قىزدار ۇلتتىق پەداگوگيكالىق ۋنيۆەرسيتەتى جاڭا وقۋ جىلىنا دايىن

Dalanews 31 تام. 2021 16:28 439

«ەلىمىزدەگى ەڭ ىرگەلى جوعارى وقۋ ورىندارىنىڭ ءبىرى – قازاق ۇلتتىق قىزدار پەداگوگيكالىق ۋنيۆەرسيتەتىندە 2021-2022 وقۋ جىلى قالاي ۇيىمداستىرىلادى؟»، «جاڭا وقۋ جىلىندا قانداي وزگەرىستەر بولماق؟»، «ونلاين جانە ءداستۇرلى فورماتتاردا كىمدەر وقيدى؟» دەگەن ساۋالدارعا جاۋاپ تابۋ ماقساتىندا اتالعان وقۋ ورنىنىڭ باسپا ءسوز جانە قوعاممەن بايلانىس ءبولىمىنىڭ باسشىسى جاندار اسانمەن سۇحباتتاسقان ەدىك.

 

– جاندار تۇرار ۇلى، قازاق ۇلتتىق قىزدار پەداگوگيكالىق ۋنيۆەرسيتەتىندە 2021-2022 وقۋ جىلى قالاي ۇيىمداستىرىلادى؟

– قىزدار ۋنيۆەرسيتەتىندە جاڭا وقۋ جىلىندا دارىستەر مەن ۇلكەن اعىمداعى ساباقتار Microsoft Teams پلاتفورماسى ارقىلى ونلاين رەجىمدە جۇرگىزىلەدى. لەكسيا كەزىندە توپتىڭ 50% ونلاين رەجىمدە، 50% وفلاين رەجىمدە ءبىلىم الادى. «دەنە شىنىقتىرۋ» ءپانى ساباقتان تىس ۋاقىتتا وتكىزىلەدى. ەسكەرەتىن جايت، توپتا 1 ستۋدەنت اۋىرعان جاعدايدا توپقا كارانتين جاريالانادى جانە بۇكىل توپ ونلاين رەجىمگە اۋىسادى. وقۋ فورماتىنا قاراماستان ستۋدەنتتەر جەكە كابينەتتە ورنالاستىرىلعان ءپاننىڭ بارلىق تاپسىرمالارىن ورىنداۋلارى قاجەت.

– سىزدەردىڭ ۋنيۆەرسيتەتتەرىڭىزدە بيىل وفلاين فورماتتا كىمدەر ءبىلىم الادى؟

– 2021-2022 وقۋ جىلىندا قازاق ۇلتتىق قىزدار پەداگوگيكالىق ۋنيۆەرسيتەتىندە وقۋ ۇدەرىسى وفلاين جانە ونلاين فورماتتا جۇزەگە اسىرىلادى. ال وفلاين وقىتۋعا ەكپەنىڭ ەكى دوزاسىن العان 1 كۋرس ستۋدەنتتەرى (18 جانە ودان جوعارى جاستاعىلار)، ەكپەنىڭ ەكى دوزاسىن العان 2،3،4 كۋرس ستۋدەنتتەرى، «كوك» نەمەسە «جاسىل» ءتۇستى مارتەبەسى بار ءبىلىم الۋشىلار. وسى رەتتە ايتا كەتەيىن، قىزدار ۋنيۆەرسيتەتى ەلىمىزدەگى جوعارى وقۋ ورىندارىنىڭ اراسىندا العاشقىلاردىڭ ءبىرى بولىپ «Ashyq» قوسىمشاسىن ىسكە قوستى. باستى ماقسات – وقۋ ورنى اۋماعىندا كوروناۆيرۋس ىندەتىن تاراتپاۋعا كەپىلدىك بەرۋ ءۇشىن جانە قاۋىپسىزدىكتى ارتتىرۋ. وقۋ ورنىنا تيەسىلى عيماراتتارعا كىرۋ ءۇشىن ارنايى QR-كودتى سكانەرلەپ، ونى كىرەبەرىستە كورسەتۋ كەرەك. قوسىمشا ءوز كەزەگىندە قىزىل، سارى، كوك جانە جاسىل ستاتۋستارعا بولىنەتىن قاتەر رەيتينگىن كورسەتەدى. بۇل پيلوتتىق جوبانى ۋنيۆەرسيتەتكە ەنگىزۋىمىزدىڭ وزىندىك سەبەپتەرى بار. ەڭ نەگىزگىسى – وقۋ ورنى قىزمەتكەرلەرى اراسىندا ۆيرۋستىڭ تارالۋىنا توسقاۋىل قويۋ. قىزدار ۋنيۆەرسيتەتى ءبىلىم الۋشىلاردىڭ جانە وقۋ ورنى قىزمەتكەرلەرىنىڭ دەنساۋلىعىنىڭ قاۋىپسىزدىگىن قامتاماسىز ەتۋگە تىرىسادى.

