بيىل ءال-فارابي اتىنداعى قازاق ۇلتتىق ۋنيۆەرسيتەتىن 8190 تۇلەك ءبىتىرىپ شىقتى، ونىڭ ىشىندە 6758ء-ى باكالاۆرياتتى تامامدادى. 1256 تۇلەك ۇزدىك ديپلوم يەگەرى اتانسا، ماگيستراتۋرانى 1774، دوكتورانتۋرانى 442 ءبىلىم الۋشى ءبىتىردى. ۋنيۆەرسيتەت وقۋ گرانتتارىنىڭ سانى بويىنشا ەلىمىزدىڭ جوعارى وقۋ ورىندارى اراسىندا تەڭدەسسىز كوشباسشى.
سالتاناتتى جيىندى اشقان ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ بارشا تۇلەكتەرگە تابىس تىلەپ، ق ر عىلىم جانە جوعارى ءبىلىم ءمينيسترى ساياسات نۇربەكتىڭ قۇتتىقتاۋ حاتىن وقىپ بەردى. وندا مينيستر: «ەلىمىزدىڭ كوشباسشى ءبىلىم ورداسى – ءال-فارابي ۋنيۆەرسيتەتىندە جاستىق جالىننىڭ ماڭگىلىك ەنەرگياسى بار. الەمدەگى ەڭ وزىق ءبىلىم بەرۋ وردالارىمەن تەرەزەسى تەڭ تۇرعان وقۋ ورنىندا ۇرپاقتار ساباقتاستىعى ەشقاشان ۇزىلمەسىن. تۇلەكتەر كۇنى تاعىلىمدى تاربيەلىك مانىمەن ەستە قالسىن»، – دەپ ىزگى نيەتىن بىلدىرگەن.
ءوز سوزىندە رەكتور: «ۋنيۆەرسيتەت دامۋىنىڭ باستى كورسەتكىشى – تۇلەكتەر. ولاردىڭ ىشىندە مەملەكەت جانە قوعام قايراتكەرلەرى، كورنەكتى عالىمدار، كاسىپكەر-مەسەناتتار، قازۇۋ ماقتان تۇتاتىن تاجىريبەلى ديپلوماتتار بار»، – دەپ اتاپ ءوتتى.
سونىمەن قاتار جانسەيىت تۇيمەبايەۆ تۇلەكتەردى ۋنيۆەرسيتەت دامۋىنداعى ماڭىزدى جەتىستىكتەرمەن تانىستىردى.
![](/uploads/images/20240127155640426.jpg)
سونداي-اق شارادا ءال-فارابي اتىنداعى قازۇۋ ديرەكتورلار كەڭەسىنىڭ ءتوراعاسى، قازۇۋ تۇلەكتەرى قاۋىمداستىعىنىڭ پرەزيدەنتى قايرات ءمامي ءسوز سويلەدى. ول بارلىق تۇلەكتەر اتىنان ۋنيۆەرسيتەتتى جاڭا جەتىستىكتەرىمەن قۇتتىقتادى. تۇلەكتەر كۇنى بارلىق وقىتۋشىلار مەن ستۋدەنتتەر، تۇلەكتەر مەن الما-ماتەر دوستارىنىڭ بىرلىگى مەن ىنتىماعىن پاش ەتەتىنىن ايتتى.
شارا بارىسىندا «اسا كورنەكتى تۇلەك» مەدالىن سالتاناتتى تۇردە تابىستاۋ ءراسىمى ءوتتى. ەرەكشە ماراپات زاڭ عىلىمىنىڭ دوكتورى، پروفەسسور، قازاقستان رەسپۋبليكاسى جوعارعى سوتىنىڭ جانىنداعى حالىقارالىق كەڭەستىڭ مۇشەسى، زاڭ فاكۋلتەتىنىڭ 1967 جىلعى تۇلەگى اناتوليي ديدەنكوعا بەرىلدى.
15 فاكۋلتەت تۇلەكتەرى، سونىڭ ىشىندە شەتەلدىك ستۋدەنتتەر قازۇۋ تۇلەكتەرى قاۋىمداستىعى اتىنان 150 000 تەڭگە كولەمىندە شاكىرتاقى الدى. جالپى سوماسى 2 ملن تەڭگەدەن اسادى.
سالتاناتتى شارادان سوڭ، تۇلەكتەر قاۋىمداستىعى پرەزيديۋمىنىڭ وتىرىسى ءوتىپ، وندا وتكەن جىلداعى جۇمىس قورىتىندىلارى مەن الداعى جوسپارلار تالقىلاندى.
مەرەكە كونسەرتتىك باعدارلاماعا ۇلاستى. تۇلەكتەر كۇنى فاكۋلتەتتەردە جالعاسىن تاپتى.
ءال-فارابي اتىنداعى قازۇۋ-دىڭ باسپا ءسوز قىزمەتى