ول حالىقتى مەملەكەتتىك مەكەمەلەرگە شابۋىل جاساۋعا شاقىرۋعا، زاڭسىز بيزنەس جۇرگىزۋگە، زاڭسىز جەر باسىپ الۋعا جانە ارازدىقتى قوزدىرۋ باپتارى بويىنشا ايىپتالعان.
67 جاستاعى سۋن – 9 مىڭ ادام جۇمىس ىستەيتىن اۋىل شارۋاشىلىعى كاسىپورنىنىڭ باسشىسى.
ول 2019 جىلى 100 ميلليونداي شوشقا ولىمىنە سەبەپ بولعان شوشقا تۇماۋىنىڭ ماسشتابىن جاسىرعانى ءۇشىن جۇڭگو ۇكىمەتىن اشىق سىناعان.
وسىدان كەيىن مەملەكەت ونىڭ جەر ۋچاسكەسىن تارتىپ الا باستاعان. Reuters حابارلاعانداي، ونىڭ قىزمەتكەرلەرى سوۆحوز عيماراتتارىنىڭ سۇرىلۋىنە قارسى شىعىپ، پوليسيامەن قاقتىعىستا جاراقات العان.
جۇڭگو قۇقىق قورعاۋشىلارى سۋن ادام قۇقىقتارىن قولداعانى ءۇشىن جازاعا تارتىلعانىن ايتادى.
"ابدەن جەمقورلانعان شەنەۋنىكتەر، بيلىكتەگى قۇرىعى ۇزىن تۇلعالارعا سوت جوق. ولار زاڭعا باعىنبايدى. قاراپايىم تۇرعىندار بەرەكەسىزدىكتەن قاجىدى. حالىق ەلدە ءتارتىپ ورناعانىن، جوعارىداعى تۇلعالاردىڭ زاڭعا باعىنعانىن قالايدى. جىل وتكەن سايىن قىتايلاردىڭ زاڭدىق ساۋاتى ارتىپ كەلەدى. بۇرىندا قانداي دا ءبىر ماسەلە تۋىنداسا ولار تامىر-تانىسىنا جۇگىنەتىن ەدى، ءقازىر ساۋاتتى زاڭگەر جالداۋعا تىرىسادى. بۇل دا بولسا ەلدىڭ ويانعانىنىڭ بەلگىسى"، – دەگەن بولاتىن سۋن داۆۋ.
سۋن جۇڭگو ۋنيۆەرسيتەتتەرىندە لەكسيا وقىپ، قايىرىمدىلىق ىستەرىمەن اينالىسىپ كەلگەن. اۋرۋحانا مەن مەكتەپتەر سالۋدى قارجىلاندىرعان.
