الەۋمەتتىك جەلىدە پروديۋسەر بايان الاگۋزوۆا جاريالاعان جازبادان كەيىن «قىز جىبەك» فيلمىندەگى كوستيۋمگە قاتىستى جاعداي تەكسەرىلىپ جاتىر، دەپ حابارلايدى Dala News.
مادەنيەت جانە اقپارات مينيسترلىگىنىڭ مالىمەتىنشە، «قازاقفيلم» كينوستۋدياسىنىڭ مۋزەي قورىندا فيلمدە پايدالانىلعان ءبىر ءتۇپنۇسقا كامزول ساقتاۋلى.
اتالعان ەكسپونات ۇلتتىق كينەماتوگرافيانىڭ ماڭىزدى مادەني مۇراسى رەتىندە قورعالادى.
ال پروديۋسەر اتاپ وتكەن ەكىنشى كامزولدىڭ جەكە ادامداردىڭ قولىنا قالاي تۇسكەنى قازىرگى ۋاقىتتا انىقتالىپ جاتىر.
ۆەدومستۆونىڭ مالىمەتىنشە، قازاقفيلم كينوستۋدياسى تاريحي قۇندىلىعى بار رەكۆيزيتتەر مەن كوستيۋمدەردى جيناۋ، قالپىنا كەلتىرۋ جانە ساقتاۋ جۇمىستارىن جۇيەلى تۇردە جۇرگىزىپ كەلەدى.
بۇل جۇمىس ۇلتتىق مادەني مۇرانى ساقتاپ، كەلەر ۇرپاققا جەتكىزۋگە باعىتتالعان.
سونىمەن قاتار، كينوستۋديا جانىنان زاماناۋي تالاپتارعا ساي ءىرى مۋزەي اشۋ جوسپارلانىپ وتىر. وندا وتاندىق كينو تاريحىنا قاتىستى بىرەگەي ەكسپوناتتار قويىلادى.
مينيسترلىك مادەني قۇندىلىقتاردى ساقتاۋ مەن قورعاۋ ماسەلەسىنە ەرەكشە ءمان بەرىلەتىنىن اتاپ ءوتتى جانە قوعامعا اشىق ءارى ناقتى اقپارات بەرۋگە دايىن ەكەنىن مالىمدەدى.
