ونىڭ باستاماسىنا قىرعىزدار اراسىندا قۋانعاندار از بولمادى. سىن ايتقاندار دا تابىلدى. قازاقتىڭ حالىق ءانىن ناقىشىنا كەلتىرىپ ايتىپ ءجۇر. ءتىپتى بەينەبايان دا ءتۇسىرىپ الىپتى دەگەن اڭگىمە تارادى. نوورۋزدان سۇحبات العان تىلشىلەر مىندەتتى تۇردە ونىڭ «كوشىرمەسى» تۋرالى ەسىنە ءتۇسىرىپ وتىراتىن. دەگەنمەن جاس ءانشى قازاقتىڭ حالىق ءانىن ۇناتقانىن، سوندىقتان مىندەتتى تۇردە قىرعىز تىلىندە ورىنداعىسى كەلگەنىن، ءارى قازاقستاننان وزىنە قالعان ەستەلىك رەتىندە قابىلدايتىنىن ايتۋدان جالىقپادى.
– «كوك جوتەل» ءانى قىرعىز تىڭدارماندارعا ۇنادى دەۋگە بولادى. تەلەارنالار مەن راديوتولقىنداردا از اينالدىرمادى. ەندى تاعى ءبىر جاڭا ءان جازدىرتىپ جاتىرمىن، ونى قازاق جانە قىرعىز تىلدەرىندە ورىندايمىن. مۇمكىندىك بولسا، قازاق تىڭدارماندارعا دا ۇسىنىپ كورگىم كەلەدى، – دەيدى قازاق ءتىلىن ءبىرشاما ۇيرەنگەن نوورۋز الىمبايەۆ.
قىرعىزدىڭ تاعى ءبىر ورىنداۋشىسى جۇمابەك اقباروۆ بىلتىر جازدا استانادا بەينەبايان ءتۇسىرىپتى. جاس ءانشى قىرعىز اندەرىنە قازاق ەلىندە سۇرانىستىڭ جوعارى ەكەنىن ايتادى.
– راس، قازاق انشىلەرى قىرعىز ارىپتەستەرىنىڭ اندەرىن ءوز تىلىندە ورىنداپ كەلەدى. وندا تۇرعان ەشتەڭە جوق. كەرىسىنشە ءبىزدىڭ قىرعىز انشىلەرى قۋانادى. دەگەنمەن، كەيدە رۇقسات الۋدى ۇمىتىپ كەتەتىندەر بار، – دەيدى ول.
جاس ءانشىنىڭ پايىمىنشا، باستىسى، رۇقسات الىپ، ءاندى ءوز دەڭگەيىندە ورىنداپ شىقسا بولعانى.
– ەگەر مەنىڭ ءانىمدى اۋدارىپ الىپ، شىرقاپ جاتسا، مەنىڭ باقىتتان باسىم اينالار ەدى. ال، نوورۋز الىمبايەۆپەن جاقىن تانىس ەمەسپىن. دەگەنمەن، قازاقتىڭ حالىق ءانىن اۋدارىپ ورىنداپ جۇرگەنىنە قۋانىپ قالدىم. مەنىڭ دە كەيدە قازاقتىڭ تاماشا اندەرىن ءوز تىلىمدە ورىنداعىم كەلىپ تۇرادى. ارينە، قۇقىق يەلەنۋشىسىنەن رۇقساتىن الۋ كەرەگىن بىلەمىن. قالاي دەسەك تە، «قازاق-قىرعىز ءبىر تۋعان» دەپ جاتادى عوي. مەنىڭشە، مۇنداي باستاما ەكى ەلدى جاقىنداستىرا تۇسەدى، – دەيدى جۇمابەك اقباروۆ.
دەرەككوزى: gonzo.kz
