ءۇش بىردەي نىساننىڭ لەنتاسىن قيعان ق ر ءبىلىم جانە عىلىم ءمينيسترى اسلان باكەن ۇلى مەن قازمەمقىزپۋ رەكتورى دينار ءجۇسىپالى قىزى، سونداي-اق سىيلى قوناقتار ءاربىر عيماراتتىڭ ىشكى جابدىقتالۋىمەن تولىقتاي تانىسىپ، زاماناۋي جابدىقتالعان تالاپتارعا ريزاشىلىقتارىن ءبىلدىردى. ستۋدەنتتەردىڭ داستارحانىنان ءدام تاتقان مينيستر شاكىرتتەرمەن تىلدەسىپ، ءوقۋ-بىلىم جايىندا سىر شەرتتى.
«اق شاتىر» جازعى الاڭىندا قۇتتىقتاۋ ءسوز سويلەگەن ا.باكەن ۇلى «قازىرگى تاڭدا قازاقستاندا جاستار ءۇشىن بارلىق جاعداي جاسالىپ وتىر. جىل سايىن مەملەكەت تاراپىنان 150 مىڭ وقۋ گرانتى بولىنەدى. كەلەسى جىلدان باستاپ گرانتپەن وقيتىن ستۋدەنتتەردىڭ ستەپەندياسى 25 پايىزعا وسەدى. تەحنيكالىق ماماندىقتى يگەرىپ، وندىرىستە جۇمىس ىستەيمىن دەگەن جاستار ءۇشىن يندۋستريالاندىرۋ باعدارلاماسى بويىنشا جاڭا جۇمىس ورىندارى، عىلىممەن اينالىسامىن دەگەن شاكىرتتەر ءۇشىن زەرتحانالىق ورىندار اشىلىپ جاتىر. وسى وقۋ ورنىندا وقيتىن ستۋدەنتتەر ۇستازدىق جولدى تاڭداعان. وزدەرىڭىز بىلەسىزدەر، ءمۇعالىمنىڭ ءرولى وتە مارتەبەلى. ۋنيۆەرسيتەتتى ءبىتىرىپ، مەكتەپكە باراتىن ستۋدەنتتەرگە جاقسى جاڭالىق بار. ەلباسىنىڭ شەشىمىمەن كەلەسى جىلدان باستاپ مۇعالىمدەردىڭ جالاقىسى 30-50 پايىزعا وسەتىن بولادى. سوندىقتان، جاستار ءۇشىن بارلىق جاعداي جاسالىپ وتىر. تەك قانا جاقسى وقىپ، ەڭبەك ەتۋىمىز كەرەك. وسىنداي كەرەمەت عيماراتتار اشىلا بەرسىن. قازاقستانىمىز وركەندەي بەرسىن!» – دەگەن جۇرەكجاردى تىلەگىن ايتتى. سونىمەن قاتار، سالتاناتتى جيىندا ءۇش بىردەي نىساننىڭ قۇرىلىسىن جاساقتاعان ۋنيۆەرسيتەت باسشىلىعىنا العىسىن ءبىلدىرىپ، جاڭا وقۋ جىلىنا تابىس تىلەدى.
450 ورىنعا ارنالعان جاڭا جاتاقحانا ەلباسىنىڭ تاپسىرماسىنا وراي ستۋدەنتتەردى جاتاقحانامەن قامتۋ ماسەلەسىنە باعىتتالعان «ستۋدەنتتىك باسپانا» مەملەكەتتىك باعدارلاماسىنىڭ اياسىندا سالىندى. زامان تالاپتارىنا ساي سالىنعان جاتاقحانا جاڭا جيھازدارمەن تولىق جابدىقتالعان، ينفراقۇرىلىمدىق مۇمكىندىگى وتە جوعارى. ءبىرىنشى قاباتىندا قىزدارعا ارنالعان مەديسينالىق ورتالىق ورنالاسقان. سونىمەن قاتار، قىزداردىڭ ءسان سالونى، جاتتىعۋعا ارنالعان فيتنەس زالى، كومپيۋتەر، دەمالىس بولمەلەرى جۇمىس ىستەيدى. ءار قاباتتا كىر جۋاتىن بولمەلەر، كەرەك-جاراقتارمەن جابدىقتالعان اسۇيلەر بار. زاماناۋي تەلەكوممۋنيكاسيالىق جەلى، Wi-Fi سىمسىز جەلىلەرى تارتىلعان. ءبىر سوزبەن ايتقاندا، جاڭا ستۋدەنتتەر ۇيىندە بويجەتكەندەردىڭ بوس ۋاقىتتى ۇتىمدى وتكىزۋلەرىنە بارلىق جاعداي ويلاستىرىلعان. قىزدار ۋنيۆەرسيتەتىندە ەلىمىزدىڭ بارلىق الىس ايماقتارىنان كەلەتىن ستۋدەنت-قىزداردىڭ كوپ كەلىپ وقيتىنىن ەسكەرسەك، بۇل مەملەكەتتىڭ ۇلت تاربيەشىلەرىنە دەگەن قامقورلىعى ەكەنى انىق.
