اۋقىمدى شاراعا ق ر پرەزيدەنتىنىڭ كەڭەسشىسى مالىك وتاربايەۆ، ق ر عىلىم جانە جوعارى ءبىلىم ۆيسە-مينيسترى دارحان احمەت-زاكي، الماتى قالاسىنداعى قحر باس كونسۋلى سزيان ۆەي، سيان سزياوتۋن ۋنيۆەرسيتەتىنىڭ پرەزيدەنتى ۆان شۋگۋو، ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ، قازۇۋ ديرەكتورلار كەڭەسىنىڭ ءتوراعاسى قايرات ءمامي، شەتەل ديپلوماتيالىق وكىلدىكتەرى مەن كونسۋلدىق مەكەمە باسشىلارى، قحر جانە ورتالىق ازيا جوعارى وقۋ ورىندارىنىڭ رەكتورلارى، عالىمدار، وقىتۋشىلار مەن ءبىلىم الۋشى جاستار قاتىستى.
ق ر پرەزيدەنتى قاسىم-جومارت توقايەۆتىڭ فورۋمعا قاتىسۋشىلارىنا جولداعان قۇتتىقتاۋ حاتىن مالىك وتاربايەۆ وقىپ بەردى. قۇتتىقتاۋ حاتتا: «ءتورتىنشى ونەركاسىپتىك ريەۆوليۋسيا: يندۋستريا مەن ءبىلىم ينتەگراسياسى» فورۋمى ءبىلىم مەن تاجىريبە الماسۋعا مۇمكىندىك بەرەتىن اكادەميالىق الەم مەن ءوندىرىس اراسىنداعى كوپىرگە اينالادى. جۇڭگو مەن ورتالىق ازيانىڭ جوعارى وقۋ ورىندارى فورۋمى ونەركاسىپ پەن ءبىلىم ينتەگراسياسى ءۇشىن ءوزارا بايلانىس قۇرۋعا، ۋنيۆەرسيتەتتەر اراسىنداعى ىنتىماقتاستىقتى نىعايتۋعا جول اشادى دەپ سەنەمىن»، - دەلىنگەن.
ءوز كەزەگىندە ق ر عىلىم جانە جوعارى ءبىلىم ۆيسە-مينيسترى دارحان احمەت-زاكي بۇگىنگى شارانىڭ ماڭىزدىلىعىنا توقتالدى.
«سيفرلىق الەم داۋىرىندە ۋنيۆەرسيتەتتەر يننوۆاسيالار مەن تەحنولوگيالاردى دامىتۋ مەن قولدانۋدا ماڭىزدى ءرول اتقارادى. بۇل باعىتتا قازاقستاندىق جوعارى وقۋ ورىندارى ءبىلىم جانە عىلىمي-يننوۆاسيالىق پروسەسكە يننوۆاسيالىق تەحنولوگيالاردى ەنگىزۋ بويىنشا جۇمىس جۇرگىزۋدە. قازۇۋ-دا ءوتىپ جاتقان فورۋم جۇڭگو جانە ورتالىق ازيا ەلدەرىنىڭ جوعارى وقۋ ورىندارىنىڭ تىعىز قارىم-قاتىناس ورناۋىنا جانە نىعايۋىنا ۇلكەن سەپ بولاتىنى ءسوزسىز. سونىمەن قاتار ۋنيۆەرسيتەتتەر اراسىندا وقىتۋشىلار مەن ستۋدەنتتەر الماسۋعا، تاجىريبەمەن بولىسۋگە، عىلىمي جوبالاردى بىرلەسىپ جۇزەگە اسىرۋعا مۇمكىندىك بەرەدى»، - دەدى ۆيسە-مينيستر.
فورۋمدا ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ ءسوز سويلەدى.
«بۇگىنگى شارا ۋنيۆەرسيتەتتەر اراسىنداعى ءبىلىم جانە عىلىم سالاسى بويىنشا ىنتىماقتاستىقتى ارتتىرۋعا باعىتتالعان. ورتالىق ازيا ەلدەرىنىڭ قىتايمەن ىنتىماقتاستىعىن دامىتۋ بارىسىندا «ءبىر بەلدەۋ - ءبىر جول» باعدارلاماسىنىڭ ماڭىزى زور. ءال-فارابي اتىنداعى قازۇۋ بۇۇ-نىڭ تۇراقتىلىق جونىندەگى «اكادەميالىق ىقپال» باعدارلاماسىنىڭ جاھاندىق حابىن تۇراقتى باسقاراتىن قازاقستان رەسپۋبليكاسىنىڭ جەتەكشى جوعارى وقۋ ورىندارىنىڭ ءبىرى بولا وتىرىپ، ىستامبۇل جانە بىشكەك قالالارىندا ءوز فيليالدارىن اشتى. جۋىردا قازۇۋ بازاسىندا قىتايدىڭ سولتۇستىك-باتىس پوليتەحنيكالىق ۋنيۆەرسيتەتىنىڭ فيليالى اشىلدى»، - دەدى رەكتور.
سونداي-اق شارا بارىسىندا سيان سزياوتۋن ۋنيۆەرسيتەتىنىڭ پرەزيدەنتى ۆان شۋگۋو: «ءقازىر تەحنولوگيانىڭ دامىعان ۋاقىتى. عىلىم سالاسى كۇن سايىن وزگەرىپ، جاڭا تەحنولوگيالار شىعىپ جاتىر. سول سەبەپتى جۇڭگو جانە ورتالىق ازيا ەلدەرىندەگى جوعارى وقۋ ورىندارى بىرلەسىپ، بولىپ جاتقان وزگەرىستەردى تەز مەڭگەرىپ، زامان اعىمىمەن بىرگە ءجۇرۋىمىز قاجەت. ەلدەرىمىز دوستىق قارىم-قاتىناستا. ءبارىمىزدىڭ ماقساتىمىز ءبىر. قازىرگى تاڭدا بىزدەر عىلىم جانە ءبىلىم سالاسى بويىنشا وزگەرىستەرگە بەيىمدەلۋىمىز كەرەك»، - دەپ ءوز ويىن ورتاعا سالدى.
سوڭىندا فورۋم قورىتىندىسى بويىنشا «Almaty» كونسەنسۋسىنا قول قويىلىپ، كەلەسى ءتوراعالىق ەتۋشى جوو انىقتالدى.
