ساۋلە ارزانبەكوۆا مونيتورينگتىك توپقا جەتەكشىلىك ەتكەن. جۋىردا توپ مۇشەلەرى بيزنەسكە قامقورلىق جاساپ، جۇيەلى تۇردە پارا الدى دەگەن كۇدىكپەن ۇستالعان ەدى. كۇدىكتىلەردىڭ اراسىندا قالالىق كاسىپكەرلىك ءبولىمىنىڭ باسشىسى مەن باس مامانى بار. سىبايلاس جەمقورلىققا قارسى قىزمەت ولارعا قاتىستى قىلمىستىق كودەكستىڭ 366-بابى 3-تارماعى 2-تارماقشاسى (پارا الۋ) بويىنشا قىلمىستىق ءىس قوزعادى.
"قىلمىستىق ءىستى تەرگەۋ اياسىندا قالالىق اكىمدىكتە اكىمنىڭ قاتىسۋىمەن جيىن ءوتتى. ونىڭ قورىتىندىسى بويىنشا تالدىقورعان اكىمىنىڭ ورىنباسارى س.ارزانبەكوۆا اتالعان باعىتتا ءتيىستى باقىلاۋ جاساماعانى ءۇشىن جانە الدىن الۋ شاراسى ماقساتىندا جۇمىستان بوساتىلدى"،- دەپ مالىمدەدى سىبايلاس جەمقورلىققا قارسى قىزمەتتىڭ باسپا ءسوز قىزمەتى.
تالدىقورعان اكىمدىگىنىڭ باسپا ءسوز قىزمەتى باسشىلاردىڭ ءبىرى جۇمىستان كەتكەنىن راستادى.
"ارزانبەكوۆا شىنىمەن مەملەكەتتىك قىزمەتتەن بوساتىلدى. ول ءوز ەركىمەن اكىم ورىنباسارى قىزمەتىنەن كەتۋ تۋرالى ءوتىنىش جازدى. وعان ءوزى جەتەكشىلىك ەتكەن مونيتورينگتىك توپ مۇشەلەرىنىڭ ۇستالۋى نەگىز بولدى"، - دەپ ناقتىلادى تالدىقورعان اكىمىنىڭ باسپا ءسوز حاتشىسى نۇر قانات ۇلى.
ەسكە سالساق، 30 شىلدەدە تالدىقورعاندا سىبايلاس جەمقورلىققا قارسى قىزمەت مونيتورينگتىك توپتىڭ مۇشەلەرىن ۇستادى. ولاردىڭ اراسىندا كاسىپكەرىك ءبولىمىنىڭ باسشىسى مەن باس مامانى بار.
شەنەۋنىكتەر پاندەميا كەزىندە بۇقارالىق شارالاردى وتكىزۋگە تىيىم سالىنعانىنا قاراماستان، كەيبىر نىسانداردىڭ كارانتيندى بۇزۋىنا جول بەرگەن. اتاپ ايتقاندا، ءبولىم باسشىسى قاراماعىنداعى باس مامانمەن الدىن الا كەلىسىپ، قالا رەستوراتورلارى مەن جاپپاي ساۋدا وكىلدەرىنەن ولارعا قاتىستى اكىمشىلىك شارا قابىلداماۋ ءۇشىن جۇيەلى نەگىزدە 20 مىڭنان 270 مىڭ تەڭگەگە دەيىن پارا الىپ تۇرعان. سونداي-اق پارا بەرگەن مەيرامحانالاردىڭ 5 اكىمشىسى دە قىلمىستىق جاۋاپقا تارتىلادى.
كۇدىكتىلەر ءىرى مولشەردە ايىپپۇل سالىنۋى نە مۇلكى تاركىلەنىپ، جەتى جىلدان ون ەكى جىلعا دەيىن باس بوستاندىعىنان ايىرىلۋى مۇمكىن.
دەرەككوز: sputnik.kz
