Sáýle Arzanbekova monitoringtik topqa jetekshilik etken. Jýyrda top músheleri bizneske qamqorlyq jasap, júieli túrde para aldy degen kúdikpen ustalǵan edi. Kúdiktilerdiń arasynda qalalyq kásipkerlik bóliminiń basshysy men bas mamany bar. Sybailas jemqorlyqqa qarsy qyzmet olarǵa qatysty Qylmystyq kodekstiń 366-baby 3-tarmaǵy 2-tarmaqshasy (Para alý) boiynsha qylmystyq is qozǵady.
"Qylmystyq isti tergeý aiasynda qalalyq ákimdikte ákimniń qatysýymen jiyn ótti. Onyń qorytyndysy boiynsha Taldyqorǵan ákiminiń orynbasary S.Arzanbekova atalǵan baǵytta tiisti baqylaý jasamaǵany úshin jáne aldyn alý sharasy maqsatynda jumystan bosatyldy",- dep málimdedi Sybailas jemqorlyqqa qarsy qyzmettiń baspasóz qyzmeti.
Taldyqorǵan ákimdiginiń baspasóz qyzmeti basshylardyń biri jumystan ketkenin rastady.
"Arzanbekova shynymen memlekettik qyzmetten bosatyldy. Ol óz erkimen ákim orynbasary qyzmetinen ketý týraly ótinish jazdy. Oǵan ózi jetekshilik etken monitoringtik top músheleriniń ustalýy negiz boldy", - dep naqtylady Taldyqorǵan ákiminiń baspasóz hatshysy Nur Qanatuly.
Eske salsaq, 30 shildede Taldyqorǵanda Sybailas jemqorlyqqa qarsy qyzmet monitoringtik toptyń múshelerin ustady. Olardyń arasynda kásipkerik bóliminiń basshysy men bas mamany bar.
Sheneýnikter pandemiia kezinde buqaralyq sharalardy ótkizýge tyiym salynǵanyna qaramastan, keibir nysandardyń karantindi buzýyna jol bergen. Atap aitqanda, bólim basshysy qaramaǵyndaǵy bas mamanmen aldyn ala kelisip, qala restoratorlary men jappai saýda ókilderinen olarǵa qatysty ákimshilik shara qabyldamaý úshin júieli negizde 20 myńnan 270 myń teńgege deiin para alyp turǵan. Sondai-aq para bergen meiramhanalardyń 5 ákimshisi de qylmystyq jaýapqa tartylady.
Kúdiktiler iri mólsherde aiyppul salynýy ne múlki tárkilenip, jeti jyldan on eki jylǵa deiin bas bostandyǵynan aiyrylýy múmkin.
Derekkóz: sputnik.kz
