قىزىلوردا قالاسىندا كوپتەن كۇتكەن شىنى شىعارۋ جانە وڭدەۋ زاۋىتىنىڭ قازىعى قاعىلىپ، قۇرىلىسى باستالدى.
بۇل ءوندىرىس قىزىلوردا قالاسى، تيتوۆ مولتەك اۋدانىندا ورنالاسقان يندۋستريالدىق ايماقتا بوي كوتەرەدى. زاۋىت جىلىنا 197 مىڭ توننادان استام تاباقشا شىنىسىن شىعارماق. شىنى وندىرىسىنە قاجەتتى شيكىزاتتىڭ 95 پايىزى جەرگىلىكتى جەردەن. ياعني، ارال اۋدانىنىڭ كۆارس قۇمى، دولاميت پەن اك تاسى پايدالانىلادى. تەك سىرتتان كەلەتىن كالسييلەندىرىلگەن سودا شيكىزاتىن بولاشاقتا «ارالتۇز» اق-مەن بىرىگە وتىرىپ وڭىرىمىزدە ءوندىرۋ جوسپارلانۋدا.
جوبانىڭ جالپى قۇنى 52،1 ميلليارد تەڭگە. قارجىنىڭ 80 پايىزىن «قازاقستاننىڭ ينۆەستيسيالىق قورى» اق بولسە، قالعان 20 پايىزىن «Steward Engineers» اقش كومپانياسى ينۆەستور رەتىندە قارجىلاندىرماق. ال قۇرىلىس جۇمىستارىن «Orda Glass Ltd» جشس-گى جۇرگىزەتىن بولادى.
- قىزىلوردا قالاسىنداعى يندۋستريالىق ايماقتان اتالعان زاۋىتقا ارناپ 50 گەكتار جەر ءبولىندى. بيۋدجەت ەسەبىنەن نەگىزگى ينجەنەرلىك ينفراقۇرىلىمدار تارتىلدى جانە جوبانى جۇزەگە اسىرۋعا بيىلعى جىلى 1،5 ميلليارد تەڭگە قارجى ءبولىندى. قۇرىلىس الاڭىن تەگىستەۋ، قورشاۋ جۇمىستارى اياقتالدى. بۇگىندە بۇل جەردىڭ ينجەنەرلىك ينفراقۇرىلىمى تولىقتاي شەشىلگەن. ياعني، سۋ، تەلەفون، گاز، كارىز جەلىلەرى تارتىلىپ، تاس جول توسەلدى، - دەدى وبلىس اكىمىنىڭ ورىنباسارى عالىم امىرەيەۆ.
قۇرىلىسشىلار زاۋىت قويماسىنىڭ ىرگەتاسىن قۇيۋ جۇمىستارىن باستادى. قويمانىڭ ۇزىندىعى 300 مەتر، ەنى 150 مەتر. قازىرگى تاڭدا 11 تەحنيكا جۇمىلدىرىلىپ، 30-دان استام ادام ەڭبەك ەتىپ جاتىر. قۇرىلىس جۇمىسى ۇلعايعان كەزدە 200 ادام جۇمىس جاسايتىن بولادى. ال زاۋىت تولىق ىسكە قوسىلعاندا تۇراقتى 300 جاڭا جۇمىس ورنى اشىلماق. زاۋىت 2017 جىلدىڭ قازان ايىندا ىسكە قوسىلاتىن بولادى.
سونىمەن قاتار، وسى زاۋىتتان الداعى ۋاقىتتا «ەكسپو 2017» حالىقارالىق كورمەسى قارساڭىندا ەنەرگيا ۇنەمدەيتىن شىنى شىعارۋ جوسپارلانۋدا.
قىزىلوردا وبلىسى اكىمدىگىنىڭ باسپا ءسوز قىزمەتى
