قىزىلوردا قالاسىنىڭ №2 سوتىندا وقۋشى قىزدى قۇلدىقتا ۇستاۋعا قاتىستى العاشقى ۇكىم شىقتى. سوتتا ايىپتالۋشى ت.-عا قاتىستى ق ر قك 194-بابى 2-بولىگىنىڭ 1)-تارماعى بويىنشا (قورقىتىپ الۋ) قىلمىستىق ءىس قارالدى، - دەپ حابارلايدى Dalanews.kz قىزىلوردا قالاسىنىڭ №2 سوتىنا سىلتەمە جاساپ.

انىقتالعانى:

سوتتالۋشى ت. وقۋشىنى ماسقارالايتىن مالىمەتتەردى جاريالايمىن دەپ كامەلەتكە تولماعان قىزدان 700 000 تەڭگە اقشا تاۋىپ بەرۋىن تالاپ ەتكەن، سونىمەن قاتار، ونىڭ سومكەسىن الىپ، ىشىندە تۇرعان 35 000 تەڭگە اقشانى قورقىتىپ العان.

سوتتالۋشىنىڭ كىناسى كامەلەتكە تولماعان جابىرلەنۋشىنىڭ بىركەلكى جاۋاپتارىمەن، وقيعا ورنىن قاراپ-تەكسەرۋ تۋرالى حاتتاماسىمەن، بەتتەستىرۋ جۇرگىزۋ حاتتامالارىمەن، سوت پسيحولوگيالىق-پسيحياتريالىق ساراپتاما قورىتىندىسىمەن بەكىتىلدى.

جازا بويىنشا:

سوت ۇكىمىمەن سوتتالۋشى ت. ق ر قك 194-بابى 2-بولىگىنىڭ 1)-تارماعى بويىنشا كىنالى دەپ تانىلدى. قك-تىڭ اتالعان بابىنىڭ سانكسياسى 3 جىلدان 7 جىلعا دەيىن باس بوستاندىعىنان ايىرۋ جازاسىن كوزدەيدى.

قك-نىڭ 55-بابىنىڭ 2-بولىگىنىڭ 2) تارماعىنا ساي، جازانى جەڭىلدەتەتىن ءمان-جايلار بولعان جانە اۋىرلاتاتىن ءمان-جايلار بولماعان كەزدە، جازا مەرزىمى قك-تىڭ ءتيىستى بابىندا كوزدەلگەن ەڭ جوعارى مەرزىمنىڭ 2/3 –نەن اسىرۋعا بولمايدى دەلىنگەن.

ءىس بويىنشا قىلمىستىق جاۋاپتىلىقتى اۋىرلاتاتىن ءمان-جايلار انىقتالماعان.

جەڭىلدەتىلگەن ءمان-جاي رەتىندە ونىڭ بۇرىن سوتتالماعانى جانە جاستىعى ەسكەرىلدى (21 جاس).
ياعني، ەڭ جوعارى جازا 7 جىلدىڭ 2/3-نەن اسپاۋى ءتيىس.

وسىنىڭ نەگىزىندە، سوت سوتتالۋشى ت.-عا 4 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى.

ۇكىم زاڭدى كۇشىنە ەنبەگەن.

ايتا كەتەيىك، بۇل ءىس بويىنشا جالپى 13 فيگۋرانت بار. 11 كۇدىكتى ۇستالعان، ونىڭ بەسەۋى - كامەلەتكە تولماعان.