شارانىڭ ماقساتى – ءىت ماماندارىن دايارلاۋداعى ساپانى ارتتىرۋ، ءبىتىرۋشى تۇلەكتەرگە ارنالعان بوس ورىندار جارمەڭكەسىن ۇيىمداستىرۋ، ستۋدەنتتىك ءىت ستارتاپتاردى دامىتۋ.
ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ بۇل فورۋم ستۋدەنتتەردىڭ IT-تەحنولوگيالار سالاسىندا قۇندى تاجىريبە جيناقتاپ، ءوز داعدىلارىن نىعايتۋعا جول اشاتىنىن اتاپ ءوتتى
– مەملەكەت باسشىسى قاسىم-جومارت توقايەۆ «2025 جىلعا قاراي كەمىندە 100 مىڭ جوعارى بىلىكتى IT-ماماندار دايارلاۋ» مىندەتىن قويدى. پرەزيدەنت ءوز سوزىندە الەمدىك نارىقتا IT سالاسىندا100 ميلليون ماماننىڭ جەتىسپەۋشىلىگى تۋرالى ايتتى. 2025 جىلعا قاراي بۇل سۇرانىس 200 ميلليونعا دەيىن ارتادى. سوندىقتان، بۇگىنگى شارانىڭ ماڭىزى جوعارى. قازۇۋ ءاردايىم ستۋدەنتتەرگە ساپالى ءبىلىم بەرۋگە جانە ولاردىڭ ءوزىن-وزى جان-جاقتى دامۋى مەن شىعارماشىلىق جۇمىستارىن ىسكە اسىرۋعا بارلىق جاعداي جاساۋعا تىرىسادى. ءبىزدىڭ ۋنيۆەرسيتەت ءار سالادا جەتىستىككە جەتكەن ازاماتتار مەن تالانتتى جاستاردىڭ باسىن قوساتىن ديالوگ الاڭىنا اينالىپ كەلەدى. بۇگىنگى باسقوسۋ سىزدەرگە ءتيىمدى تاجىريبە بولادى دەگەن ۇمىتتەمىن، – دەدى جانسەيىت تۇيمەبايەۆ.
ەركىن فورماتتا ۇيىمداستىرىلعان كەزدەسۋدە «ASUS» كومپانياسىنىڭ تەحنيكالىق مەنەدجەرى امانتاي التان ۇلى، Factorial Incubator باعدارلاماسىنىڭ نەگىزىن قالاۋشى ارمان سۇلەيمەنوۆ، سينحۋا ۋنيۆەرسيتەتىنىڭ پروفەسسورى چجان ۆۋشەن، «ZTE» ماركەتينگ بويىنشا جەتەكشى ساراپشىسى ەگور مانيۋكوۆ، «Baiterek Venture Fund» اق ديرەكتورلار كەڭەسىنىڭ مۇشەسى ءارى كاسىپكەر دانا بلييەۆا جانە ت.ب. ساراپشىلار مەن كاسىپكەرلەر بايانداما جاساپ، IT الەمىنىڭ وزەكتى ماسەلەلەرىن تالقىلادى.
قاتىسۋشىلاردىڭ پىكىرىنشە، كونفەرەنسيا IT سالاسىندا ەلىمىزدە جۇمىس ىستەيتىن كومپانيالاردى جانداندىرۋعا، كاسىبي داعدىلاردى دامىتۋعا جانە ءوز مۇمكىندىكتەرىن كورسەتۋگە جاڭا سەرپىن بەرەدى.
فورۋم اياسىندا ستۋدەنت جاستارعا ارنالعان بوس ورىندار جارمەڭكەسى ءوتتى. جاستارعا مەملەكەتتىك مەكەمەلەر، ج ش س، ەكىنشى دەڭگەيدەگى بانكتەر، ءىرى كومپانيالار جۇمىس ۇسىندى. سونىمەن قاتار ستۋدەنتتەر اتالعان مەكەمەلەردەن جازعى وندىرىستىك تاجىريبەدەن وتۋگە مۇمكىندىك الدى.
كەلۋشىلەر نازارىنا ستۋدەنتتىك ءىت ستارتاپتار كومەسى ۇيىمداستىرىلدى. شارانىڭ ماقساتى – ۋنيۆەرسيتەتتەگى جاس عالىمداردىڭ يننوۆاسيالىق جوبالارىن كوپشىلىككە كەڭىنەن تانىستىرۋ. سونداي-اق ءبىلىم الۋشى جاستار اراسىندا «FIFA PS5» ويىنىنان جارىس ءوتتى.
فورۋم سوڭىندا ۇزدىك ستارتاپتاردىڭ اۆتورلارى مەن «FIFA PS5» ويىنىنىڭ جەڭىمپازدارى انىقتالىپ، قازىلار القاسى جۇلدەگەرلەردى ديپلوم جانە باعالى سىيلىقتارمەن ماراپاتتادى.
ءال-فارابي اتىنداعى قازۇۋ-دىڭ باسپا ءسوز قىزمەتى
