Qytaidyń Kommýnistter partiiasyn ashyq synap júrgen milliarder Sýn Davý 18 jylǵa túrme jazasyna kesilip, 3 million iýan aiyppul tóleýge mindettendirildi.
Ol halyqty memlekettik mekemelerge shabýyl jasaýǵa shaqyrýǵa, zańsyz biznes júrgizýge, zańsyz jer basyp alýǵa jáne arazdyqty qozdyrý baptary boiynsha aiyptalǵan.
67 jastaǵy Sýn – 9 myń adam jumys isteitin aýyl sharýashylyǵy kásipornynyń basshysy.
Ol 2019 jyly 100 milliondai shoshqa ólimine sebep bolǵan shoshqa tumaýynyń masshtabyn jasyrǵany úshin qytai úkimetin ashyq synaǵan.
Osydan keiin memleket onyń jer ýchaskesin tartyp ala bastaǵan. Reuters habarlaǵandai, onyń qyzmetkerleri sovhoz ǵimarattarynyń súrilýine qarsy shyǵyp, politsiiamen qaqtyǵysta jaraqat alǵan.
Qytai quqyq qorǵaýshylary Sýn adam quqyqtaryn qoldaǵany úshin jazaǵa tartylǵanyn aitady.
"Ábden jemqorlanǵan sheneýnikter, biliktegi quryǵy uzyn tulǵalarǵa sot joq. Olar zańǵa baǵynbaidy. Qarapaiym turǵyndar berekesizdikten qajydy. Halyq elde tártip ornaǵanyn, joǵarydaǵy tulǵalardyń zańǵa baǵynǵanyn qalaidy. Jyl ótken saiyn qytailardyń zańdyq saýaty artyp keledi. Burynda qandai da bir másele týyndasa olar tamyr-tanysyna júginetin edi, qazir saýatty zańger jaldaýǵa tyrysady. Bul da bolsa eldiń oianǵanynyń belgisi", – degen bolatyn Sýn Davý.
Sýn qytai ýniversitetterinde lektsiia oqyp, qaiyrymdylyq isterimen ainalysyp kelgen. Aýrýhana men mektepter salýdy qarjylandyrǵan.
Sońǵy ýaqytta Qytai biligi biznesti qatty qysymǵa alýda. Qazir Alibaba, Didi jáne Tencent sekildi alpaýyt kompaniialardyń ústinen qylmystyq is qozǵalǵan.
Alibaba kompaniiasynyń negizin qalaǵan Djek Ma biliktiń saiasatyn ashyq synaǵan bolatyn, artynsha milliarder birneshe ai boiyna el kózinen joǵalyp ketken.
2020 jyly Qytaida jyljymaityn múlik magnaty, bloger Jen Chjitsian 18 jylǵa bas bostandyǵynan aiyrylǵan.
Beijiń soty "Huayuan Real Estate Grour" memlekettik qurylys kompaniiasynyń burynǵy basshysyn "korrýptsiia, paraqorlyq, memleket múlkin jymqyrý, qyzmet babyn asyra paidalaný" baptary boiynsha kináli dep tapqan.
