ءىس-شارانىڭ نەگىزگى ماقساتى – ۋنيۆەرسيتەتتەگى سىبايلاس جەمقورلىقتىڭ الدىن الۋ، قىزمەتكەرلەر مەن ستۋدەنتتەردى جەمقورلىققا قارسى تاربيەلەۋدى كوزدەيدى. سونداي-اق، سىبايلاس جەمقورلىققا قارسى ءىس-قيمىل سالاسىنداعى ۆەدومستۆوارالىق ءوزارا ارەكەتتى دامىتۋ.
سەمينارعا رەكتور تاكير بالىقبايەۆ، پرورەكتورلار، ينستيتۋت ديرەكتورلارى مەن كافەدرا مەڭگەرۋشىلەرى، ۋنيۆەرسيتەتتىڭ قۇرىلىمدىق بولىمشەلەرىنىڭ باسشىلارى قاتىستى.
ءوز كەزەگىندە وقۋ ورىن باسشىسى تاكير بالىقبايەۆ اتالعان سەميناردىڭ ماڭىزدىلىعى مەن وزەكتىلىگىن اتاپ ءوتتى.
– قىسقى مەكتەپ اياسىندا ءبىز اۋقىمدى وقۋ سەمينارلارىن وتكىزۋدەمىز. ونىڭ نەگىزگىسى – «حالىقارالىق ستاندارت تالاپتارى نەگىزىندە سىبايلاس جەمقورلىققا قارسى ءىس-قيمىل جۇيەسىن جوبالاۋ» سەمينارى. ءبىز مەملەكەت باسشىسىنىڭ جانە ق ر ءبىلىم جانە عىلىم مينيسترلىگىنىڭ العا قويعان مىندەتتەرىن تولىعىمەن قولدايمىز، ولاردى ىسكە اسىرۋ ءۇشىن ستۋدەنتتەر، وقىتۋشىلار مەن قىزمەتكەرلەر اراسىندا سىبايلاس جەمقورلىققا توزبەۋشىلىك جانە پاراساتتىلىق مادەنيەتتى قالىپتاستىرۋدى كوزدەيدى. ول ءۇشىن ءبىز ءارتۇرلى باعىتتا جۇمىس جاساۋدامىز. سىبايلاس جەمقورلىققا قارسى كەڭەس، «پاراسات» ورتالىعىن قۇردىق، ءتيىستى كوميسسيا جۇمىس ىستەۋدە. بۇعان قوسا، «حالىقارالىق ISO ستاندارتتارى بويىنشا سىبايلاس جەمقورلىققا قارسى مەنەدجمەنت جۇيەسى» ەنگىزىپ، 51 ادام ارنايى وقۋدان وتەتىن بولادى. باسشىلىق اراسىندا سىبايلاس جەمقورلىققا قارسى تۇسىندىرمە جۇمىستارى جۇرگىزىلدى، بۇدان ءارى وسىنداي شارالار وقىتۋشىلار مەن ستۋدەنتتەر اراسىندا جۇرگىزىلەتىن بولادى، – دەدى ت.بالىقبايەۆ.
– بيىل ۋنيۆەرسيتەتتە سىبايلاس جەمقورلىق فاكتىلەرىنىڭ الدىن الۋ جانە ۋنيۆەرسيتەتتىڭ اكادەميالىق ادالدىق كودەكسىن ساقتاۋ ماقساتىندا ستۋدەنتتەر مەن وقىتۋشىلار قۇرامىنان تۇراتىن مونيتورينگ توبى قۇرىلدى. ەمتيحان بارىسىندا «اكادەميالىق ادالدىق» كودەكس ەرەجەلەرىن بۇزعان جانە جەمقورلىق فاكتىلەرىنە جول بەرگەن ستۋدەنت ۋنيۆەرسيتەتتەن شىعارىلادى. سەسسيانىڭ قورىتىندىسى بويىنشا ونىڭ ناتيجەلەرى انىقتالىپ، ءتيىستى شارالار قابىلدانادى. ۋنيۆەرسيتەت جەمقورلىق كۇرەس بويىنشا حالىقارالىق ستاندارتتارعا سايكەس بەلسەندى جۇمىس جۇرگىزۋدى جالعاستىراتىن بولادى، – دەدى وقۋ ورىن باسشىسى.
سەمينار بارىسىندا اناتوليي باندۋرو ISO زاڭنامالىق بازانىڭ ءنورماتيۆتى ولشەمدەرى مەن ستاندارتتالعان تالاپتارى تۋرالى ەگجەي-تەگجەيلى ايتتى. سونىمەن، ISO 37001 2016 حالىقارالىق ستاندارتى سىبايلاس جەمقورلىق تاۋەكەلدەرىن باعالاۋ، ISO ستاندارتىنىڭ قۇرىلىمىنا تالداۋ جاساۋ، ۋنيۆەرسيتەتتە سىبايلاس جەمقورلىققا قارسى مەنەدجمەنت جۇيەسىن ەنگىزۋ جانە جەتىلدىرۋ، جۇيەنى جانە ونىڭ پروسەستەرى مەن ەلەمەنتتەرىن جوبالاۋعا قويىلاتىن تالاپتاردى كۇشەيتەدى. سونداي-اق، حالىقارالىق ISO ستاندارتتارىنا سايكەس سىبايلاس جەمقورلىققا قارسى مەنەدجمەنت جۇيەسىن قۇرۋدىڭ 4 كەزەڭى – جۇيەلىك تالاپتاردى قالىپتاستىرۋ، سجقمج قۇرۋ، سجقمج تالاپتارعا سايكەستىگىن تەكسەرۋ، ۇزدىكسىز جەتىلدىرۋمەن سجقمج جۇمىسى تۋرالى ايتىلدى.
سەمينار ناتيجەلى ءوتىپ، شاراعا قاتىسۋشىلار جان-جاقتى پىكىرلەرىن العا تارتىپ، وي ءبولىستى.
