ءال-فارابي اتىنداعى قازاق ۇلتتىق ۋنيۆەرسيتەتىندە فرانسۋز ۋنيۆەرسيتەتتەرى دەلەگاسياسىنىڭ قاتىسۋىمەن «جاڭارتىلمالى ەنەرگيا كوزدەرى: قازاقستان مەن فرانسياداعى ەنەرگەتيكالىق اۋىسۋدىڭ داعدىسى مەن ءبىلىمى» اتتى حالىقارالىق كونفەرەنسيا ءوتتى.

جيىنعا قاتىسۋشىلار الدىمەن قازۇۋ عالىمدارىنىڭ عىلىمي-يننوۆاسيالىق ازىرلەمەلەرى كورمەسىن تاماشالادى.

دەلەگاسيا نازارىنا نانوماتەريالدار نەگىزىندەگى قابىلداعىشتار، ەنەرگيانى ۇنەمدەيتىن شامدار، ميكروبالدىرلار نەگىزىندەگى بيولوگيالىق بەلسەندى قوسپالار، قازاقستاننىڭ تابيعي شيكىزاتى نەگىزىندەگى دارىلىك پرەپاراتتاردى ءوندىرۋ، قان تامىرلارى پاتولوگياسىنىڭ الدىن الۋ جانە ەمدەۋ جانە ت.ب. يننوۆاسيالىق جوبالارى تانىستىرىلدى.

ءارى قاراي كونفەرەنسيا اشىلۋىندا قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ قۇتتىقتاۋ ءسوز سويلەدى. «

– بۇگىنگى شاراعا رەيمس-شامپان-اردەننا، گاۆر جانە لوتارينگيا ۋنيۆەرسيتەتتەرىنەن كەلگەن قوناقتار قاتىسىپ وتىر. بۇل كەزدەسۋ – ءبىزدىڭ ارىپتەستىك قارىم-قاتىناسىمىزدىڭ ناتيجەسى.

ءبىز فرانسۋز جوعارى وقۋ ورىندارىمەن مۇناي جانە گاز، اقپاراتتىق تەحنولوگيالار، بيوتەحنولوگيا جانە بالامالى ەنەرگەتيكا سالاسىندا قوس ديپلوم باعدارلاماسىن ەنگىزدىك. قازۇۋ بازاسىندا «گەوەنەرگەتيكا» قازاقستان-فرانسۋز ءعىلىمي-بىلىم بەرۋ ورتالىعى قۇرىلدى. ۋنيۆەرسيتەت فرانسۋزدىق «Total Energy» كومپانياسىمەن بىرلەسكەن بىرنەشە جوبا دايىنداۋدا، – دەپ اتاپ ءوتتى رەكتور.

قازۇۋ فرانسيانىڭ 20 جوعارى وقۋ ورنىمەن تىعىز ىقپالداستىق ورناتقان. حيميا فاكۋلتەتىندە لوتارينگيا ۋنيۆەرسيتەتىمەن بىرلەسكەن «مۇناي-گاز ءىسى» باعدارلاماسى جۇزەگە اسىرىلۋدا. ەندى فيزيكا-تەحنيكالىق فاكۋلتەتىنىڭ ستۋدەنتتەرى Total كومپانياسىندا عىلىمي تاعىلىمدامادان وتەدى.

جيىندا ءسوز العان رەيمس-شامپان-اردەننا ۋنيۆەرسيتەتىنىڭ ءبىرىنشى ۆيسە-پرەزيدەنتى كريستوف كلەمان  «ءبىز قازۇۋ فاكۋلتەتتەرىن ارالاپ، ءوزارا ىنتىماقتاستىق اياسىنداعى جۇمىستاردى كوزبەن كورۋگە مۇمكىندىك الدىق. مەن مۇندا كوپتەگەن جىلدان بەرى تانيتىن عالىمداردى كەزدەستىردىم. ولار ءبىلىمى مەن كۇش-جىگەرىن عىلىمنىڭ دامۋىنا جۇمساۋدا. ءبىز ورتاق ماقساتتى جۇزەگە اسىرۋ جايىن تالقىلادىق. ەندى ارىپتەستىگىمىزدى جاڭا باعىتتا جالعاستىراتىن بولامىز»، – دەپ اتاپ ءوتتى.

لوتارينگيا ۋنيۆەرسيتەتىنىڭ ەۋروپالىق جانە حالىقارالىق ستراتەگيا جونىندەگى ۆيسە-پرەزيدەنتى ستەفان لوۋۆيك جامبىل وبلىسىنداعى ەلەكتر ساقتاۋ ستانسياسىنىڭ پەرسپەكتيۆالارى جايلى ايتتى.

– بۇل جەل ەلەكتر ستانسياسى 2030 جىلعا قاراي ەلدەگى جاڭارتىلمالى ەنەرگيانىڭ ءىرى نىسانىنا اينالادى. وسى ورايدا «Total Eren» كومپانياسىنىڭ «Total Energy» كومپانياسىن ستارتەگيالىق سەرىكتەس رەتىندە قاراستىراتىنىن جانە 2023 جىل ىشىندە ورتاق جوباعا قوسىلاتىنىن اتاپ وتكىم كەلەدى، – دەدى ستەفان لوۋۆيك.

سونىمەن قاتار شارادا لوتارينگيا ۋنيۆەرسيتەتىنىڭ ۆيسە-پرەزيدەنتى كارل تومبر: «ەكى جاقتى سەرىكتەستىك ءبىلىم مەن عىلىم سالاسىنداعى ورتاق ماقساتتاردى ورىنداۋعا، جاڭا مۇمكىندىكتەرگە جول اشادى. ءبىز قازاقستاننىڭ جەتەكشى ۋنيۆەرسيتەتىمەن ىنتىماقتاستىقتى نىعايتۋعا جانە بىرلەسكەن ۇلكەن جوبالاردى جۇزەگە اسىرۋعا دايىنبىز»، – دەگەن پىكىرىمەن ءبولىستى.

باسقوسۋدا فرانسيانىڭ باس كونسۋلى فابريس نيەۆو، «Total Eren» كومپانياسىنىڭ ورتالىق ازيا بويىنشا ۆيسە-پرەزيدەنتى تەرري پلەزان جانە وزگە دە دەلەگاسيا مۇشەلەرى، عالىمدار ەكى ەل قارىم-قاتىناسىنداعى ەنەرگەتيكالىق اۋىسۋ بارىسىن سارالاپ،  ۇسىنىستارىن ورتاعا سالدى.

كونفەرەنسيا جۇمىسى ارى قاراي «بالامالى ەنەرگيا فرانسيا مەن قازاقستانداعى جاڭا عىلىمي جانە ونەركاسىپتىك سىن-تەگەۋرىن رەتىندە»، «وقىتۋدى ەنەرگەتيكا سالاسىنداعى مامانداردىڭ جاڭا قاجەتتىلىكتەرىنە بەيىمدەۋ» اتتى سەكسيالىق وتىرىستارعا ۇلاستى.

 

ءال-فارابي اتىنداعى قازۇۋ-دىڭ باسپا ءسوز قىزمەتى