قىزىلوردادا 10 جاستاعى ەلينۇر شامامەن ٷش جىلدان بەرٸ اۋىر ۇيقىسىزدىقتان زارداپ شەگٸپ كەلەدٸ. اناسىنىڭ ايتۋىنشا, بالا بٸر تٷندە بار بولعانى بٸر ساعاتتاي عانا كٶز ٸلە الادى, دەپ حابارلايدى Dalanews.kz «7 ارناعا» سٸلتەمە جاساپ.
ەلينۇردىڭ وتباسى بٸرنەشە مەرتە دەرٸگەرلەرگە جٷگٸنگەن. الايدا جٷرگٸزٸلگەن تەكسەرۋلەر مەن تالداۋلار بالانىڭ دەنساۋلىعىندا ايتارلىقتاي اۋىتقۋلاردى انىقتاماعان. دەرٸگەرلەر تىنىشتاندىراتىن دەرٸلەر تاعايىنداعانىمەن, ولار ايقىن نەتيجە بەرمەگەن.
بالانىڭ اناسى ايناش قايپباەۆا ۇلىنىڭ ۇيقىسى كٷن ٶتكەن سايىن ازايىپ بارا جاتقانىن ايتادى. ونىڭ سٶزٸنشە, تٷنگٸ ۋاقىت بٷكٸل وتباسى ٷشٸن ٷلكەن سىناققا اينالعان.
ال ەلينۇردىڭ ٶزٸ ۇيىقتاعىسى كەلگەنٸمەن, مٷلدە ۇيىقتاي المايتىنىن ايتادى. ەرتە جاتسا دا, تەك تٷن ورتاسىنان كەيٸن عانا كٶزٸ ٸلٸنەدٸ. تاڭەرتەڭ جيٸ باسى اۋىرىپ, كٶزٸ ٸسٸنٸپ, ەلسٸزدٸك سەزٸنەدٸ. كەيدە تٷس كٶرگەندەي بولادى, الايدا ساعاتقا قاراسا, بار بولعانى بٸرنەشە مينۋت قانا ٶتكەنٸن اڭعارادى.
مامانداردىڭ ايتۋىنشا, بۇرىن ۇيقىسىزدىق كٶبٸنە ەگدە جاستاعىلارعا تەن مەسەلە سانالسا, قازٸر بۇل جاعداي بالالار اراسىندا دا جيٸ تٸركەلە باستادى. سەبەپتەردٸڭ بٸرٸ سمارتفوندى شامادان تىس پايدالانۋ بولۋى مٷمكٸن.
