Biyl Ál-Farabi atyndaǵy Qazaq ulttyq ýniversitetin 8190 túlek bitirip shyqty, onyń ishinde 6758-i bakalavriatty tamamdady. 1256 túlek úzdik diplom iegeri atansa, magistratýrany 1774, doktorantýrany 442 bilim alýshy bitirdi. Ýniversitet oqý granttarynyń sany boiynsha elimizdiń joǵary oqý oryndary arasynda teńdessiz kóshbasshy.
Saltanatty jiyndy ashqan Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaev barsha túlekterge tabys tilep, QR Ǵylym jáne joǵary bilim ministri Saiasat Nurbektiń quttyqtaý hatyn oqyp berdi. Onda ministr: «Elimizdiń kóshbasshy bilim ordasy – Ál-Farabi ýniversitetinde jastyq jalynnyń máńgilik energiiasy bar. Álemdegi eń ozyq bilim berý ordalarymen terezesi teń turǵan oqý ornynda urpaqtar sabaqtastyǵy eshqashan úzilmesin. Túlekter kúni taǵylymdy tárbielik mánimen este qalsyn», – dep izgi nietin bildirgen.
Óz sózinde rektor: «Ýniversitet damýynyń basty kórsetkishi – túlekter. Olardyń ishinde memleket jáne qoǵam qairatkerleri, kórnekti ǵalymdar, kásipker-metsenattar, QazUÝ maqtan tutatyn tájiribeli diplomattar bar», – dep atap ótti.
Sonymen qatar Janseiit Túimebaev túlekterdi ýniversitet damýyndaǵy mańyzdy jetistiktermen tanystyrdy.
Sondai-aq sharada Ál-Farabi atyndaǵy QazUÝ Direktorlar keńesiniń tóraǵasy, QazUÝ túlekteri qaýymdastyǵynyń prezidenti Qairat Mámi sóz sóiledi. Ol barlyq túlekter atynan ýniversitetti jańa jetistikterimen quttyqtady. Túlekter kúni barlyq oqytýshylar men stýdentter, túlekter men alma-mater dostarynyń birligi men yntymaǵyn pash etetinin aitty.
Shara barysynda «Asa kórnekti túlek» medalin saltanatty túrde tabystaý rásimi ótti. Erekshe marapat zań ǵylymynyń doktory, professor, Qazaqstan Respýblikasy Joǵarǵy sotynyń janyndaǵy Halyqaralyq keńestiń múshesi, zań fakýltetiniń 1967 jylǵy túlegi Anatolii Didenkoǵa berildi.
15 fakýltet túlekteri, sonyń ishinde sheteldik stýdentter QazUÝ túlekteri qaýymdastyǵy atynan 150 000 teńge kóleminde shákirtaqy aldy. Jalpy somasy 2 mln teńgeden asady.
Saltanatty sharadan soń, Túlekter qaýymdastyǵy prezidiýmynyń otyrysy ótip, onda ótken jyldaǵy jumys qorytyndylary men aldaǵy josparlar talqylandy.
Mereke kontserttik baǵdarlamaǵa ulasty. Túlekter kúni fakýltetterde jalǵasyn tapty.
Ál-Farabi atyndaǵy QazUÝ-dyń Baspasóz qyzmeti
