جۇڭگو دەنساۋلىق ساقتاۋ جونىندەگى ۇلتتىق كوميسسياسىنىڭ حابارلاۋىنشا، 8 جەلتوقسان مەن 12 قاڭتار ارالىعىندا 59 938 ادام قايتىس بولعان، ولاردىڭ ولىمىنە كوروناۆيرۋسپەن بايلانىستى سەبەپتەر تۇرتكى بولعان: 5،5 مىڭى كوروناۆيرۋس ينفەكسياسىنا بايلانىستى تىنىسى تارىلىپ، تۇنشىعىپ ولگەن. قالعانىندا كوروناۆيرۋس ينفەكسياسى مەن وزگە اۋرۋ تۇرلەرى بولعان. دەسە دە، جۇڭگو ساراپشىلارى ىندەتتىڭ تارالۋ شەگى ءوتىپ كەتتى دەپ سانايدى.
بۇعان دەيىن جۇڭگو بيلىگى ىندەت باستالعالى بەرى ەلدە شامامەن 5 مىڭ ادام ولگەنىن، ال 2022 جىلى جەلتوقساندا ون مىڭعا جۋىق ءولىم تىركەلگەنىن مالىمدەگەن.
وسى اپتادا دۇنيەجۇزىلىك دەنساۋلىق ساقتاۋ ۇيىمى پەكيندى ادام ءولىمىن جاسىرىپ وتىر دەپ ايىپتادى.
جەلتوقسان سوڭىندا بريتان Airfinity تالداۋ كومپانياسى قىتايدا كۇنىنە شامامەن 9 مىڭ ادام كوروناۆيرۋستان قايتىس بولعان بولۋى مۇمكىن دەپ تۇجىرىمداعان. Bloomberg تە قىتايدا كرەماتورييلەردىڭ تولىپ كەتكەنىن جازعان.
جۇڭگو بيلىگى بىلتىر جىل سوڭىندا جاپپاي نارازىلىقتان كەيىن كوروناۆيرۋس شەكتەۋلەرىن جۇمسارتا باستاعان. وسىدان سوڭ ەلدە كوروناۆيرۋس جۇقتىرعاندار كۇرت ارتقان. ەپيدەميولوگتاردىڭ پىكىرىنشە، جۇڭگو بيلىگى قاتاڭ شەكتەۋلەر قويىپ، ناۋقاستاردى قوعامنان قاتتى الشاقتاتقاننان كەيىن تۇرعىنداردا كوروناۆيرۋسقا قارسى يممۋنيتەت قالىپتاسىپ ۇلگەرمەگەن.
