ساعاتتىڭ اشىلۋ سالتاناتىنا ق ر كونستيتۋسيالىق كەڭەسىنىڭ ءتوراعاسى، تۇلەكتەر قاۋىمداستىعىنىڭ پرەزيدەنتى قايرات ءمامي، ق ر جوعارعى سوتىنىڭ قىلمىستىق ىستەر جونىندەگى سوت القاسىنىڭ ءتوراعاسى ءابدىراشيت جۇكەنوۆ، مەملەكەت جانە قوعام قايراتكەرى ولجاس سۇلەيمەنوۆ، قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ، قازۇۋ-دىڭ قۇرمەتتى پروفەسسورى، 1983 جىلعى تۇلەگى سالتانات بايقوشقاروۆا جانە قازۇۋ ديرەكتورلار كەڭەسىنىڭ مۇشەسى ارمانجان بايتاسوۆ سىندى تاعى دا باسقا زيالى قاۋىم وكىلدەرى، نۇر-سۇلتان مەن الماتى شاھارىنان ارنايى كەلگەن مەسەناتتار مەن ۋنيۆەرسيتەتتىڭ وقىتۋشى-پروفەسسورلارى جانە ءبىلىم الۋشى جاستار قاتىستى.
شاراعا ارنايى شاقىرىلعان مەيماندار ءسوز سويلەپ، بۇگىنگى ايتۋلى وقيعامەن قۇتتىقتادى. ق ر كونستيتۋسيالىق كەڭەسىنىڭ ءتوراعاسى، تۇلەكتەر قاۋىمداستىعىنىڭ پرەزيدەنتى قايرات ءمامي ءوز كەزەگىندە جوبانىڭ ماقساتى – قازۇۋ قالاشىعىنىڭ تۇرعىندارى مەن قوناقتارىنا وقۋ، جۇمىس ىستەۋ جانە تۇرمىس ءۇشىن جايلى ورتا قۇرۋ ەكەنىن تىلگە تيەك ەتتى.
– قازاق ۇلتتىق ۋنيۆەرسيتەتىندە ءبىراقتار جۇمىستار اتقارىلىپ كەلەدى. تۇلەكتەر قاۋىمداستىعىنىڭ باستاۋىمەن ستۋدەنتتەرگە شاكىرتاقى بەرۋ جۇمىستارى جالعاسىن تاۋىپ كەلەدى. سونىمەن قاتار قالاشىقتىڭ كوركەيۋىنە ۇلەس قوسۋ ماقساتىندا كوپتەگەن نىساندار بوي كوتەردى. وسى ساعات ستەلاسى قۇرىلىسى دا تۇلەكتەر قاۋىمداستىعىنىڭ باستاۋىمەن جۇزەگە اسىپ وتىر. جاسالعان جۇمىستاردى مەن ماقتانىشپەن ايتا الامىن، – دەدى قايرات ءمامي.
قالاشىقتا بوي كوتەرگەن ساعات ستەلاسى «ماڭگىلىك ەل» سالتانات قاقپاسى مەن ورتالىق اللەيانىڭ جالعاسى بولىپ تابىلادى. مەسەناتتاردىڭ ۇسىنىسى بويىنشا «ماڭگىلىك ەل» ساعاتى بيىكتىگى 19،3 مەتر ستەلاعا ورناتىلدى. ساعاتتاردىڭ پارامەترلەرى ۇلكەن جانە ديامەترى 1600x1600 مم-گە جەتەدى. نىسان قۇرىلىسىنىڭ نەگىزگى ىرگەتاسى ءتورت تۇعىرلى بيىك باعانالارمەن بەكىتىلگەن.
شارا بارىسىندا ءسوز سويلەگەن ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى – رەكتورى جانسەيىت تۇيمەبايەۆ كەلۋشىلەردى بۇگىنگى ايتۋلى كۇنمەن قۇتتىقتاپ، ساعاتتىڭ نەلىكتەن «ماڭگىلىك ەل» دەپ اتالۋىن تەرەڭىنەن ءتۇسىندىردى.