ءجۇزۋ باسسەينى جاستاردىڭ دەنساۋلىعىن جاقسارتۋ ماقساتىن كوزدەيتىن «سالاماتتى قازاقستان» باعدارلاماسى اياسىندا ۋنيۆەرسيتەتتىڭ قارجىسىنا بوي كوتەردى. ەلىمىز ءۇشىن دەنى ساۋ، رۋحى تازا ۇرپاق ءوسىرىپ تاربيەلەۋ دە ەڭ ماڭىزدى دا نەگىزگى ماسەلە. ەلباسى ن.ءا.نازاربايەۆ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» جولداۋىندا «سالاۋاتتى ءومىر سالتىن قالىپتاستىرۋ – ۇلت دەنساۋلىعىنىڭ كىلتى بولىپ تابىلادى. ءبىز بالالارىمىزدىڭ دەنساۋلىعىن قامتاماسىز ەتۋگە جاڭا تاسىلدەر ەنگىزۋ ماسەلەسىمەن جۇمىس جۇرگىزۋىمىز قاجەت، جاستار دەنساۋلىعىنا ءمان بەرۋىمىز كەرەك»، – دەگەن بولاتىن. وسى ورايدا، پايدالانۋعا بەرىلەتىن ءجۇزۋ باسسەينى سپورتپەن اينالىسۋعا، دەنى ساۋ ۇرپاق قالىپتاستىرۋعا، جاستاردىڭ سالاۋاتتى ءومىر سالتىن ۇستانۋىنا ءوز ىقپالىن تيگىزەرى ءسوزسىز.
ءۇشىنشى نىسان «اق شاتىر» جازعى ويىن-ساۋىق الاڭى – ەلوردادا ورنالاسقان «حان شاتىرى» ىسپەتتى سالىنعان. كەڭ دە اسەم ءارى ۇلتتىق ناقىشتا تۇرعىزىلعان الاڭنىڭ ىشكى ساۋلەتى قازاق ءۇي سياقتى اسپەتتەلىپ، توبەسىندەگى شاڭىراققا اينالا ۋىقتار قويىلعان.
بۇگىندە وتاندىق ءبىلىم سالاسىنىڭ دامۋى مەملەكەتتىك ساياساتتىڭ باستى جانە نەگىزگى باعىتى. مەملەكەت قاشاندا ءبىلىم بەرۋ ماسەلەسىنە ەرەكشە ماڭىز بەرىپ، ستۋدەنتتەردىڭ باسەكەگە قابىلەتتى بولىپ شىعۋى ءۇشىن بارلىق جاعدايلاردى جاساپ كەلەدى. اتالمىش نىسانداردىڭ بوي كوتەرۋى سونىڭ ناقتى دالەلى. «جاڭا جاتاقحانا مەن باسسەيننىڭ پادالانۋىنا بەرىلگەنىنە وتە قۋانىشتىمىن. قىزداردىڭ ءبىلىم الۋىنا بارلىق جاعداي بار. ءاربىر نىسان ەرەكشە. جاتاقحانا جايلى. بىلتىر 70 جىلدىق مەرەيتويدا «قازاق ارۋى» اتتى سۋبۇرقاق سالىنسا، بيىل، مىنە، ءۇش بىردەي نىسان قىزدار قالاشىعىنىڭ ءسانىن كىرگىزدى»، – دەيدى قازمەمقىزپۋ ستۋدەنتتەر اليانسىنىڭ ءتورايىمى ءنۇريلا جۇمانقۇل قىزى. ستۋدەنتتەر پايدالانۋعا بەرىلگەن جاڭا عيماراتتاردان قازاقستاننىڭ دامۋىنا زور ۇلەس قوساتىن تۇلعالاردىڭ شىعاتىنىنا زور سەنىم ارتىپ وتىر.
الماتىنىڭ اق جاۋىنىندا قوناقتار مەن ستۋدەنتتەرگە قورعان بولعان «اق شاتىردىڭ» استىندا اسلان باكەن ۇلى بارشا قوناقتارمەن جانە ستۋدەنتتەرمەن بىرگە قىزدار ۋنيۆەرسيتەتى ونەرپازدارىنىڭ سالتاناتتى كونسەرتىن تاماشالادى.
«قىزدار ۋنيۆەرسيتەتى» مەديا ورتالىعى
