قىزىلوردا وبلىسىندا كۇيەۋىنىڭ اتا-اناسىنىڭ اتىنان الاياقتىق جولمەن نەسيە راسىمدەگەن كەلىنشەككە قاتىستى سوت  ۇكىمى شىقتى، دەپ حابارلايدى Dalanews.kz.  

قىزىلوردا قالاسىنىڭ №2 سوتىندا قازاقستان رەسپۋبليكاسىنىڭ قىلمىستىق كودەكسىنىڭ 190-بابىنىڭ 3-بولىگىنىڭ 1)،4)-تارماقتارىمەن سوتتالۋشى ە.-گە قاتىستى قىلمىستىق ءىس قارالدى.

“سوتتالۋشى ە. ۇيالى تەلەفونىنداعى ءموبيلدى قوسىمشاسى ارقىلى قايىن اتاسى مەن ەنەسىنىڭ اقپاراتتىق جۇيەدەن بەيحابار ەكەنىن، قارتتىق جاسىن پايدالانىپ، بەينەكامەراعا ءتۇسىرۋ ارقىلى ەسەپشوتتارىنا زاڭسىز كىرىپ، ۇيالى تەلەفونىنداعى “Halyk bank” ءموبيلدى قوسىمشاسى ارقىلى قايىن اتاسى ج.-نىڭ اتىنان 4 626 167 تەڭگە، ەنەسى ك.ء-نىڭ اتىنان “Kaspi. kz” ءموبيلدى قوسىمشاسى ارقىلى زاڭسىز كىرىپ، 2 190 000 تەڭگە مۇلىكتىك نەسيەلەر راسىمدەپ، ونى اقشاعا اينالدىرىپ، باس پايداسىنا جاراتقان”، - دەپ حابارلاعان وبلىستىق سوت Kazinform اگەنتتىگىنە.

ناتيجەسىندە، جابىرلەنۋشىلەر ج.-عا 4 626 167 تەڭگە، ك.-گە 2 190 000 تەڭگە مۇلىكتىك شىعىن كەلتىرگەنى بەلگىلى بولدى.

سوتتالۋشىنىڭ قىلمىستىق ارەكەتى ءوزىنىڭ كىناسىن مويىنداعان جاۋابىمەن، جابىرلەنۋشىلەردىڭ جاۋاپتارىمەن، بانكتىك انىقتامالارمەن، اۋدارىم تۇبىرتەكتەرىمەن جانە ءىس بويىنشا باسقا دا قۇجاتتارمەن دالەلدەنگەن. سوتتالۋشى ە. مەن جابىرلەنۋشىلەر ج. جانە ك. اراسىندا كىنانى مويىنداۋ تۋرالى مامىلە نىسانىنداعى پروسەستىك كەلىسىم جاسالعان.

باستى سوت تالقىلاۋىندا جابىرلەنۋشى ج. سوتتالۋشى ە.-دەن 4 626 167 تەڭگە زالالدى ءوندىرۋدى سۇراعان، ال جابىرلەنۋشى ك. تالاپ قويۋدان باس تارتقان.

سوت ۇكىمىمەن سوتتالۋشى ە. قازاقستان رەسپۋبليكاسىنىڭ قك-نىڭ 190-بابى 3-بولىگى 1)، 4)-تارماقتارىمەن كىنالى دەپ تانىلىپ، 3 جىل 6 اي مەرزىمگە باس بوستاندىعىن شەكتەۋ جازاسى تاعايىندالىپ، پروباسيالىق باقىلاۋ بەلگىلەنگەن.

ازاماتتىق جاۋاپكەر ە.-دەن ازاماتتىق تالاپكەر ج.-نىڭ پايداسىنا 4 626 167 تەڭگە وندىرىلگەن.