قىزىلورداداعى QazaqGaz Aimaq فيليالى تابيعي مونوپوليالار تۋرالى زاڭدى بۇزعانى ءۇشىن قايتادان اكىمشىلىك جاۋاپكەرشىلىككە تارتىلىپ، 18،3 ميلليون تەڭگە كولەمىندە ايىپپۇل سالىندى. بۇل تۋرالى تابيعي مونوپوليالاردى رەتتەۋ كوميتەتى مالىمدەدى،- دەپ حابارلايدى Dalanews.kz
بۇعان دەيىن اتالعان فيليال تۇتىنۋشىلاردى گاز جۇيەسىنە قوسۋ ءۇشىن تەحنيكالىق شارتتار بەرگەن كەزدە زاڭدا كوزدەلمەگەن قوسىمشا قۇجاتتاردى تالاپ ەتكەنى ءۇشىن 61،3 ميلليون تەڭگە ايىپپۇل تولەۋگە مىندەتتەلگەن بولاتىن.
وسىلايشا، كومپانياعا سالىنعان جالپى اكىمشىلىك ايىپپۇلدىڭ سوماسى 79،6 ميلليون تەڭگەگە جەتىپ وتىر.
"قىزىلوردا وبلىسى بويىنشا كوميتەت دەپارتامەنتى مەن فيليال اراسىنداعى سوت پروسەستەرى اياقتالعاننان كەيىن، فيليالدىڭ كىناسى تولىق كولەمدە دالەلدەندى. اكىمشىلىك ايىپپۇلدار تولىق كولەمدە تولەنىپ، مەملەكەت بيۋدجەتىن تولىقتىردى"، - دەلىنگەن حابارلامادا.