– دۇرىس ەكەن. ال ونلاين فورماتتاعى وقۋدى كىمدەر جالعاستىرادى؟

– جاڭا وقۋ جىلىندا ريسك توبىنداعى ءبىلىم الۋشىلار وقۋدى ونلاين فورماتتا جالعاستىرادى.  ريسك توبىنا كىمدەر كىرەدى؟ ەڭ بىرىنشىدەن، ۆاكسينا الۋعا جىبەرىلمەگەن 17 جاسقا تولماعان ستۋدەنتتەر، ەكىنشىدەن، اياعى اۋىر ستۋدەنتتەر. بۇل ساناتتاعى ءبىلىم الۋشىلار جۇكتىلىكتىڭ ۇلكەن مەرزىمى بولعان جاعدايدا اكادەميالىق دەمالىسقا شىعارىلادى. ۇشىنشىدەن، 1 جاسقا دەيىن بالالارى بار ستۋدەنتتەر. بۇلار دا ارنايى شەشىم بويىنشا اكادەميالىق دەمالىسقا شىعارىلادى. تورتىنشىدەن، ۆاكسينا الۋعا رۇقسات بەرىلمەگەن مەديسينالىق بوساتۋى بار ستۋدەنتتەر. بەسىنشىدەن، ءوزى نەمەسە جانۇياسى كارانتيندەگى ستۋدەنتتەر.

– جاندار تۇرار ۇلى، سوڭعى سۇراق. جاڭا وقۋ جىلىندا جاتاقحانادا كىمدەر تۇرا الادى؟

– ءومىرىڭىزدىڭ ەڭ اسەرلى شاعى – ستۋدەنتتىك كەزەڭ بولسا، ستۋدەنتتىك ءومىردىڭ قىزىعى – جاتاقحانا ەكەندىگى بەلگىلى. ەستەن كەتپەس حيكايالار مەن قايتالانباس وقيعالار ستۋدەنتتىڭ ەكىنشى ۇيىندەي بولىپ كەتكەن جاتاقحانا قابىرعاسىندا وتەتىنى بەلگىلى. ارۋلار ورداسى – قازاق ۇلتتىق قىزدار پەداگوگيكالىق ۋنيۆەرسيتەتىنە تيەسىلى 7 ستۋدەنت ءۇيى بار.  2021-2022 وقۋ جىلىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ جاتاقحانالارىندا ەكپەنىڭ ەكى كومپونەنتىن العان ستۋدەنتتەر، جەتىم، اتا-اناسىنىڭ قامقورلىعىنسىز قالعان بالالار، كوپ بالالى جانە از قامتىلعان وتباسىلاردىڭ بالالارى، مۇگەدەكتىگى بار بالالار جانە جوعارىدا اتاپ وتكەن ريسك توبىنا كىرمەيتىن ستۋدەنتتەر تۇرا الادى.

– جاڭا وقۋ جىلىنداعى ءسىز اتاپ وتكەن جاڭاشىلدىقتار ءبىلىم الۋشىلارعا جان-جاقتى ءتۇسىندىرىلىپ جاتقان بولار...

