باتىس ەلدەرىنىڭ كوبى بەيجىڭ شىڭجاڭدا ۇيعىر، قازاق جانە باسقا دا مۇسىلمانداردى لاگەرگە قاماپ، ءتۇرلى تەحنولوگيالارمەن اڭديدى دەپ ايىپتايدى.
تەحنولوگيانىڭ اۆتورىنىڭ ءبىرى (ءاتى-جونىن ايتقىسى كەلمەگەن) ۆۆس سايتىنا كامەرا ارقىلى ادامنىڭ كوڭىل-كۇيىن انىقتايتىن تەحنولوگيانىڭ قالاي قولدانىلعانى جايلى دالەلدەر ۇسىنعان. ونىڭ سوزىنشە، ارنايى تەحنولوگيا كامەرا ارقىلى قاماۋداعىلاردىڭ ءدال قازىرگى كوڭىلىن انىقتاۋعا تىرىسادى. ۆۆس دەرەككوزى بۇل كامەرانى جەتىلگەن «جالعاندىق دەتەكتورى» دەپ سيپاتتادى.
جۇيە قاماۋداعى ادامنىڭ ەموسياسىن انىقتاپ، سول ۋاقىتتا ونىڭ كوڭىل-كۇيى بولماي وتىرسا بىردەن ەسەپ بەرەدى. ۆۆس دەرەككوزىنىڭ سوزىنشە، بۇل دەرەكتەر قامالعاندارعا قاتىستى سوت شەشىمدەرىن شىعارۋعا نەگىز بولعان.
الەمدە مۇنداي كامەرالار 2010 جىلدان بەرى قولدانىلىپ كەلەدى. كامەرانى جاساۋشىلار پسيحولوگتار ادامنىڭ جاسىرىن ەموسياسىن كىشكەنە قيمىلدارىنان انىقتاي الادى، دەمەك كومپيۋتەر الگوريتمى دە كامەرا ارقىلى ادامنىڭ ەموسياسىن كورە الادى دەپ سانايدى.
باتىس ەلدەرىندە مۇنداي كامەرالار ساتىپ الۋشى مەن ساتۋشىنىڭ كوڭىل-كۇيىن انىقتاۋعا پايدالانادى 2018 جىلى بريتانيالىق Kantar Millward Brown كونسالتينگ اگەنتتىگى ادامنىڭ جارناما كورگەندەگى ەموسياسىن انىقتاۋ ءۇشىن قولدانعان. رەسەيدە مۇنداي تەحنولوگيا بانكتەردە، اقش-تا Disney كورپوراسياسىندا بار. Disney بۇل كامەرانى فيلمدەرىنىڭ پرەمەراسىنا دەيىن باعالاۋعا قولدانادى.
عالىمدار ادامنىڭ كوڭىل-كۇيىن انىقتاۋعا كۇمانمەن قارايدى. امەريكالىق پسيحولوگ پول ەكمان Financial Times باسىلىمىنا بەرگەن سۇحباتىندا «بۇل تەحنولوگيانى جاساۋشىلار ونىڭ تيىمدىلىگىن عىلىمي تۇرعىدان دالەلدەگىسى كەلمەيدى» دەگەن.
ال قۇقىق قورعاۋشىلار ۇكىمەتتەر بۇل كامەرانى قوعامعا باقىلاۋ ورناتۋ ءۇشىن پايدالانۋى مۇمكىن دەپ قاۋىپتەنەدى. ولار كامەرا دۇرىس جۇمىس ىستەمەسە بيلىك تەحنولوگيا بەرگەن اقپارات نەگىزىندە قاتە شەشىم شىعارادى دەپ سانايدى.
جۇڭگو بيلىگى مۇسىلماندار تۇراتىن شىڭجاڭ وڭىرىندە كوپ كامەرا ورناتقان. بەيجىڭ شىڭجاڭداعى گەنوسيد ايىپتاۋىن جوققا شىعارىپ، لاگەرلەردى كاسىپ مەڭگەرۋ ورتالىعى دەيدى.
