اڭگىمە بارىسىندا جەتەكشى ۋنيۆەرسيتەتتىڭ سوڭعى التى اي ىشىندەگى قول جەتكىزگەن جەتىستىكتەرى، اتقارىلعان شارۋالار، جاڭا وقۋ جىلىنا دايىندىق، وقۋ عيماراتتارى مەن جاتاقحانالارعا جۇرگىزىلىپ جاتقان كەشەندى جوندەۋ، ستۋدەنتتەر مەن وقىتۋشىلارعا جاسالعان جاعداي، پاندەميا كەزىندەگى وقۋ پروسەسى جانە تاعى باسقا ماسەلەلەر تالقىلاندى.
ەلىمىزدىڭ جەتەكشى ءبىلىم ورداسىندا پاندەميا مەن كارانتينگە قاراماستان، بەلسەندى جۇمىس جالعاسۋدا: وقۋ ۇدەرىسى زاماناۋي تالاپتارعا ساي جولعا قويىلعان، قازۇۋ-دى زەرتتەۋ ۋنيۆەرسيتەتىنە ترانسفورماسيالاۋ جۇمىستارى اتقارىلۋدا.
سوڭعى جارتى جىلدا ۋنيۆەرسيتەتتىڭ تىنىس-تىرشىلىگىندە ايتارلىقتاي وڭ وزگەرىستەر ورىن الدى. اتاپ ايتساق، بيىلعى جىلى قازۇۋ-عا مەملەكەتتىك گرانت الۋعا ۇمىتكەرلەر سانى 3 ەسەدەي ءوستى. ماگيستراتۋراعا قابىلدانعاندار سانى – 1598 ادام. بۇل كورسەتكىش تە وتكەن جىلمەن سالىستىرعاندا اناعۇرلىم ارتىق.
جالپى، ءبىلىم ورداسى بيىل، شەتەلدىك ازاماتتار مەن دوكتورانتۋرانى قوسپاعاندا، 6440 ستۋدەنتتى وقۋعا قابىلدادى. «التىن بەلگى» يەگەرلەرىنىڭ سانى دا كوڭىل قۋانتارلىق، وتكەن جىلى 508 ۇزدىك مەكتەپ ءبىتىرۋشى، بيىل 737 وزات وقۋشى قازۇۋ ستۋدەنتى اتاندى.
ۋنيۆەرسيتەت جاڭا وقۋ ماۋسىمىنا شەتەلدىك سەرىكتەس ۋنيۆەرسيتەتتەرمەن بىرلەسىپ باكالاۆريات، ماگيستراتۋرا جانە دوكتورانتۋرا ءۇشىن 119 جاڭا ءبىلىم بەرۋ باعدارلاماسىن ازىرلەدى. جاڭا ماماندىقتار قازاقستاندىق ستۋدەنتتەر اراسىندا عانا ەمەس، شەتەلدىك ستۋدەنتتەر ىشىندە دە ۇلكەن سۇرانىسقا يە. قازۇۋ-دىڭ شەتەلدە فيليالدارىن اشۋ جۇمىستارى دا جۇرگىزىلۋدە (ارمەنيا، قىرعىزستان، وزبەكستان، تۇركيا).
بۇگىنگى ساتتە ۋنيۆەرسيتەتتىڭ 16 جاتاقحاناسىنىڭ 14 ء-ى جوندەۋدەن ءوتتى، جەتى فاكۋلتەت عيماراتىنا كۇردەلى جوندەۋ جۇرگىزىلدى. ەكى جاتاقحانا قىركۇيەك ايىنىڭ سوڭىندا پايدالانىلۋعا بەرىلەدى.
