[caption id="attachment_19106" align="alignright" width="274"]
ءالنۇر تورگە ۇلى[/caption]
بۇعان دەيىن ميلليارد حالقى بار جۇڭگو حالىق رەسپۋبليكاسى اتىنان وليمپياداعا ەكى ەتنيكالىق قازاق – بالۋان ءالنۇر تورگە ۇلى مەن بوكسشى قانات يسلام افينى وليمپياداسىنا قاتىسقان بولاتىن. قانات يسلام 2008 جىلى بەيجىڭ وليمپياداسىنا ەكىنشى رەت قاتىسىپ، قولاعا يە بولعان.
[caption id="attachment_19107" align="alignleft" width="319"]
قانات يسلام[/caption]
ريو وليمپياداسىنا جۇڭگو قۇراماسى اتىنان جارىسقا قاتىساتىن ەرلانبەك كاتەي ۇلى 1985 جىلى التاي ايماعى قىزىلتاس قالاشىعىندا دۇنيەگە كەلگەن. 2000 جىلدان بەرى كۇرەسكە قاتىسىپ، اۋدان، ايماق، ولكەلىك جارىستاردا توپ جارعان بالۋان. 2008 جىلى جۇڭگو مەملەكەتتىك جارىسىندا كۇمىس، 2009 جىلى قولا مەدالعا يە بولعان. 2010 جىلى بۋداپەشت قالاسىندا وتكەن الەمدىك جارىستا قولاعا يە بولعان. ول 2012 جىلى فينليانديادا وتكەن حالىقارالىق جارىستا ءۇشىنشى ورىنعا كوتەرىلىپ، ءوز قۇراماسىنىڭ باعىن ۇستەم ەتۋگە ۇلەس قوسقان. ودان كەيىن دە ونىڭ العان مەدالدارى جەتەرلىك. جۇڭگو، ازيا، ەۋروپا جانە الەمدىك دوستىق جانە رەسمي كەزدەسۋلەردە سان مارتە جۇلدەلى ورىندارعا يە بولعان ايتۋلى بالۋان. 2016 جىلى كوكتەمدە استانادا وتكەن وليمپياداعا ىرىكتەۋ جارىسىندا وليمپياداعا قاتىسۋ مۇمكىندىگىنە يە بولدى.
[caption id="attachment_19108" align="alignleft" width="178"]
ە. كاتەي ۇلى[/caption]
نۇرلان داۋلەتحان ۇلىنىڭ ايتۋىنشا: «ەرلانبەك كۇشى مەن مىسى وزىنە ساي بالۋان. ول بوز كىلەمدە ءوزىن ەركىن سەزىنە وتىرىپ، قارسىلاسىنىڭ بارلىق امال-تاسىلدەرىن الدىن الا بولجاي بىلەدى».
ول ەرلانبەك كاتەي ۇلىنىڭ وسى وليمپيادادا جۇلدە الۋ مۇمكىندىگى زور ەكەنىن ايتادى. ويتكەنى، وليمپياداعا جولداما الۋدان بۇرىن، قىتايدىڭ ءوز ىشىنەن سۋىرىلىپ شىعۋ وتە قيىن. بۇل ەلدە باسەكە جوعارى. ال ەرلان بولسا، ميللياردتى ءوزىنىڭ ناعىز كاسىپقوي بالۋان ەكەندىگىمەن مويىنداتىپ ۇلگىرگەن.
«جۇڭگو قازاقتارىنىڭ ىشىنەن شىققان مىقتى بالۋاندار جەتەرلىك. ولاردىڭ كوبىنىڭ بابى كەلىسكەنىمەن، باعى كەلىسپەدى. بۇعان دەيىن دە قىتايدىڭ ءوزىن مويىنداتىپ، الەمدىك جارىستاردا توپ جارعان بىرنەشە بالۋان بولدى. سولاردىڭ ءبىرى 2004 جىلى افينى وليمپياداسىنا قاتىسقان، وعان دەيىن دە الەمدىك جارىستاردا تالاي مارتە جۇلدە تۇعىرىنا كوتەرىلگەن ءالنۇر تورگە ۇلى. ەرلانبەككە بۇل جولداما وڭايلىقپەن كەلگەن جوق. ول وسى جاۋاپكەرشىلىكتى تۇسىنەدى. سوندىقتان بيىك تۇعىردان كورىنەر دەگەن ءۇمىتىمىز بار»، – دەيدى نۇرلان داۋلەتحان.
ەرلانبەك كاتەي ۇلى 21 تامىز كۇنى ريو تورىندە بەلدەسۋگە شىعادى. بۇعان دەيىن وزبەكستاندىق قانداسىمىز ەلمۇرات تاسمۇراتوۆ گرەك-ريم كۇرەسى بويىنشا قولا جۇلدەگە يە بولعان. وزگە ەلدە جۇرگەن باھادۇرلەردىڭ جەڭىستى جولىن ە. كاتەي ۇلى جالعاسىن دەپ تىلەيمىز.