– ارينە. ءبىز ءبىلىم الۋشىلاردى ساۋاتتى ءارى ناقتى اقپاراتقا عانا سەنۋگە شاقىرىپ جاتىرمىز. وسى رەتتە ۋنيۆەرسيتەتتىڭ باسقارما ءتوراعاسى – رەكتور گۇلميرا ءامىرحان قىزى، اكادەميالىق قىزمەت جونىندەگى پرورەكتور ەركىن جۇمانقۇلوۆا بارلىق ينستيتۋتتىڭ ستۋدەنتتەرىمەن، ولاردىڭ اتا-انالارىمەن، ماگيسترانت جانە دوكتورانتتارمەن ونلاين فورماتتا كەزدەسۋلەر وتكىزۋدە. Microsoft Teams جەلىسىندە ۇيىمداستىرىلعان ونلاين جيىنداردا «جاڭا وقۋ جىلى قانداي فورماتتا ۇيىمداستىرىلادى؟» «2021-2022 وقۋ جىلىندا قانداي وزگەرىستەر بولماق؟»، «جاڭا وقۋ جىلىندا جاتاقحانادا كىمدەر تۇرا الادى؟»، «ءبىلىم الۋشىلار ءۇشىن ۆاكسيناسيا مىندەتتى مە؟»، «وفلاين وقىتۋعا كىمدەر جىبەرىلەدى؟» سىندى ساۋالدارعا جان-جاقتى جاۋاپ بەرىلدى. سونىمەن قاتار كەزدەسۋ بارىسىندا ستۋدەنتتەر مەن ولاردىڭ اتا-انالارىنا ۋنيۆەرسيتەت باسشىلىعىنا مازالاپ جۇرگەن سۇراقتارىن قويىپ، ناقتى جاۋاپ الۋعا مۇمكىندىك بەرىلدى. اتاپ وتەرلىگى، جاڭا وقۋ جىلى قارساڭىندا وسى تاقىلەتتەس جيىندار تۇراقتى تۇردە وتكىزىلمەك. سونداي-اق تىكەلەي ەفير بارىسىندا كەلىپ تۇسكەن ساۋالداردىڭ بارلىعى ىرىكتەلىپ، جاۋاپتارى ۋنيۆەرسيتەتتىڭ الەۋمەتتىك جەلىدەگى رەسمي پاراقشالارىندا جاريالاناتىن بولادى.

– جاڭا وقۋ جىلىندا 80 جىلدىق تاريحى بار الما-ماتەردىڭ ۇجىمى مەن ءبىلىم الۋشىلارىنا دەگەن تىلەگىڭىزدى بىلسەك...

– قازىرگى كۇندە الەمدە ءتورت مىڭنان استام ماماندىق بار. سونىڭ ىشىندە ۇستازدىق قىزمەت – قانداي قوعام، قانداي زاماناۋي وزگەرىستەر بولماسىن، ءبىلىم بەرۋ سالاسىندا ماڭىزدى ءرول اتقارىپ قالا بەرمەك. حالقىمىزدىڭ داڭقتى پەرزەنتى ماعجان جۇمابايەۆ: «التى الاشتىڭ بالاسى باس قوسقان جەردە ەڭ ءقادىرلى ورىن – ۇستازدىكى» دەگەن دانا وي قالدىرعان. ۇلى اقىننىڭ ۇلاعاتتى ءسوزى تەحنيكا مەن تەحنولوگيا قارىشتاپ دامىعان بۇگىنگى كۇندە دە ءوز ومىرشەڭدىگىن جويعان ەمەس. قوعامعا ادال قىزمەت ەتەتىن كادرلاردى دايارلاۋدا باستى ءرول اتقاراتىن ارىپتەستەرىمىزدى جاڭا وقۋ جىلىنىڭ باستالۋىمەن شىن جۇرەكتەن قۇتتىقتايمىن! بۇل مەرەكە – جاڭا ىزدەنىستەردىڭ، جاڭا باستامالاردىڭ، جاڭا يدەيالاردىڭ سيمۆولى. سوندىقتان دا بۇل مەيرامنىڭ ءاربىر ادام ومىرىندە  الار ورنى ەرەكشە. جاڭا وقۋ جىلى بارشاڭىزدى جاڭا جەتىستىكتەرگە جەتەلەسىن. وقۋدا دا، ەڭبەكتە دە الدا بولايىق.

– جاندار تۇرار ۇلى، اڭگىمەڭىزگە راقمەت! تابىس تىلەيمىز!

ۇسىنىلعان
سوڭعى جاڭالىقتار