تۇركىستان وبلىسى قازىعۇرت اۋدانىندا ەڭبەگى مەن ىسكەرلىگىنىڭ ارقاسىندا كاسىپتەرىن دوڭگەلەتىپ وتىرعان ازاماتتار جەتەرلىك. ءاربىر ۋاقىتىنىڭ ءقادىرىن جەتە تۇسىنە بىلگەن ولار قازىردە كاسىپكەرلەرگە اينالعان ناعىز بەلسەندى تۇلعالار.

تۇڭعىش پرەزيدەنت ن.نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ «جومارت جۇرەك» بازالىق جوباسى اياسىندا اۋدانداعى كاسىپكەرلەر مەن دەمەۋشىلەر تاراپىنان از قامتاماسىز ەتىلگەن، كوپبالالى جانە مۇمكىندىگى شەكتەۋلى وتباسىلارعا، ۇلى وتان سوعىسى ارداگەرلەرىنە، جالعىزىلىكتى قارتتارعا كوپتەگەن كومەكتەر بەرىلۋدە.

وسىنداي نار تۇلعالى ازاماتتاردىڭ ءبىرى، «قازاقستاننىڭ 100 جاڭا ەسىمى» بايقاۋىنىڭ جەڭىمپازى، قازىعۇرت اۋدانىنىڭ قۇرمەتتى ازاماتى، كاسىپكەر – سىرىم ەرتايەۆ.

ول ءوز ەسەبىنەن 2017-2018 جىلدارى تۇرمىسى تومەن التىنتوبە اۋىل وكرۋگىنەن 2 وتباسىعا، قاراباۋ اۋىل وكرۋگىنەن 3 جانۇياعا، جاڭابازار اۋىل وكرۋگىنەن 2، جالپى 7 وتباسىعا ءۇي سالىپ بەرگەن. جانە بيىلعى جىلى دا بۇل قايىرىمدى ءىسىن جالعاستىرا وتىرىپ جۋىق ارادا جىگەرگەن اۋىل وكرۋگىنەن 1، قازىعۇرت اۋىل وكرۋگىنەن 2، جالپى 3 جانۇياعا باسپانا تارتۋ ەتپەك.

سونىمەن قاتار، كاسىپكەر مۇسىلمان قاۋىمى ءۇشىن جىلدىڭ ەڭ قاسيەتتى، ءارى ەرەكشە ايى – رامازان ايىندا اۋدانداعى الەۋمەتتىك جاعىنان از قامتىلعان 500 وتباسىعا ازىق-تۇلىك ۇلەستىرىپ، 5 ملن. تەڭگە كولەمىندە كومەك كورسەتتى. بارىمەن ءبولىسۋدى مۇسىلماندىق بورىشى دەپ ۇعىنعان جانى جومارت جان وسىلايشا ىزگىلىك جاساۋدى داستۇرگە اينالدىرعان.

 

تۇركىستان وبلىسى اكىمىنىڭ باسپا ءسوز قىزمەتى