قوستاناي وبلىسىنىڭ مەڭدىقارا اۋداندىق سوتى ي.-گە ەسىمدى تۇرعىنعا قاتىستى قىلمىستىق ءىستى قارادى. ول دەنساۋلىققا قاساقانا اۋىر زيان كەلتىرىپ، ابايسىزدا ادام ولىمىنە سوقتىردى دەپ ايىپتالعان، دەپ حابارلايدى Dalanews.kz.

قايعىلى وقيعا 3 قاڭتار كۇنى كەشكە بولعان. تەرگەۋ نۇسقاسىنا سايكەس، ماس كۇيدە بولعان ەر ادام قىزعانىشتان بىرگە تۇرعان ايەلىن اياۋسىز سوققىعا جىققان. اۋىر جاراقات العان ايەل وقيعا ورنىندا كوز جۇمعان.

سوتتا ايىپتالۋشى كىناسىن تولىق مويىنداپ، جاساعان ىسىنە وكىنەتىنىن ايتتى. پروكۋرور وعان 10 جىل باس بوستاندىعىنان ايىرۋ جازاسىن سۇرادى. جابىرلەنۋشى تاراپ وكىلى زاڭ اياسىندا جازا تاعايىنداۋدى ءوتىندى.

اتالعان باپ بويىنشا 8 جىلدان 12 جىلعا دەيىن باس بوستاندىعىنان ايىرۋ جازاسى قاراستىرىلعان. سونداي-اق مۇلكىن تاركىلەۋ ماسەلەسى دە كوزدەلگەن.

سوت ايىپتالۋشىنىڭ كىناسىن مويىنداۋىن، وكىنۋىن جانە كامەلەتكە تولماعان بالالارىنىڭ بارىن جەڭىلدەتەتىن جاعداي رەتىندە ەسكەردى. ال قىلمىستىڭ الكوگولدىك ماساڭ كۇيدە جاسالۋى اۋىرلاتاتىن ءمان-جاي دەپ تانىلدى.

ناتيجەسىندە سوت ەر ادامدى 8 جىلعا باس بوستاندىعىنان ايىرىپ، كولونياعا جىبەردى. ۇكىم ازىرگە زاڭدى كۇشىنە ەنگەن جوق.