne din qyzmetkeri etıkasyn óreskel buzatyn jeke tulǵalardyń dinı salada jumys isteýine moraldyq turǵydan quqyǵy joq. QMDB din qyzmetkerine laıyqsyz áreket jasaǵan Bahytbek Tájimbetti Qostanaı oblysynyń bas ımamy qyzmetinen bosatty. Qazaqstan musylmandary dinı basqarmasy bolǵan oqıǵany úlken ókinishpen qabyldap, elimizdegi musylman jamaǵatynan keshirim suraıdy. Alla Taǵala barshamyzdy jamandyq pen ókinishti isterge jeteleıtin nápsi qalaýynyń kesirinen saqtaǵaı", – deıdi QMDB ókilderi.
Eske salaıyq, buǵan deıin Qostanaıdaǵy ımam alkogól iship, túngi klýb janynda ustalǵany belgili boldy.
DALA INSIDE málimetinshe,alkogól iship, túngi klýb janynda ustalǵan Qostanaıdaǵy ımam Bas múftıdiń aýysýyna yqpal etpek.
Kelesi aptada Qazaqstan musylmandarynyń mereıtoıly, H quryltaıyn tezirek uıymdastyryp, Bas múftı Naýryzbaı Ótpenovty aýystyrý boıynsha jabyq konsýltasıalar bastalmaq. Bul týraly DALA INSIDE derekkózi habarlady.
Dástúrli ıslamnyń pozısıasy tómendep, ınternet, áleýmettik jelidegi radıkaldardyń qazaqtyń dástúrine, ulttyq aspaptaryna shabýyly kúsheıgende Senat pen "Sol jaǵalaý" tarapynan Qazaqstan musylmandary dinı basqarmasyna "jumysty kúsheıtý, belsendirek bolý" týraly ótinishter birneshe ret aıtylǵan bolatyn.
"QMDB ınertti, sylbyr, óz ustanymyn batyl jetkize almaıtyn uıymǵa aınaldy. Qazir olar Qazaqstandaǵy ıslam máselesin baqylaýdan shyǵaryp alǵany baıqalady. Radıkaldardyń ıslamdy qazaqtyń ulttyq qundylyqtaryna qarsy qoıýy dinniń pozısıasyn álsiretip, táńirızmge negizdelgen jańa aǵymdardyń paıda bolýyna alyp keldi", - deıdi, derekkóz.
Qostanaıdaǵy bas ımam Tájimbet Bahytbektiń alkogól urttap, túngi klýbtyń janynda kólik rólinde ustalǵany ıslamnyń bedeline aýyr soqqy bolýy múmkin. Qazir sot úkimi shyǵyp, ımam 15 táýlikke qamaldy jáne 7 jylǵa kólik quralyn basqarý quqyǵynan aıyryldy.
Sońǵy 10 jylda Qazaqstanda úsh bas múftı aýysty. QMDB tizginin 2013-2017 jyldary Erjan Maıamerov, 2017-2020 jyldary Oraz Serikbaı ustasa, 2020 jyldan beri Naýryzbaı Ótpenov bas múftı qyzmetin atqaryp keledi. Kelesi quryltaı 2025 jyldyń basynda ótedi degen jospar bolǵan. Biraq jabyq konsýltasıalar nátıjesinde musylmandardyń kezekten tys quryltaıy odan erte shaqyrylýy da ǵajap emes.