ۋنيۆەرسيتەت باسشىلىعى وقىتۋشىلار مەن قىزمەتكەرلەردىڭ جالاقىسىن كوتەرۋ ماسەلەسىنە ەرەكشە نازار اۋدارۋدا. ناۋرىز ايىندا ەڭبەكاقى 20 پايىزعا ءوستى. جاڭا وقۋ جىلىندا وقىتۋشى – 200 000 تەڭگە، اعا وقىتۋشى – 280 000 تەڭگە، دوسەنت – 330 000 تەڭگە، پروفەسسور 500 000 تەڭگە جالاقى الادى. سونىمەن قاتار فيلوسوفيا دوكتورى (PhD)، عىلىم كانديداتى، عىلىم دوكتورى عىلىمي دارەجەسى، بىلىكتىلىك دەڭگەيى ءۇشىن قوسىمشا اقى تولەنەدى. بونۋستىق تولەمدەر جىلىنا ەكى رەت بەرىلەدى.
قازىرگى ۋاقىتتا 2021-2025 جىلدارعا ارنالعان دامۋدىڭ نەگىزگى باسىمدىقتارى انىقتالدى. قازۇۋ ۇجىمى بۇكىل ەل جانە الەم بويىنشا ۋنيۆەرسيتەتتىڭ ودان ءارى دامۋىنىڭ ستراتەگيالىق مىندەتتەرىن ءتيىمدى جۇزەگە اسىرۋعا ىنتالى.
وسى مەزەتتە قازۇۋ-دا 533 عىلىمي جوبا جۇزەگە اسىرىلۋدا. ۋنيۆەرسيتەتتىڭ ءتيىمدى جۇمىسىنىڭ ارقاسىندا بيزنەستەن جانە ءارتۇرلى حالىقارالىق كوزدەردەن ينۆەستيسيالار تارتىلادى، سونداي-اق سەرپىندى زەرتتەۋلەر مەن تەحنولوگيالاردىڭ ناتيجەلەرى پايدالانىلادى، ۋنيۆەرسيتەت عالىمدارىنىڭ جەتىستىكتەرىن الەمدىك دەڭگەيدە تالداۋ جۇمىستارى جۇرگىزىلەدى.
ۋنيۆەرسيتەت سانيتارلىق-ەپيدەميولوگيالىق قاۋىپسىزدىكتى ساقتاپ قانا قويماي، وقۋ عيماراتتارىندا، جاتاقحانالاردا، كىتاپحانادا، ۋنيۆەرسيتەت عيماراتتارىندا ەسق قامتاماسىز ەتۋ ءۇشىن بارلىق شارالار قابىلدادى. جاڭا وقۋ جىلىنان باستاپ كامپۋستاعى بارلىق وقۋ عيماراتتارى مەن جاتاقحانالارعا كىرۋ ءۇشىن QR كودتارى ورناتىلعان «Ashyq» جۇيەسى ارقىلى جۇزەگە اسىرىلاتىن بولادى.
ءال-فارابي اتىنداعى قازۇۋ ەل تاۋەلسىزدىگىنىڭ 30 جىلدىعىن مەرەكەلەۋگە ارنالعان نەگىزگى ءىس-شارالاردى قامتىعان جوسپاردى بەكىتتى. ولار «وتىز جىلدىققا – وتىز اپتالىق» جول كارتاسىندا ناقتى كورسەتىلگەن. جوسپارعا سايكەس، ۋنيۆەرسيتەتتە تاۋەلسىزدىك تاريحىنا جانە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ قازاقستان تاريحىنداعى سىڭىرگەن ەڭبەگىنە ارنالعان شارالار ءوتتى. كامپۋستا ەلباسى ساياباعى، عالىمدار باعى، اعاشتار اللەياسى اشىلىپ، 1000-عا جۋىق كوشەت وتىرعىزىلدى.
ۋنيۆەرسيتەت رەكتورى ستۋدەنت جاستاردىڭ سپورتتىق ءومىرى، وقىتۋشى-پروفەسسورلار قۇرامىنىڭ الەۋمەتتىك جاعدايىن جاقسارتۋ، جاس ماماندارعا كوڭىل ءبولۋ جوسپارلارىمەن ءبولىستى.