– «ماڭگىلىك ەل» ساۋلەت نىساندارى الەم ەلدەرىندە جاسامپاز جەتىستىكتەر مەن تولاعاي تابىستار قۇرمەتىنە قويىلادى. سونداي-اق پاتريوتتىق تاربيە بەرۋ، وتانسۇيگىشتىك سەزىمدەردى قالىپتاستىرۋ ماقساتىن كوزدەيدى. ەلباسى نۇرسۇلتان نازاربايەۆ «ماڭگىلىك ەل» يدەياسىندا ناقتىلاپ كورسەتكەندەي، تاۋەلسىزدىكپەن بىرگە حالقىمىز ماڭگىلىك مۇراتىنا قول جەتكىزدى. ماڭگىلىك ەل بولۋ – ءبىزدىڭ باستى ماقساتىمىز. بارشاڭىزدى بۇگىنگى «ماڭگىلىك ەل» ساعات ستەلاسىنىڭ سالتاناتتى تۇردە اشىلۋىمەن قۇتتىقتايمىن! – دەپ ىستىق لەبىزىن ءبىلدىردى ۋنيۆەرسيتەت رەكتورى.
سونداي-اق شاراعا ارنايى قاتىسقان قازاقستاننىڭ مەملەكەت جانە قوعام قايراتكەرى ولجاس سۇلەيمەنوۆ بۇگىنگى ساعاتتىڭ اشىلۋىمەن قۇتتىقتاپ، ىستىق لەبىزىن ءبىلدىردى. «قازىرگى تاڭدا ەلىمىزدە 100-دەن اسا ۋنيۆەرسيتەت ستۋدەنتتەردى ءبىلىم نارىمەن سۋسىنداتىپ وتىر. دەگەنمەن، قازاق ۇلتتىق ۋنيۆەرسيتەتى ءوزىنىڭ بيىك مارتەبەسىن ءالى ۇستاپ كەلەدى. بۇگىن «ماڭگىلىك ەل» دەپ اتالاتىن ساعاتتىڭ سالتاناتتى اشىلۋىنا قاتىسىپ وتىرمىز. بارشاڭىزدى قۇتتىقتاي وتىرىپ، تولاعاي تابىس تىلەيمىن!» – دەدى ولجاس سۇلەيمەنوۆ.
سونىمەن قاتار بيولوگيا عىلىمىنىڭ دوكتورى، قازۇۋ-دىڭ قۇرمەتتى پروفەسسورى، 1983 جىلعى تۇلەگى سالتانات بايقوشقاروۆا دا ىستىق لەبىزىن ءبىلدىردى. ول ءوز كەزەگىندە ۋنيۆەرسيتەتتىڭ دامىپ كەلە جاتقانىن ماقتانىشپەن ايتاتىنىن جەتكىزدى.
سالتاناتتى شارانى تۇيىندەي كەلە وقۋ ورنى باسشىسى جانسەيىت تۇيمەبايەۆ – «ماڭگىلىك ەل» ساعاتى – تۇلەكتەردىڭ ۋنيۆەرسيتەتتىڭ ەنداۋمەنت دامۋ قورىنا بەلسەندى قولداۋ كورسەتۋىنىڭ جارقىن كورىنىسى. بۇل بىرەگەي ارحيتەكتۋرالىق نىسان الەمدىك دەڭگەيدەگى ستۋدەنتتىك كامپۋستىڭ عانا ەمەس، الماتى قالاسىنىڭ دا كوركىن ارتتىرا تۇسكەنى انىق. ول ىلە الاتاۋىنىڭ قارلى شىڭدارى سياقتى ءوزىنىڭ اسەمدىگىمەن تامساندىرىپ، ءارقايسىمىزعا: «ساعاتتاردىڭ – باعاسىن، مينۋتتاردىڭ – سالماعىن، سەكۋندتاردىڭ – ەسەبىن ءبىل» دەگەن اسا ماڭىزدى اقيقاتتى ەسكە سالادى. الما-ماتەر ءوز تۇلەكتەرىنە تۋعان ءبىلىم وشاعىنىڭ قىزمەتىنە بەلسەندى قاتىسقانى ءۇشىن شەكسىز العىس بىلدىرەدى.» – دەدى.
ساعات ستەلاسىنىڭ اشىلۋ سالتاناتى ارنايى دايىندالعان كونسەرتتىك باعدارلامامەن اياقتالدى.
ءال-فارابي اتىنداعى قازۇۋ-دىڭ باسپا ءسوز قىزمەتى
